قازاقستاندىق تانىمال كاسكادەر قاسىم جۇماعوجين قايتىس بولدى
حەللوۋين مەرەكەسىندە قازا بولعان جىگىت تانىمال قازاقستاندىق كاسكادەر قاسىم جۇماعوجين بولىپ شىقتى. بۇل اقپاراتتى ارىپتەستەرى راستاعان.
Nomad Stunts كاسىبي كاسكادەرلەر توبىنىڭ بايلانىس مەنەدجەرى ەۆگەنيا لي ءارتىس- كاسكادەردىڭ الماتىلىق «ت س ب» تۇنگى كلۋبىندا حەللوۋين مەرەكەسىنە قاتىسقانىن راستاپ، قايعىلى وقيعانىڭ ءمان- جايىن ايتىپ بەردى.
ەۆگەنيا لي بەرگەن مالىمەت بويىنشا، 3 - قاراشادا قاسىم جۇماعوجين ارىپتەستەرىمەن بىرگە «ت س ب» بارىندا شوۋ باعدارلاماعا قاتىسادى. سسەناري بويىنشا ول ارقانعا اسىلعان مۋميانىڭ ءرولىن سومداعان.
قاسىم بۇل تريۋكتى ورىنداۋ ءۇشىن، ارنايى كاسكادەر جيلەتىن كيگەن ەكەن. سىرتتاي قاراعاندا جاي كيىم سياقتى كورىنەتىن جيلەتتە ادام دەنەسىنىڭ تومەنگى بولىگىن ۇستاپ تۇراتىن ارنايى بەلدىگى بار.
«قاسىمدى وسى جيلەت ارقىلى بايلاپ، ءىلىپ قويدى. كورەرمەندەر كورگەن ارقان - كوستيۋمنىڭ ءبىر بولىگى، ول بوس بولاتىن. قاسىم موينىنداعى ارقاننان بوساپ شىعۋعا تىرىسىپ جاتقانى تۇسىرىلگەن كادرلار - شوۋ- باعدارلامانىڭ ءبىر بولىگى»، - دەپ اتاپ ءوتتى لي.
كاسكادەردى ءۇش مەتر بيىكتىككە ءىلىپ قويعان. باردا ورناتىلعان ءىلىپ قويۋ جۇيەسى قازاقستاندىق، رەسەيلىك، گولليۆۋدتىق فيلمدەردى ءتۇسىرۋ كەزىندە تالاي رەت پايدالانىلعان، دەيدى باسپا ءسوز حاتشىسى. بۇل جۇيە بيىكتەن قۇلاعاندا، مىسالى، كاسكادەر كوپىردەن تومەن سەكىرگەندە نەمەسە جارىلىس تولقىنىنان ۇشىپ كەتكەندە جانە ۇشۋ يمميتاتسياسىن كەلتىرگەندە قولدانىلادى ەكەن.
«جيلەت پەن ونىڭ ءار بەكىتكىشى 500 ك گ سالماقتى كوتەرە الادى. قاسىمنىڭ سالماعى - 75 ك گ»، - دەپ اتاپ ءوتتى ەۆگەنيا لي.
ونىڭ ۇستىنە، قويىلىم الدىندا سىناق وتكىزىپتى - قاسىمدى جوعارى كوتەرىپ، ول «ءبارى دۇرىس» دەپ جاۋاپ بەرگەن سوڭ، قايتا تۇسىرگەن.
«ونىڭ قاسىندا تاجىريبەسى مول كاسىبي كاسكادەر بولدى. مۇنداي تريۋك جانە ءىلىپ قويۋ جۇيەسىمەن جۇمىستى كاسكادەر ەشقاشان جالعىز ءوزى ورىندامايدى. ونى قاداعالاپ، كەرەك كەزدە كومەككە ۇمتىلاتىن ارىپتەسى قاسىندا بولادى. بۇكىل كاسكادەرلەردىڭ ىم- يشارا ءتىلى بار، قانداي دا ءبىر جايسىزدىقتى سەزىنگەندە بەلگى بەرىپ، تريۋكتى توقتاتادى. قاسىم ءبارى دۇرىس ەكەنىن ءبىلدىرىپ، بىرنەشە رەت بەلگى بەرگەن»، - دەيدى ەۆگەنيا لي.
قازاسىنىڭ سەبەبى - ينفاركت
15 مينۋتتان سوڭ قويىلىم اياقتالىپ، قاسىمدى تۇسىرەدى. ول ەسىن جوعالتپاسا دا، ءبىر ءتۇرلى السىرەپ تۇرعانداي كورىنگەن.
«ارىپتەستەرى ونى بىردەن تازا اۋاعا الىپ شىعىپ، جەدەل جاردەم شاقىرىپ، العاشقى كومەك كورسەتە باستايدى. دارىگەرلەر امان الىپ قالۋعا تىرىسقانىمەن، سالدەن سوڭ قازا بولعانىن حابارلادى. بۇگىن قاسىمنىڭ تۋىستارى سوت- مەديتسينالىق ساراپتامانىڭ قورىتىندىسىن الدى. وندا ارىپتەسىمىزدىڭ ولىمىنە ميوكارد ينفاركتى سەبەپ بولعانى جازىلعان»، - دەپ حابارلادى Nomad Stunts وكىلى.
ارىپتەستەرىنىڭ ايتۋىنشا، قاسىم جۇماعوجين - وتە تاجىريبەلى كاسكادەر. Nomad Stunts توبى قۇرىلعاننان باستاپ ەڭبەك ەتكەن. ودان بولەك، كاسىبي سيرك ءارتىسى. قاسىمنىڭ دايىندىعى وتە جوعارى دەڭگەيدە بولاتىن، ۇزدىك وتاندىق جانە گولليۆۋدتىق فيلمدەردىڭ تۇسىرىلىمىنە قاتىسقان، دەپ اتاپ ءوتتى Nomad Stunts.
«قاسىم جۇماعوجيننىڭ جەرلەۋ ءراسىمى دۇيسەنبى 5 - قاراشادا وتەدى. ءبىز قاسىمنىڭ تۋىستارى مەن جاقىندارىنا قايعىرىپ كوڭىل ايتامىز. دوسىمىزدان ايىرىلىپ قالدىق، بولعان وقيعاعا ءالى سەنە الماي وتىرمىز»، - دەيدى لي.
قاسىم جۇماعوجين 1984 -جىلى 5 - مامىردا دۇنيەگە كەلگەن. سپورتتىق گيمناستيكادان سپورت شەبەرى. يجيەۆسكتە وتكەن حالىقارالىق سيكر ونەرى فەستيۆالىندە «التىن ايۋ» جۇلدەسىن يەلەنگەن.
جۇماعوجين 25 قازاقستاندىق، رەسەيلىك جانە شەتەلدىك فيلمگە ءتۇستى: «كوشپەندى»، «دنيەۆنوي دوزور»، «رەكەتير»، «نەۋدەرجيمىە-2»، «بالۋان شولاق»، «جاۋجۇرەك مىڭ بالا» جانە تاعى باسقا.
https://sputniknews.kz