ايعا قونعان ارمسترونگتىڭ بۇيىمدارى اۋكسيونعا شىعارىلدى

استانا. قازاقپارات - العاش ايعا قونعان ادام نيل ارمسترونگتىڭ بۇيىمدارى اۋكسيونعا شىعارىلدى، دەپ حابارلايدى قازاقپارات euronews.com-عا سىلتەمە جاساپ.

اۋكسيونعا شىعارىلعان زاتتاردىڭ اراسىندا عارىشكەردىڭ سكافاندرى، مەدالدارى، فوتوسۋرەتتەرى، جازبالارى - جالپى ەكى مىڭعا جۋىق بۇيىم بار.

2012 -جىلى ومىردەن وزعان اتى اڭىزعا اينالعان عارىشكەردىڭ بۇيىمدارىن اۋكسيونعا ونىڭ وتباسى شىعارىپ وتىر.

Heritage Auctions اۋكسيون ءۇيىنىڭ پرەزيدەنتى گرەگ رواننىڭ ايتۋىنشا، نيل ارمسترونگتىڭ جەكە مۇلىكتەرىنە ەش نارسە تەڭ كەلمەيدى. ويتكەنى ول ايعا تابانى تيگەن العاشقى ادام. سوندىقتان دا ونى بارلىق عارىشكەرلەر ەرەكشە قۇرمەتتەگەن.

ەسكە سالا كەتسەك، 1969 -جىلعى 20 -شىلدەدە امەريكالىق استروناۆتار نيل ارمسترونگ پەن بازز ولدرين «اپوللون-11» عارىش كەمەسىمەن ايعا ۇشقان بولاتىن. سول ۋاقىتتا ارمسترونگتىڭ عارىش كەمەسىنەن شىعىپ، ەكى ساعاتتان استام ۋاقىت بويى ايدا جۇرگەنىن تىكەلەي ەفيردەن ميلليونداعان ادام تاماشالاعان ەدى.