الەمدەگى ەڭ ۇلكەن سۋپەركومپيۋتەر ىسكە قوسىلدى
بۇل تۋرالى Daily Mail حابارلادى.
«العاش رەت ءبىر سەكۋندتا 200 ميلليون ارەكەت اتقارا الاتىن ەڭ ءىرى سۋپەركومپيۋتەر ىسكە قوسىلدى. مامانداردىڭ ايتۋىنشا، ماشينا ادام ميىنىڭ قىزمەتىنە ۇقساس جۇمىس ىستەيدى جانە وسى اپتادا كومپيۋتەردىڭ ءبىر ميلليونىنشى پروتسەسسورلى يادروسى ورناتىلدى. Spiking Neural Network Architecture (SpiNNaker) دەپ اتالاتىن كومپيۋتەردى مانچەستەر ۋنيۆەرسيتەتىنىڭ ماماندارى ون جىل بويى قۇراستىردى. ال كومپيۋتەردىڭ كونتسەپتسياسىن جاساۋعا جيىرما جىل ۋاقىت كەتكەن»، - دەلىنگەن ماقالادا.
سونىمەن قاتار سۋپەركومپيۋتەردىڭ ءار ءچيپى ءجۇز ميلليون بولشەكتەن تۇرادى.
پروفەسسور ستيۆ فاربەردىڭ ايتۋىنشا، SpiNNaker جۇمىسى قاراپايىم كومپيۋتەرگە قاراعاندا ادام ميىنا كوبىرەك ۇقسايدى. سونىمەن قاتار بۇل كومپيۋتەر نەيروبيولوگتارعا ادام ميىنىڭ قالاي جۇمىس ىستەيتىنىن دالىرەك تۇسىنۋگە مۇمكىندىك بەرەتىن بولادى. سونداي-اق اتالمىش تەحنيكا جۇرەتىن، قوزعالاتىن جانە سويلەيتىن موبيلدى روبوتتار قۇراستىرۋعا ارنالعان نەيروندى جۇيە جاساۋعا كومەكتەسپەك.
