ا ق ش رەسەيگە قارسى سانكسيانىڭ جاڭا پاكەتىن قاراستىرادى
مەملەكەتتىك دەپارتامەنتتىڭ رەسمي وكىلى حيزەر نويەتتىڭ مالىمدەۋىنشە، رەسەيگە قارسى جاڭا سانكسيالار ا ق ش- تىڭ حيميالىق قارۋدى باقىلاۋ تۋرالى زاڭىنا ساي كەلەدى.
رەسەيگە قارسى شەكتەۋلەردىڭ العاشقى پاكەتى بيىل تامىز ايىنىڭ سوڭىندا ەنگەن. بۇل - بريتانيادا گ ر ۋ- ءدىڭ بۇرىنعى پولكوۆنيگى سەرگەي سكريپال مەن ونىڭ قىزى يۋليانى ۋلانۋىنا بايلانىستى رەاكسياسى بولاتىن.
وسىعان وراي ا ق ش كونگرەسى رەسەيدەن تۇسىنىكتەمە سۇراپ، بۇدان ءارى قايتالانبايتىنىنا كەپىلدىك بەرۋگە ءۇش اي ۋاقىت بەرگەن.
ا ق ش مەملەكەتتىك دەپارتامەنتىنىڭ وكىلى دەۆيد تەسلەردىڭ BBC-گە بەرگەن سۇقباتىندا ازىرگە ەشبىر قوسىمشا شەكتەۋلەر ەنگىزىلمەگەنىن، ءبىراق كەلىسى قادامدارعا دايىندىق باستالعانىن ناقتىلاي تۇسكەن. ونىڭ قانداي قادامدار ەكەنىن مەملەكەتتىك دەپارتامەنت كەيىنىرەك حابارلايتىنىن ايتقان.
الايدا، سانكسيانىڭ ەكىنشى پاكەتىندە شەكتەۋلەر قاتايا تۇسەتىنى قازىردىڭ وزىندە ءىشىنارا بەلگىلى بولدى. سونىڭ ءبىرى - ا ق ش بانكتەرىنە رەسەي ۇكىمەتىنە ازىق-تۇلىك ساتىپ الۋدان باسقا جاعدايدا كرەديت بەرۋگە تىيىم سالۋ. سونىمەن قاتار، ا ق ش پەن رەسەي ۇكىمەتى اراسىندا ديپلوماتيالىق قاتىناستى توقتاتۋ، رەسەي ۇكىمەتىنىڭ باقىلاۋىنداعى «اەروفلوت» سەكىلدى كومپانيالار جۇزەگە اسىراتىن اۋە تاسىمالىنا تىيىم سالۋ ماسەلەسى دە قاراستىرىلعان.