تاۋەكەل ءمۇسىلىم قىلمىس الەمىنىڭ سەركەسى بولعان اكەسى تۋرالى كينو تۇسىرمەك

 استانا. قازاقپارات - بەلگىلى اكتەر تاۋەكەل ءمۇسىلىم اكەسىنە ارناپ كينو ءتۇسىرۋدى ارمانداپ ءجۇر. تەك ول ءۇشىن اكتەر جىگىت ءبىراز ەڭبەكتەنىپ، قارجى جيناماق نيەتتە. ال ازىرگە تاۋەكەل فيلمنىڭ سيۋجەتى مەن قۇرىلىمىن جوسپارلاۋدا.

بۇل تۋرالى «استانا» ارناسى حابارلايدى.

وسىعان دەيىن تانىمال اكتەر تاۋەكەل ءمۇسىلىم ءوزىنىڭ  90 - جىلدارى قىلمىس الەمىنىڭ سەركەسى بولعان سابىر ءمۇسىلىمنىڭ ۇلى ەكەنىن ايتقان بولاتىن.

«ءوزىم جۇزۋگە قاتىسامىن. 1 ساعات ۋاقىتتاي توقتاماي جۇزەمىن. سول ۋاقىتتا نەشە ءتۇرلى وي كەلەدى. سول كەزدە اكەم تۋرالى فيلم تۇسىرەمىن دەپ ويلاعان ەدىم. «ءوزىمىزدىڭ قازاق باۋىرلارىمىزعا، قارىنداستارىمىزدى قورعاپ، سەس كورسەتۋىمىز كەرەك» دەگەن سياقتى، كينونىڭ باسىنا اكەمنىڭ ءسوزىن قويىپ، «سابىر» دەپ جازىپ قويسام دەيمىن. باستى رولگە ازىرگە بىلمەيمىن، مۇمكىن اكەمنىڭ ءرولىن ءوزىم وينارمىن»، - دەيدى تاۋەكەل.

ايتا كەتەيىك، تاۋەكەلدىڭ فيلمى اكەسىنىڭ ەسىمىمەن، ياعني «سابىر» دەپ اتالۋى مۇمكىن.

«تاۋەكەل دەگەن اتىمدى اكەم قويعان. تاعدىردىڭ جازۋىمەن اكە مەن شەشەم كىشكەنتاي كەزىمدە اجىراسىپ كەتتى. اكە تاربيەسىن كورمەي وسكەندىكتەن، ول كىسى تۋرالى ماردىمدى ەشتەڭە ايتا المايمىن. انام ءبىزدىڭ ارالاسۋىمىزعا قارسى بولعان جوق. ءالى كۇنگە دەيىن ەنەسىنىڭ الدىن كەسىپ وتپەي، سالەمىن سالادى. توعىزىنشى سىنىپتا اكەممەن ءۇش ايداي بىرگە ءجۇردىم. اكەم سپورتقا جاقىن ەدى. پوەزيانى، ونەردى سۇيەتىن. كەز كەلگەن وتىرىستى جاندىرىپ جىبەرەتىن. ماعان ۇنەمى «وقى، كەلەر زامان -  بىلىمدىلەردىڭ ۋاقىتى» دەيتىن. راسىندا، قازىر -  بىلەكتىڭ ەمەس، ءبىلىمنىڭ زامانى. ول كىسىگە ۇقسايمىن دەپ ايتا المايمىن. كەيدە ءوز ويىمدى جاسىرىپ، ۇندەمەي قالاتىن جاسىقتاۋ مىنەزىم بار. اكەمنىڭ قولىندا وسكەن بولسام، مىنەزىم باسقاشا بولار ما ەدى. ءبىراق ىشىمدە ءبىر قايسارلىق بار ەكەنىن سەزەمىن. اكەمنىڭ كوزىن كورگەن جۇرت «بۇل -  سابىردىڭ ۇلى عوي، تەكتىنىڭ كوزى» دەپ جاتادى. اكە اتىنا لايىق بولسام دەيمىن »، - دەيدى تاۋەكەل.