شەبەرلىگىن ا ق ش- تا دالەلدەگەن قازاق دارىگەرى شىمكەنتتە تاجىريبەسىمەن بولىسۋدە

استانا. قازاقپارات- ورتوپەديالىق وپەراتسيا تىڭ ادىسپەن جاسالادى. امەريكادا تۇراتىن قازاق دارىگەرى، پروفەسسور جولداس كۇلجانوۆ شىمكەنتكە كەلىپ بىلگەن- تۇيگەنىن ۇيرەتىپ جاتىر.

بىلىكتى مامان جەرگىلىكتى دارىگەرلەرمەن بىرگە ناۋقاستاردىڭ بىرىنە كۇردەلى وپەراتسيا جاسادى. قازاقستاندا تۋعان جولداس كۇلجانوۆ 26 جىل بويى امەريكادا ەڭبەك ەتەدى.

 

پروفەسسور جولداس كۇلجانوۆ -  جاراقاتتان ساۋ- تامتىعى قالماعان اعزانى قالپىنا كەلتىرۋدىڭ شەبەرى. سونىڭ ىشىندە جامباس جانە اياق- قول سۇيەكتەرىنىڭ جانە باسقا دا زاقىم كەلگەن مۇشەلەردى قايتا قالپىنا كەلتىرۋدە كۇردەلى وپەراتسيالاردى جاساپ كەلەدى. بىلىكتى مامان بۇل تاجىريبەسىن وزىنەن كەيىنگى بۋىنعا ۇيرەتۋدى ءجون دەپ تاۋىپتى. وپەراتسيا كەزىندە كۇردەلى جاراقاتتاردى قالاي قالپىنا كەلتىرۋگە بولاتىنى جونىندە كەڭەس بەردى.

جولداس كۇلجانوۆ، سەنت- لۋيس ۋنيۆەرسيتەتتىك ەمحانانىڭ ورتوپەديا دەپارتامەنتىنىڭ باسشىسى:

- ەرتەڭ تاعى دا مۇنداعى ماماندارمەن بىرىگىپ كۇردەلى وپەراتسيالار جاسايمىز. مۇنداعى ماماندارعا ءارى شەبەرلىك ساباعىن وتكىزەمىن. شىمكەنت قالالىق دەنساۋلىق ساقتاۋ باسقارماسىمەن ىسكەرلىك بايلانىسىمىز ودان ءارى جالعاسادى دەپ ويلايمىن. ەڭ باستىسى، بۇل كەلىسىم مامانداردىڭ بىلىكتىلىگىن ارتتىرۋدا زور سەپتىگىن تيگىزەدى.

 ستاتيستيكالىق مالىمەتتەرگە سۇيەنسەك، رەسپۋبليكا بويىنشا جول- كولىك اپاتتارىنىڭ سالدارىنان 3 مىڭعا جۋىق ادام قايتىس بولادى. 25 مىڭ ادام ءارتۇرلى دەنە جاراقاتىن الادى. ال مىڭ ادام ارباعا تاڭىلىپ، مۇگەدەك بولادى. دەنە جاراقاتىن العاندارعا دەر كەزىندە مەديتسينالىق كومەك كورسەتىپ، ەمدەۋ جۇمىستارىنىڭ ساپاسىن ارتتىرسا، جاراقات العانداردىڭ جاعدايىن جاقسارتىپ، مۇگەدەكتىكتەن ارىلتۋعا بولادى. سوندىقتان دەنساۋلىق ساقتاۋ باسقارماسى تراۆماتوليالىق- ورتوپەديالىق باعىتتاعى جۇمىستاردى ودان ءارى كۇشەيتپەك.

 نۇرلان قاسىموۆ، قالالىق دەنساۋلىق ساقتاۋ باسقارماسىنىڭ باسشىسى:

- مۇندا ەكى باعىت بار. ءبىرىنشىسى -  جولداس كۇلجانوۆ سەكىلدى امەريكادا ۇزدىك بەس دارىگەردىڭ قاتارىنا كىرەتىن مەديتسينا پروفەسسورلارىنان ساباق الۋ، تاجىريبە الماسۋ. ال ەكىنشىسى -  ءبىز مامانداردى شەتەلگە وقۋعا جىبەرمەكشىمىز. مۇنداعى ماقسات -  مەديتسينا ساپاسىن ارتتىرۋ.

ورتوپەديا جانە تراۆماتولوگيا قاۋىمداستىعىنىڭ جانە ASAMI مۇشەسى ءۇش كۇن بويى سۇيەكتەردىڭ زاقىمدانۋىنان زارداپ شەگىپ جۇرگەن قالا تۇرعىندارىنا جانە اۋرۋحانادا ەمدەلىپ جاتقان پاتسيەنتتەرگە تەگىن كەڭەس بەرمەك. وزگە ەلدە بىلىكتىلىگىن كورسەتە بىلگەن قازاق دارىگەرى مەن شىمكەنت قالالىق دەنساۋلىق ساقتاۋ باسقارماسى جانە وڭتۇستىك مەديتسينا اكادەمياسى ءۇشجاقتى كەلىسىمگە قول قويدى. مەموراندۋم اياسىندا اۋىر جاراقاتتاردى ەمدەۋ مەن قالپىنا كەلتىرۋ جونىندەگى مەديتسينالىق جۇمىستار بىرلەسىپ ىسكە اسپاق.

www.24.kz