ا ق ش- تىڭ يرانعا قارسى جاڭا سانكسيالارى كۇشىنە ەندى

استانا. قازاقپارات - يزۆەستيا شەكتەۋ شارالارى تەگەراننىڭ مۇناي ساۋداسىنان تاۋىپ وتىرعان كىرىسىن ايتارلىقتاي قىسقارتپاق.

 اق ءۇي يرانعا قارسى سانكسيالار ارقىلى تەگەراننىڭ مۇنايدان الاتىن كىرىسىن ازايتۋدى كوزدەپ وتىر. ءبىراق شەكتەۋ شارالارىنىڭ الەمدىك نارىققا كەرى اسەرىن بولدىرماۋعا كۇش سالادى. بۇل تۋرالى ا ق ش- تىڭ يران بويىنشا ارنايى وكىلى برايان حۋك مالىمدەدى. ايتا كەتەيىك، بۇگىن ا ق ش- تىڭ يرانعا قارسى سانكسيالارىنىڭ ەكىنشى بولىگى كۇشىنە ەندى. شەكتەۋ شارالارى ەنەرگەتيكا سالاسىنا، مۇناي- ساۋدا كەلىسىمدەرىنە، ورتالىق بانكتىڭ قارجى وپەراتسيالارىنا، كەمە جاساپ شىعارۋ وندىرىسىنە قارسى باعىتتالعان.

رەسمي تەگەران ۆاشينگتوننىڭ ارەكەتىن الەم ەلدەرى ايىپتاپ وتىر دەپ ا ق ش قىسىمىنا قارسى كۇرەسە بەرەتىنىن مالىمدەدى. ايتا كەتەيىك، ا ق ش يرانعا العاش رەت سانكسيانى 1979 -جىلى كوتەرىلىستەن كەيىن ەنگىزگەن بولاتىن. سودان بەرى ول تولىقتىرىلىپ، تۇزەتىلىپ وتىردى.

 ۆاشينگتون تارابى يران يادرولىق جوباسىنا قاتىستى كەلىسسوزدەر جۇرگىزۋگە دايىن بولعانىمەن، ەۋروپا وداعى يرانمەن ورناتىلعان ساۋدا قاتىناستارىن ودان ءارى دامىتۋعا نيەتتى. وسىعان وراي فرانسيا، گەرمانيا جانە ۇلى بريتانيا ەلدەرىنىڭ قارجى قۇرىلىمدارى جانە سىرتقى ىستەر مينيسترلەرى يرانمەن ترانزاكسيا جۇيەسىن ۇيىمداستىرۋ جۇمىستارىن قولعا الماق.

جۋىردا ولار ەۋروپا وداعى ديپلوماتيا باسشىسى فەدەريكا موگەرينيمەن بىرگە وسى ەلمەن ساۋدا قاتىناستارىن ورناتقان كومپانيالارعا قولداۋ كورسەتۋگە بايلانىستى مالىمدەمە جاساعان ەدى. ماڭىزدى قۇجاتتا ەكونوميكا باعىتىندا قىزمەت ەتىپ جاتقان وپەراتورلارعا كومەك كورسەتۋ جايى باياندالعان.

ا ق ش يرانعا سانكسيا سالۋ ماسەلەسىندە جەڭىلدىك جاساۋعا دا دايىن. بۇل تۋرالى حابارلاعان Bloomberg اگەنتتىگى دەرەككوزىنىڭ مالىمەتىنشە، ۆاشينگتون اراسىندا قىتاي، جاپونيا، وڭتۇستىك كورەيا مەن ءۇندىستان بار - بارلىعى سەگىز مەملەكەتتىڭ يراننان مۇناي ساتىپ الۋىنا قارسى ەمەس. مۇنىڭ ەسەسىنە، سەگىز ەل مۇناي يمپورتى كولەمىن ازايتۋى ءتيىس. سوندا عانا مۇناي باعاسىن قىمباتتاتپاۋعا بولادى.

ا ق ش مەملەكەتتىك دەپارتامەنتى مەن قارجى مينيسترلىگى ب ا ق- تاعى يرانعا سالىناتىن سانكسيانى جەڭىلدەتۋگە قاتىستى اقپاراتقا كوممەنتاريي بەرمەدى. اگەنتتىك جەڭىلدىك ۋاقىتشا عانا جاسالاتىنىن ايتادى. ا ق ش جەڭىلدىك جاسالعان ەلدەر كەلەشەكتە يراننان مۇناي ساتىپ الۋدى قىسقارتادى دەپ ۇمىتتەنەدى.

www.24.kz