جاس ونەرتاپقىش جاساندى قول ويلاپ تاپتى
ماڭعىستاۋ وبلىسى شەتپە اۋىلىنىڭ تۋماسى بالا جاستان زەرەك بولدى. 8-سىنىپتا ماڭدايالدى ءبىلىم وشاعىنا قابىلدانىپ، مۇندا دا وزاتتار قاتارىندا ءجۇر.
2017 -جىلدىڭ باسىندا العىر قىز جاساندى قول تەحنيكاسى تۋرالى جوبانى زەرتتەي باستادى. وقۋشىنى جارىمجان جانداردىڭ تاعدىرى كوپ تولعانتتى. ءسويتىپ مۇگەدەك جاندارعا ارنالعان قول پروتەزىن ويلاپ تاۋىپ، عىلىمي تۇرعىدان تۇجىرىم جاسادى.
جوبا ماقساتى - قاراپايىم جانە كەز كەلگەن جانعا قولجەتىمدى قول پروتەزىن جاساپ شىعارۋ. ادامنىڭ ساۋ قولىنىڭ بۇلشىق ەتتەرى جيىرىلعاندا، داتچيكتەن ميكرو باقىلاۋشىعا سيگنال بارادى. ميكروكونتروللەر كەلگەن بەلگىنى وڭدەپ، موتورعا باعىتتايدى.
كەلگەن سيگنالعا سايكەسىنشە سەرۆوموتور ساۋساقتاردى جۇدىرىققا جۇمادى نەمەسە اشادى. جوبانىڭ باستى ارتىقشىلىعى - داتچيكتەردىڭ باسىم بولىگىنىڭ قولدان جاسالۋىنا بايلانىستى، جوبانىڭ ىسكە اسۋىنا قاراجاتتىڭ از جۇمسالاتىنى.
«ادەتتە دەنى ساۋ ادامدارعا قاراپايىم نارسەلەردى جاساۋ مۇمكىن بولماعان كەزدە مۇگەدەكتەرگە ءومىر ءسۇرۋ، ءتىپتى وڭاي ەمەس ەكەنىن ويلايسىڭ. مىسالى، قولى جوق ادامعا زاتتاردى ۇستاۋعا مۇمكىندىك بولسا، قانداي جاقسى! مەن جاساندى قولمەن زاتتاردى الۋعا كومەكتەسەتىن قۇرىلعى جاساۋعا تىرىستىم. بۇل مەنىڭ العاشقى تاجىريبەم. ەگەر تابىستى بولىپ جاتسا، وسىندايق ۇرىلعىلار ارقىلى مۇگەدەكتەرگە كومەك كورسەتۋدى جالعاستىرعىم كەلەدى. بۇل قۇرالدار وتە قاراپايىم جانە ارزان بولۋى كەرەك. ونەرتابىس مۇمكىندىگى شەكتەۋلى جانداردىڭ ءومىرىن جاقسارتۋعا ارنالعان. مۇنى تۋا ءبىتتى جارىمجاندار نەمەسە اپاتتى جاعدايلار سالدارىنان قولىن جوعالتقان ادامدار قولدانا الادى»، - دەيدى ونەرتاپقىش وقۋشى.
اقاۋى بار قول جاساندى ماتەريالدان جاسالعان مەحانيكالىق قولمەن بىرىكتىرىلەدى. ول بەلگىلى ءبىر سيگنال بەرىلگەن سوڭ، مىقتاپ قىسىلادى. سيگنال سەنسور ارقىلى ساۋ قولعا قوسىلعان قۇرىلعىدان كەلەدى. سەنسورلار ساۋقولدىڭ بيتسەپس جانە تريتسەپسىنە ورناتىلىپ، كۇش جۇمساپ جاتقاندا سيگنال بەرۋدى جۇزەگە اسىرادى.
قۇرىلعى كومەگىمەن جاساندى قول جۇمىلادى نەمەسە جازدىرىلادى. نارىققا شولۋ جاساعان ونەرتاپقىش قىز ەلىمىزدە 100 ميلليون تەڭگەگە 50-70 ادام پروتەز سالدىراتىنىن ايتادى. شامامەن ءبىر جاساندى قول 2 ميلليون تەڭگەگە جۋىقتايدى. بۇل قاراپايىم حالىقتىڭ قالتاسىنا اۋىرتپالىق سالاتىنى راس. مەنىڭ تاڭداعان ماتەريالدارىمنان ءبىر قول 500 مىڭعا جۋىقتايدى، جوبا ناتيجەسىن بەرسە 100 مىڭ تەڭگەگە دەيىن تومەندەتۋگە مۇمكىندىك بولادى، - دەيدى نازيرا.
وقۋشىنىڭ جوباسىنا باستاپقى قارجى رەتىندە 2 ميلليون 800 مىڭ تەڭگە قاجەت. اتالعان قاراجاتتى تابۋعا كومەكتەسەر جان تابىلسا، جاس ونەرتاپقىش بولاشاعىن وسى كاسىپتى دامىتۋمەن بايلانىستىرماق.
ايتا كەتەلىك، نازيرا «اتامەكەن» ۇلتتىق كاسىپكەرلەر پالاتاسى ۇيىمداستىرعان «جىلدىڭ ۇزدىك جاس كاسىپكەرى» بايقاۋىنا قاتىسقان.
Massaget.kz