اۋا رايى: رەسپۋبليكانىڭ باسىم ايماعىندا تۇمان ءتۇسىپ، كوكتايعاق بولادى

استانا. قازاقپارات - بۇگىن اتموسفەرالىق اعىنداردىڭ وتۋىنە بايلانىستى قازاقستاننىڭ باسىم بولىگىندە اۋا رايى قۇبىلمالى بولادى، دەپ حابارلايدى قازاقپارات «قازگيدرومەت» ر م ك- نىڭ مالىمەتتەرىنە سىلتەمە جاساپ.

كاسىپورىن مالىمەتتەرىنە قاراعاندا، ەلىمىزدىڭ كوپشىلىك ايماقتارىندا جاۋىن-شاشىن بولىپ، تەك وڭتۇستىكتە، وڭتۇستىك-شىعىستا جانە ەلىمىزدىڭ باتىسىندا عانا جاۋىن بولمايدى.

كەي جەرلەردە ەكپىندى جەل سوعىپ، تۇمان، كوكتايعاق، سولتۇستىك-شىعىستا جاياۋ بۇرقاسىن بولادى.

اقمولا، سولتۇستىك قازاقستان، پاۆلودار وبلىستارىنىڭ كەي جەرلەرىندە تۇمان ءتۇسىپ، كوكتايعاق بولىپ، كەي جەرلەردە تۇندە جەلدىڭ جىلدامدىعى سەكۋندىنا 15-20 مەترگە دەيىن كۇشەيەدى.

قوستاناي، قاراعاندى، شىعىس قازاقستان وبلىستارىنىڭ كەي جەرلەرىندە تۇمان ءتۇسىپ، كوكتايعاق بولادى.

قوستاناي، شىعىس قازاقستان وبلىستارىنىڭ كەي جەرلەرىندە جەل 15-20 م/س دەيىن كۇشەيىپ، قوستاناي وبلىسىندا جاياۋ بۇرقاسىن بولۋى ىقتيمال.

تۇركىستان وبلىسىنىڭ كەي جەرلەرىندە كۇندىز جەل 15-20 م/س- قا دەيىن كۇشەيەدى.

جامبىل، ماڭعىستاۋ، باتىس قازاقستان وبلىستارىندا، تۇندە اتىراۋ، الماتى وبلىستارىنىڭ كەي جەرلەرىندە تۇمان بولادى.

الماتى وبلىسىنىڭ جالاڭاشكول اۋدانىندا كۇندىز جەل 15-20 م/س جىلدامدىقپەن ۇيتقيدى.