مالى ۇرلانىپ اشىنعاندار كىنالىلەردى وزدەرى جازالاپ جاتىر - بەكتاس بەكنازاروۆ
پارلامەنت سەناتىندا وتكەن دوڭگەلەك ۇستەل بارىسىندا پارلامەنت سەناتى ءتوراعاسىنىڭ ورىنباسارى بەكتاس بەكنازاروۆ وسىنداي ماسەلە كوتەردى، دەپ حابارلايدى قازاقپارات ءتىلشىسى.
«مال ۇرلىعى بويىنشا قىلمىستىق ىستەردىڭ 90 پايىزى زاڭنامالىق تۇرعىدا اۋىرلىعى ورتاشا قىلمىستاردىڭ ساناتىنا جاتادى. اقىرى، تاراپتار تاتۋلاسادى دا، ايىپكەر جازادان قۇتىلىپ كەتەدى. ستاتيستيكا بويىنشا، قىلمىستىق ىستەردىڭ 25 پايىزى تاراپتاردىڭ تاتۋلاسۋىمەن اياقتالىپ، تەك 14 پايىزى عانا سوتتا قارالادى. ءوزىمىز بىلەتىندەي، ەگەر ادام قىلمىسىنا قاراي لايىقتى جازاسىن الماسا، البەتتە، جازالانبايتىنىن ءبىلىپ، ودان دا اۋىر قىلمىسقا بارۋى مۇمكىن» ، - دەيدى بەكتاس بەكنازاروۆ.
سەنات ءتوراعاسى ورىنباسارىنىڭ ايتۋىنا قاراعاندا، مال ۇرلىعىنا ايىپتىلار تاتۋلاسۋ ارقىلى جازادان قۇتىلىپ كەتەدى.
«اسىرەسە، شەكارالاس اۋداندارداعى جاعداي ۋشىعىپ تۇر. ول جەرلەردە مال تابىنىمەن كورشى ەلدەرگە ايدالىپ كەتۋى مۇمكىن. مال يەلەرى مەن شارۋاشىلىق يەلەرىنىڭ، جەرگىلىكتى ءوزىن- ءوزى باسقارۋ ورگاندارى مەن اۋدان اكىمدىكتەرىنىڭ ەسەپكە تىركەۋ، تابىن شىعارماۋ، قۇجاتقا تىركەمەۋ سەكىلدى قۇقىقتىق بازامەن ساناسپاۋىنىڭ اقىرى امالسىز مال ۇرلىعىنىڭ كوبەيۋىنە اكەلەدى» ، - دەيدى ول.
بەكتاس بەكنازاروۆ ءوز سوزىندە اۋىل تۇرعىندارىمەن ءجيى كەزدەسەتىنىن، ولار كوپ جاعدايدا مال ۇرلىعىنا كوپ شاعىم ايتاتىنىن تىلگە تيەك ەتتى.
«اۋىل تۇرعىندارى اتالمىش ماسەلەدە مەملەكەتتىك ورگانداردىڭ قىزمەتكەرلەرى قاۋقارسىز ەكەنىن، ال مال ۇرلاۋشىلار ەركىندىكتە تايراڭداپ جۇرگەنىن ايتىپ شاعىمدانادى. ءتىپتى زاڭنان كۇدەر ۇزگەن كەيبىرى كىنالىلەردى ۇستاپ الىپ، وزدەرى جازالاپ جاتىر. بۇل زاڭنىڭ السىزدىگىن كورسەتەدى. مەن قازىرگى تاڭدا ماجىلىسمەندەردىڭ ءبىر توبى قىلمىستىق كودەكستىڭ زاڭنامالىق شارالارى بويىنشا جۇمىس جۇرگىزىپ جاتقانىن بىلەمىن. بۇل ماسەلەگە ءبىز دە ارالاسىپ، ونى تەرەڭ تالداۋىمىز كەرەك» ، - دەدى بەكتاس بەكنازاروۆ.
ەسكە سالا كەتسەك، اتالمىش دوڭگەلەك ۇستەلدە ق ر ىشكى ىستەر ءمينيسترىنىڭ ءبىرىنشى ورىنباسارى جانات سۇلەيمەنوۆ ەلىمىزدە جالپى ۇرلىق جاعدايلارى جانە مال ۇرلاۋشىلارمەن كۇرەس قالاي جۇرگىزىلىپ جاتقانىن ايتىپ بەرگەن بولاتىن.