استانادا جاڭا لاتىن گرافيكاسىنداعى تۇڭعىش گازەت تانىستىرىلدى

استانا. قازاقپارات - استانادا لاتىن گرافيكاسىنداعى جاڭا باسىلىم - «ءتىل - قازىنا» رەسپۋبليكالىق اقپاراتتىق تانىمدىق گازەتى تانىستىرىلدى، دەپ حابارلايدى قازاقپارات ءتىلشىسى.

باسىلىمدى ق ر مادەنيەت جانە سپورت مينيسترلىگى شايسۇلتان شاياحمەتوۆ اتىنداعى «ءتىل- قازىنا» ۇلتتىق عىلىمي-پراكتيكالىق ورتالىعى بىرلەسىپ شىعارعان. باس رەداكتورى - قۋات اۋەسباي.

«اراعا 90 جىل سالىپ، قازاقستان لاتىن گرافيكاسىنداعى باسىلىم شىعارۋدى قولعا الدى. بۇل بارشامىز ءۇشىن جاقسى ءۇردىس دەپ ەسەپتەيمىز. ونىڭ قوعام كەڭىستىگىندە دە الاتىن ورنى زور بولماق. بۇل گازەت جاڭالىقتىڭ جارشىسى عانا ەمەس، لاتىن قارپىندە وقىپ بىلۋگە، ساۋاتتى جازۋعا بەيىمدەلۋگە، ۇيرەنۋگە جانە رۋحاني دەمالۋعا مۇمكىندىك بەرەدى»، دەدى - ق ر مادەنيەت جانە سپورت ءمينيسترى ارىستانبەك مۇحامەدي ۇلى ق ر ۇلتتىق اكادەميالىق كىتاپحاناسىندا وتكەن تانىستىرۋ راسىمىندە.

«ءتىل - قازىنا» گازەتى لاتىن نەگىزدى قازاق ءالىپبيىن ءناسيحاتتاپ، جاڭا قازاق ەملەسىنىڭ ەرەجەلەرىن تۇسىندىرۋگە باعىتتالعان. وندا «ءالىپبي»، «رۋحاني جاڭعىرۋ»، «كيە»، «عالام»، «ەملە»، «ساراپ» جانە «تانىم» ايدارلارى ارقىلى جاڭا ءالىپبي تۋرالى اقپارات، تانىمدىق ماتەريالدار جارىق كورەدى.

گازەت A3 فورماتىندا 8 بەتتەن قۇرالعان. باستاپقىدا ايىنا ەكى رەت 3 مىڭ تيراجبەن شىعارۋ جوسپارلانىپ وتىر.

سونىمەن بىرگە، ش. شاياحمەتوۆ اتىنداعى «ءتىل - قازىنا» ۇلتتىق عىلىمي-پراكتيكالىق ورتالىعىنىڭ رەسمي سايتىندا گازەتتىڭ ەلەكتروندى نۇسقاسى جاريالانىپ، ونلاين ازىرلەنەدى.

ەسكە سالا كەتسەك، لاتىن گرافيكاسىنا كوشۋ ۇسىنىسى مەملەكەت باسشىسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان بولاتىن.

2017-جىلدىڭ 27- قازانىندا نۇرسۇلتان نازاربايەۆ قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى جارلىققا قول قويدى.