بالانى جاسىنا قاراي تاربيەلەۋ

 استانا. قازاقپارات - بالانى ۇرىپ، جازالاۋ -  قازاق قوعامىنا ءتان «تاربيە امالى» . نەگىزىندە، بالانى ۇرۋ ادەتى ولاردىڭ جاۋاپ قايتارا الماۋىنان تۋعان.

العاشقى كەزەڭ -  5 جاسقا دەيىن

بۇل شاقتا بالاعا پاتشاداي قاراۋ كەرەك. تىيىم سالۋ ورنىنا، كوڭىلىن باسقا نارسەگە اۋدارۋعا تىرىسىڭىز. ەگەر ءتارتىپ بۇزسا، قاباق ءتۇيىپ، قورقىتقان ءتۇر جاساپ كورىڭىز. مۇنداي ء«تىلدى» بالالار جاقسى تۇسىنەدى. بەس جاسقا دەيىن بالانىڭ ومىرگە قىزىعۋشىلىعى ارتىپ، ءار نارسەگە كوڭىلى اۋىپ، جاڭا دۇنيەنى تانۋعا قۇمار بولادى.

بۇل شاقتا بالانىڭ لوگيكالىق ويلاۋى ءالى تولىق جەتىلگەن جوق. ماسەلەن، قىمبات ىدىستى سىندىرىپ السا، ونى ساتىپ الۋ ءۇشىن كوپ ەڭبەكتەنىپ، اقشا تابۋ كەرەك ەكەنىن تۇسىنبەيدى. سوندىقتان، جازالاۋدى ءار ىستەن تىيۋ جانە كۇش كورسەتۋ دەپ قابىلدايدى. دەمەك، وعان ىدىس سىندىرماۋدى ەمەس، وزىنەن كۇشتى ادامنان قورقۋدى ۇيرەتەسىز.

ەكىنشى كەزەڭ -  5 پەن 10 جاس ارالىعى

بۇل كەزەڭدە بالا موينىنا مىندەتتەر جۇكتەپ، ورىنداۋىن قاداعالاۋ كەرەك. اتقارماعان مىندەتى ءۇشىن جازالاۋعا بولادى، ءبىراق ۇرىپ- سوعۋدان اۋلاق بولىڭىز. 5 پەن 10 جاس ارالىعىندا وي- ءورىسى دامي باستايدى. بالا ءاربىر جاساعان ارەكەتىنە ۇلكەندەر رەاكسياسىن باقىلاۋدى ۇيرەنەدى. بۇل وعان دۇرىس شەشىم قابىلداۋدى ۇيرەتەدى.

ءۇشىنشى كەزەڭ -  10 مەن 15 جاس ارالىعى

بۇل كەزەڭدە وعان وزىڭىزبەن تەڭ ادامداي قاراۋ كەرەك. ماڭىزدى شەشىم قابىلدايتىن كەزدە ونىڭ پىكىرىن سۇراڭىز. جاۋاپكەرشىلىك قاسيەتىن ماداقتاۋىڭىز كەرەك. ءوز پىكىرىڭىزدى بۇيرىق رەتىندە ەمەس، بىلدىرتپەي، ياعني كەڭەس رەتىندە ايتۋعا تىرىسىڭىز. بالاڭىزدىڭ شەشىمى ۇناماسا، قاتاڭ تىيىم سالۋ ورنىنا، نەگاتيۆتى ناتيجەسىن بولجاپ، تۇسىندىرۋگە تىرىسىڭىز. بۇل ۋاقىتتا بالانىڭ تۇلعالىق قاسيەتتەرى، وزىنە دەگەن سەنىمى قالىپتاسا باستايدى.

سوڭعى كەزەڭ -  15 جاستان كەيىن

ونى سىيلاپ، ۇلكەن ادام رەتىندە قۇرمەتتەي ءبىلىڭىز. ەندىگى ۋاقىتتى بالانى تاربيەلەپ، وگەرتە المايسىز. وسىعان دەيىن بەرگەن تاربيەڭىزدىڭ جەمىسىن عانا كورە الاسىز.

اتالعان قاعيدالاردى ۇستانباعان جاعدايدا نە بولماق؟

بالانى بەس جاسقا دەيىن ۇرىپ، جازالايتىن بولساڭىز، بەلسەندىلىگىن باسىپ، ومىرگە دەگەن قىزىعۋشىلىعىن «ءسوندىرىپ»، وي- ءورىسىنىڭ دامۋىنا كەدەرگى ەتەسىز. قارا كۇشكە باعىنۋعا داعدىلاندىراسىز.

بەس جاستان كەيىن ەركەلەتىپ، دەگەنىن ىستەپ جۇرەتىن بولساڭىز، بالا وسپەي قالۋى مۇمكىن. ەڭبەكتەنگىسى كەلمەي، رۋحاني دامۋدان باس تارتادى.

10 جاستان كەيىن بالانى ەركەلەتىپ، جانىڭىزدان شىعارمايتىن بولساڭىز، وزىنە سەنىمسىز، بىرەۋگە تاۋەلدى بولىپ وسەدى. جالعىز قالۋعا قورقاتىن بولادى.

15 جاستان كەيىن بالاڭىزعا جەكە تۇلعا رەتىندە قارامايتىن بولساڭىز، ءسىزدىڭ مۇنداي قارىم- قاتىناسىڭىزعا رەنجىپ، ىرگەسىن اۋلاق سالۋعا ۇمتىلادى.

 

 دەرەككوزى: "پ ت" توپتاماسىنان