ەلباسى ت م د- عا مۇشە ەلدەردىڭ ۇكىمەت باسشىلارى كەڭەسىنىڭ مۇشەلەرىمەن كەزدەستى

 استانا. قازاقپارات - قازاقستان پرەزيدەنتى نۇرسۇلتان نازاربايەۆ ت م د- عا مۇشە ەلدەردىڭ ۇكىمەت باسشىلارى كەڭەسىنىڭ مۇشەلەرىمەن كەزدەستى، دەپ حابارلايدى اقوردانىڭ باسپا ءسوز قىزمەتى.

كەزدەسۋگە قازاقستان رەسپۋبليكاسىنىڭ پرەمەر- ءمينيسترى ب. ساعىنتايەۆ، ازەربايجان رەسپۋبليكاسىنىڭ پرەمەر- ءمينيسترى ن. مامەدوۆ، بەلارۋس رەسپۋبليكاسىنىڭ پرەمەر- ءمينيسترى س. رۋماس، قىرعىز رەسپۋبليكاسىنىڭ پرەمەر- ءمينيسترى م. ابىلعازيەۆ، تاجىكستان رەسپۋبليكاسىنىڭ پرەمەر- ءمينيسترى ك. راسۋلزودا، وزبەكستان رەسپۋبليكاسىنىڭ پرەمەر- ءمينيسترى ا. اريپوۆ، رەسەي فەدەراتسياسى ۇكىمەتىنىڭ ءتوراعاسى د. مەدۆەديەۆ، ارمەنيا رەسپۋبليكاسىنىڭ ءبىرىنشى ۆيتسە- پرەمەرى ا. ميرزويان، تۇرىكمەنستاننىڭ مينيسترلەر كابينەتى ءتوراعاسىنىڭ ورىنباسارى گ. مۋرادوۆ، تمد- نىڭ اتقارۋ كوميتەتىنىڭ ءتوراعاسى - اتقارۋشى حاتشى س. لەبەديەۆ قاتىستى.

مەملەكەت باسشىسى ت م د- عا مۇشە ەلدەر دەلەگاتسيالارىنىڭ باسشىلارىنا ءىلتيپات ءبىلدىرىپ، دوستاستىق مەملەكەتتەرىنىڭ ىنتىماقتاستىعىن نىعايتۋ ءۇشىن بۇگىن ءوتىپ جاتقان كەڭەستىڭ ايرىقشا ءمانى بار ەكەنىن اتاپ ءوتتى.

- بۇگىن سىزدەر ۇكىمەت باسشىلارى كەڭەسىنىڭ كەزەكتى وتىرىسىنا قاتىساسىزدار. ونىڭ كۇن تارتىبىندە 15 ناقتى ماسەلە بار. بۇل ءىس- شارا ەلدەرىمىز اراسىنداعى ءوزارا ءتيىمدى قارىم- قاتىناستاردى ودان ءارى دامىتۋعا زور ۇلەس قوسادى دەپ سەنەمىن، - دەدى نۇرسۇلتان نازاربايەۆ.

قازاقستان پرەزيدەنتى ت م د ەلدەرى اراسىنداعى ساۋدا- ەكونوميكالىق بايلانىستاردى دامىتۋدىڭ ماڭىزدىلىعىن ايتتى.

- شيرەك عاسىردان استام ۋاقىت ىشىندە ت م د ىرگەلى ۇيىمعا اينالدى. بۇل بىرلەستىك حالىقتارىمىز اراسىنداعى تاريحي بايلانىستاردى ساقتاپ قالۋعا مۇمكىندىك بەرىپ، ءار ەلدىڭ ەگەمەندىگىن نىعايتۋعا سەپتىگىن تيگىزدى. قازىرگى كەزدە دوستاستىق اياسىنداعى ءوزارا ىقپالداستىقتىڭ ماڭىزدىلىعى ارتا ءتۇستى. ت م د- داعى ساۋدا- ساتتىق كولەمى ءوسىپ كەلەدى. بىلتىر تاۋار اينالىمىنىڭ كولەمى 25 پايىزعا ارتىپ، 164 ميلليارد دوللارعا جەتتى. مۇنداي ءۇردىس بيىل دا جالعاسىن تابۋدا، - دەدى مەملەكەت باسشىسى.

قازاقستان پرەزيدەنتى ت م د مەملەكەتتەر باسشىلارى كەڭەسىنىڭ بيىلعى وتىرىسىنىڭ ناتيجەلەرىنە دە توقتالدى.

- ءبىز ۇيىمىمىزدى نىعايتۋ ماسەلەلەرىن قاراستىردىق. سونىڭ ىشىندە جۇمىستىڭ تيىمدىلىگىن ارتتىرۋعا جانە ونى زامان تالابىنا ساي بەيىمدەۋگە باعىتتالعان جاڭعىرتۋ ۇدەرىسىن ىلگەرىلەتۋگە ءمان بەردىك. دوستاستىق اياسىنداعى ەكونوميكالىق كووپەراتسيانى كەڭەيتۋ ءۇشىن ەكونوميكالىق دامۋ ستراتەگياسىن جانداندىرۋ جانە تمد ەلدەرى كورسەتەتىن قىزمەتتەردىڭ ەركىن ساۋداسى تۋرالى كەلىسىمنىڭ قابىلدانعان جوبالارىن جۇزەگە اسىرۋدى جەدەلدەتۋ قاجەتتىگى ايتىلدى، - دەدى نۇرسۇلتان نازاربايەۆ.

 سونىمەن قاتار، مەملەكەت باسشىسى دۋشانبەدەگى مەملەكەتتەر باسشىلارى كەڭەسىنىڭ وتىرىسىندا جاريا ەتىلگەن جاڭا ۇسىنىستار، سونىڭ ىشىندە تمد اياسىندا ساۋدا كەدەرگىلەرىن جويۋ، كولىك- لوگيستيكا جانە تۋريزم سالالارىنداعى ءوزارا ءىس- قيمىلدىڭ تيىمدىلىگىن ارتتىرۋ، عارىش سالاسىنداعى جوبالاردى جۇزەگە اسىرۋ، تسيفرلىق ەكونوميكانى دامىتۋ جانە يننوۆاتسيالىق شەشىمدەردى پايدالانۋ ماسەلەلەرىن تالقىلاۋ ناتيجەسى جونىندە اڭگىمەلەدى.

- تەحنوپاركتەر ينتەگراتسياسى جانە بىرلەسكەن يننوۆاتسيالىق جوبالاردىڭ جۇزەگە اسىرىلۋى ت م د كەڭىستىگىندە جوعارى تەحنولوگيالىق ءوندىرىس قالىپتاستىرۋ ءۇشىن ۇلكەن سينەرگەتيكالىق پايدا تابۋعا مۇمكىندىك بەرەدى. باتىس ەلدەرى جاساندى ينتەللەكتكە جول اشاتىن 5G فورماتىنداعى ينتەرنەتتى بەلسەندى تۇردە قولدانۋدا. بىزگە ونى دامىتۋ ىسىمەن اينالىسۋ كەرەك. مۇنى ءارقايسىمىز جەكە- جەكە ىسكە اسىرا المايمىز، - دەدى قازاقستان پرەزيدەنتى.

نۇرسۇلتان نازاربايەۆ ءسوزىنىڭ سوڭىندا مەملەكەتتەر باسشىلارىنىڭ كەڭەسىندە ايتىلعان باستامالاردى ىسكە اسىرۋ ءۇشىن ناقتى شارالار كەشەنىن ازىرلەۋ قاجەتتىگىن ايتتى.

- بارلىق باعىت بويىنشا ءتيىمدى شارالار كەشەنىن ازىرلەۋ - ماڭىزدى مىندەت. بۇل باستامالاردىڭ جۇزەگە اسىرىلۋى ەكونوميكانىڭ دامۋىنا سەپتىگىن تيگىزىپ قانا قويمايدى، سونداي- اق مەملەكەتتەرىمىز اراسىنداعى دوستىق ءارى تۇراقتى قارىم- قاتىناستاردى نىعايتۋدىڭ ماڭىزدى فاكتورىنا اينالادى، - دەدى مەملەكەت باسشىسى.

سونىمەن قاتار، كەزدەسۋ بارىسىندا قازاقستان رەسپۋبليكاسىنىڭ پرەمەر- ءمينيسترى ب. ساعىنتايەۆ پەن رەسەي فەدەراتسياسى ۇكىمەتىنىڭ ءتوراعاسى د. مەدۆەديەۆ بايانداما جاسادى.