ەموتسيا جۇرەككە قالاي اسەر ەتەدى؟
تانىمال كارديولوگ، بىرنەشە كىتاپتىڭ اۆتورى سانديپ دجاۋحاردىڭ بۇل ماقالاسىندا دارىگەرلەرگە جۇرەك اۋرۋلارىنا كۇيزەلىس پەن باسقا دا ەموتسيالاردىڭ اسەر ەتۋى مۇمكىندىگىن ەسكەرۋ كەرەكتىگى ايتىلعان. سونىمەن قاتار اۆتور وسى سالاداعى زەرتتەۋلەرگە دە توقتالادى.
«ءجۇز جىل بۇرىن كارل پيرسون بەيىتتەردى ارالاپ ءجۇرىپ، ايەلدەر مەن ولاردىڭ كۇيەۋلەرىنىڭ قازا تاپقان ۋاقىتتارىنىڭ ءبىر-بىرىنەن الشاق ەمەستىگىن بايقاعان. كەيىنىرەك ءتۇرلى زەرتتەۋلەر ناتيجەسىندە كۇيزەلىس پەن ءۇمىتتىڭ ءۇزىلۋى، تورىعۋ مەن رۋحتىڭ ءتۇسۋى دە ادام دەنساۋلىعىنا اسەر ەتەتىنى، ونىڭ ىشىندە جۇرەككە سالماق تۇسەتىنى انىقتالدى»، - دەپ جازعان اۆتور تاكوتسۋبو كارديوميوپاتياسى اتتى اۋرۋعا توقتالادى.
ونىڭ ايتۋىنشا، بۇل اۋرۋ جۇرەك تالماسىنا ۇقساس بەلگىلەرگە يە جانە جاقىن ادامنىڭ قازا تابۋى، قارجىلىق قيىندىق نەمەسە باسقا دا ەموتسيالىق جاعداي كەسىرىنەن پايدا بولادى.
«بۇگىنگى تاڭدا كارديولوگيادا زامان تالابىنا ساي كوپتەگەن وزگەرىستەر بولدى. دەگەنمەن، كارديولوگ سانديپ دجاۋحاردىڭ جاڭا كىتابىندا ايتىلعانداي، باقىتسىزدىق، كەدەيلىك نەمەسە كۇيزەلىس، تەڭسىزدىك سەكىلدى ەموتسيونالدى فاكتورلاردىڭ جۇرەك اۋرۋلارىنا اكەلۋى مۇمكىن ەكەنىن دە ەسكەرۋ كەرەك. ياعني، تەحنولوگيالىق پروگرەسس جاعدايىندا بيولوگيالىق جۇرەك پەن ەموتسيالىق جۇرەكتىڭ شەكاراسىن اجىراتۋ قيىنعا سوعادى»، دەپ جازادى اۆتور.
ماقالادا جۇرەكتىڭ بيولوگيالىق ماشينا جانە وتە ماڭىزدى ورگان عانا ەمەس، ادامنىڭ ەموتسياسى جينالاتىن ورىن ەكەنى دە ايتىلادى.
«جۇرەك رومانتيكا مەن شىنايىلىق، قورقىنىش پەن مۇڭنىڭ سيمۆولى. سونداي-اق ول قان اينالىمىنا جاۋاپ بەرەتىن سورعى (ناسوس). ادام ومىرىندە جۇرەك ورتاشا ەسەپپەن ءۇش ميلليارد رەت سوعادى ەكەن. سوندىقتان دا بولار، حيرۋرگتەر 19-عاسىرعا دەيىن جۇرەككە وپەراتسيا جاساماعان. ال بۇگىندە جۇرەك اۋرۋىنان قازا تاباتىندار سانى ارتتى. سوعان قاراماستان ەموتسيونالدى دەنساۋلىقتىڭ جۇرەك اۋرۋلارىنا اسەرىنە كوڭىل بولىنبەي كەلەدى»، دەپ جازىلعان ماقالادا.
