استانا مەشىتىندە اياق كيىم ۇرلاعان ەر ادام ۇستالدى

استانا. قازاقپارات - استانادا مەشىتتەردەگى ۇرلىق وقيعالارىنا قاتىستى سوتقا دەيىنگى تەرگەۋ امالدارى ءجۇرىپ جاتىر، دەپ حابارلايدى قازاقپارات قالالىق اكىمدىك سايتىنا سىلتەمە جاساپ. 

بۇعان دەيىن قالا تۇرعىنى 28 - قازاندا «نۇر- استانا» مەشىتىندە اياق كيىمىن ۇرلاتقانى تۋرالى پوليتسياعا شاعىم تۇسىرگەن.

«مەشىت كىرەبەرىسىندە بولعان ۇرلىق فاكتىسى بەينەباقىلاۋ كامەراسىنا ءتۇسىپ قالعان. 31 - قازاندا پوليتسيا قىزمەتكەرلەرى جەدەل ىزدەستىرۋ شارالارىن جۇرگىزدى جانە كۇدىكتى - تۇركىستان وبلىسىنىڭ 26 جاستاعى تۇرعىنى «حازىرەت سۇلتان» مەشىتىندە كەزەكتى ۇرلىق ۇستىندە ۇستالدى. اتالعان فاكتىلەرگە قاتىستى ق ر ق ك 188-بابىنا («ۇرلىق» ) سايكەس سوت الدى تەرگەۋ امالدارى ءجۇرىپ جاتىر»، - دەپ جازدى اكىمدىك سايتى.

ۇرلانعان زاتتار ءوز يەلەرىنە قايتارىلدى جانە كۇدىكتىنىڭ وسىعان ۇقساس وقيعالارعا قاتىسى بار- جوعى تەكسەرىلىپ جاتىر.

«استانانىڭ ءتارتىپ ساقشىلارى ەلوردا تۇرعىندارى مەن قوناقتارىنا قوعامدىق ورىنداردا ۇرلىق ءجيى جاسالاتىندىعىن ەسكە سالادى. پوليتسيا دەپارتامەنتىنىڭ قىزمەتكەرلەرى ازاماتتاردى قىراعى بولىپ، ءوز زاتتارىنا اباي بولۋعا شاقىرادى. وسى ازاماتتىڭ ارەكەتتەرىنەن زارداپ شەككەن تۇرعىنداردى ەسىل اۋداندىق ىشكى ىستەر باسقارماسىنا حابارلاسۋىن سۇرايمىز»، - دەلىنگەن حابارلامادا.

اۆتور: ايجان سەرىكجان قىزى