قازاقستاندا قانداي ماماندىققا سۇرانىس جوعارى

استانا. قازاقپارات - ەڭبەك رەسۋرستارىن دامىتۋ ورتالىعىنىڭ ءبىرىنشى ۆيتسە- پرەزيدەنتى ەربول وسپانوۆ ەلەكتروندى ەڭبەك بيرجاسىندا قانداي ماماندىقتارعا سۇرانىس جوعارى ەكەندىگىن ايتتى،

دەپ حابارلايدى قازاقپارات ءتىلشىسى.

 «ءبىز enbek.kz پورتالىنا قانشا ءوتىنىم تۇسكەنىن، قانشا ادام جۇمىسقا ورنالاسىپ، قانشا جۇمىس بەرۋشى تىركەلگەندىگىن ۇنەمى قاداعالاپ وتىرامىز. بۇگىنگى كۇنى پورتالدا شامامەن 70 مىڭ جۇمىس بەرۋشى تىركەلگەن. شامامەن 42 مىڭ بوس جۇمىس ورنى، 92 مىڭ تۇيىندەمە بار. اعىمداعى جىلدىڭ باسىنان بەرى 360 مىڭ جۇمىس بەرۋشى جۇگىنىپ، ولاردىڭ ىشىندە 347 مىڭ ادام تۇراقتى جۇمىسقا ورنالاستى»، - دەدى ول.

وسى رەتتە ورتالىقتىڭ ۆيتسە- پرەزيدەنتى ەلىمىزدە قانداي ماماندىققا سۇرانىستىڭ جوعارى ەكەندىگىن اتاپ ءوتتى.

 «بۇگىنگى كۇنى مەديتسينا، مەكتەپكە دەيىنگى ءبىلىم بەرۋ، اقپاراتتىق تەحنولوگيالار،  ІТ- مەنەدجمەنت، ينتەرنەت قاۋىپسىزدىگى سىندى سالالاردىڭ ماماندارىنا سۇرانىس جوعارى بولىپ وتىر. پورتالداعى سۇرانىس جوعارى ماماندىقتارعا ۇنەمى ساراپتاما جاساپ وتىرامىز. ايتا كەتەرلىگى، جۇمىس ىزدەۋشىلەر تاراپىنان ەكونوميستەر، زاڭگەرلەر كوپ بولعانىمەن جۇمىس بەرۋشىلەر تاراپىنان مۇنداي قىزمەتتەرگە سۇرانىس جوق. جالپى ايىنا 150 مىڭ، ءتىپتى 300 مىڭ تەڭگە دە تولەۋگە دايىن جۇمىس بەرۋشىلەر بار»، - دەدى ەربول وسپانوۆ.

سونىمەن قاتار ول ەڭبەك سالاسىن سيفرلاندىرۋ اياسىندا بىرنەشە جوبامەن جۇمىس ىستەپ جاتقاندىقتارىن ايتتى.

«ونىڭ ءبىرىنشىسى - ەلەكتروندى ەڭبەك كىتاپشاسى. قازىرگى ۋاقىتتا ءبىز ىلكى رەجىمدە بىرلەسكەن جۇمىس جۇرگىزىپ جاتىرمىز. مۇنان بولەك قاعازباستىلىقتان ارىلۋ جانە بارلىعىن ەلەكتروندى فورماتقا كوشىرۋ ءۇشىن ەڭبەك شارتتارىن تىركەۋ قىزمەتىن اشتىق. مۇنى نيەت تانىتقان كەز كەلگەن جۇمىس بەرۋشى enbek.kz پورتالىندا جۇزەگە اسىرا الادى. بۇل قىزمەت 1 - قاراشادان باستاپ جۇمىس ىستەپ تۇر»، - دەدى ە. وسپانوۆ.

اۆتور: مارلان جيەمباي