ديماش قۇدايبەرگەننىڭ لوندونداعى جاڭا شوۋىندا كورەرمەندەردى نە كۇتەدى؟
«DQ» - ۇلى بريتانياداعى قازاقستان مادەنيەتى كۇندەرىن اتاپ ءوتۋ شەڭبەرىندە ارنايى دايىندالعان، ديماش قۇدايبەرگەننىڭ جاڭا بىرەگەي شوۋى. بۇل شارا قازاقستان رەسپۋبليكاسىنىڭ مادەنيەت جانە سپورت مينيسترلىگىمەن ۇيىمداستىرىلىپ، قازاقستان رەسپۋبليكاسىنىڭ ۇلى بريتانيا جانە سولتۇستىك يرلانديا بىرىككەن كورولدىگىندەگى ەلشىلىگى قولداۋىمەن وتەدى. كونسەرتتەن تۇسكەن بارلىق قاراجات قازاقستاندىق دارىندى جاستاردى قولداۋعا جۇمسالماق. باعدارلاما 2008-جىلدان بەرى جۇمىس ىستەپ كەلەدى جانە 10 جىلدا 1000 عا جۋىق دارىندى جاستاردىڭ حالىقارالىق بايقاۋعا قاتىسۋىنا قول ۇشىن بەردى.
بيلەتتەر 19- قازان كۇنى لوندون ۋاقىتىمەن تاڭعى ساعات 11:00 دە ساتىلىمعا شىقتى. بۇگىنگە دەيىن الداعى شوۋعا بيلەتتەردىڭ شامامەن %80 ساتىلدى. ولاردى axs.com سايتىنان ساتىپ الۋعا بولادى، بۇل تۋرالى ءانشى Instagram جەلىسىندەگى پاراقشاسىندا جاريالادى:
«دوستار! سىزدەرمەن لوندونداعى كەزدەسۋدى اسىعا كۇتۋدەمىن! دايىندالىڭىزدار! سىزدەرگە ارنايى توسىن سىي ازىرلەدىم. بۇل كەرەمەت شوۋ بولاتىنىنا ۋادە بەرەمىن! تاعى ءبىر توسىن سىي بار: بيلەتتەردى ءالى دە ساتىپ الۋعا بولادى! axs.com سايتىنا ءوتىپ، بيلەتتەردى ساتىپ الىڭىزدار».
بىرەگەي شوۋ اتاقتى «Indigo at The O2» كونسەرت زالىندا وتەدى. مۇندا كورەرمەن ديماش قۇدايبەرگەننىڭ جاڭا باعدارلاماسىن تاماشالاي الادى. كورەرمەنگە كونسەرت ەسىگى لوندون ۋاقىتىمەن ساعات 18:30 دا اشىلادى، باعدارلاما 20:00 دە باستالادى دەپ جوسپارلانۋدا.
ەكى ساعاتتىق كونسەرتتىك باعدارلاما 4 بولىمنەن تۇرادى. ساحناداعى بارلىق كورىنىس live-band, ءبي قويىلىمدارىمەن، 3D- ەففەكتىلەرمەن جانە تاعى سول سياقتىلارمەن سۇيەمەلدەنەدى. شوۋ فان-اۋماقتىڭ كورەرمەنى جالپى پەرفورمانستىڭ ءبىر بولشەگى بولاتىنداي ەتىپ ۇيىمداستىرىلادى.
ديماش ومىردەن وتكەن دوسى دەنيس تەندى ەسكە الۋ قۇرمەتىنە «SOS d'un terrien» ءانىن ورىندايدى. ودان بولەك، ءانشىنىڭ وسى كەشتەگى رەپەرتۋارىندا، جانكۇيەرلەرى ديماش قۇدايبەرگەننىڭ ورىنداۋىندا ءسۇيىپ تىڭدايتىن شىعارمالار ورىندالادى. سونىمەن قاتار، 19- قاراشا كۇنى لوندوندا قوناقتاردىڭ نازارىنا مۋزىكالىق پرەمەرالار - جارىققا العاش شىعاتىن شىعارمالار ۇسىنىلادى. شوۋ بارىسىندا جاس ءانشى، ءان سالىپ، ءبي بيلەپ قانا قويماي، ءارتۇرلى مۋزىكالىق اسپاپتاردا وينايدى. بۇل - شوۋدىڭ تاعى ءبىر ەرەكشەلىگى بولماق.
ديماش قۇدايبەرگەن - قازاقستاندىق ءانشى، كومپوزيتور، مۋلتي-اسپاپشى ەكەنىن، ۆوكالدىق دياپازونى وتە كەڭ - 5 وكتاۆ، 4 نوتا جانە 1 جارتى توندى قامتيتىنىن ەستەرىڭىزگە سالامىز. سونىمەن قاتار ول «Singer»، «بايقوڭىردىڭ سازدى ءۇنى»، «جاس قانات»، «شىعىس بازارى»، «مەيكين ازيا»، «سلاۆيان بازارى» ءتارىزدى ءىرى مۋزىكالىق بايقاۋلارعا قاتىسىپ، جەڭىسكە جەتكەن.