قازاق جازۋشىلارىنىڭ كىتاپتارى كورەيانىڭ ۇلتتىق كىتاپحانا قورىن تولىقتىرادى

استانا. قازاقپارات - قازاق جازۋشىلارىنىڭ قىرىق تۋىندىسىن ەندى كورەيانىڭ ەڭ ءىرى كىتاپحاناسىندا وقۋعا بولادى.

 


كىتاپتار سەۋلدە وتكەن قازاقستاندىق مادەني فورۋمدا تابىستالدى. شارانى «رۋحاني جاڭعىرۋ» باعدارلاماسى اياسىندا مادەنيەت جانە سپورت مينيسترلىگى ۇيىمداستىرعان.

قازاق اندەرى، سۋرەتتەرى جانە كىتاپتارى سەۋلدە وتكەن مادەني فورۋمدا پاش ەتىلدى. قازاقستاننىڭ وسىنداي اۋقىمدى شىعارماشىلىق توبى كورەياعا العاش رەت كەلىپ وتىر. قاتىسۋشىلاردىڭ ءبىرى - ساياسي عىلىمدارىنىڭ دوكتورى باكىر ابدىجالەل. كورەي ۇلتىنىڭ ۇلكەن دياسپوراسى بار سىر ءوڭىرىنىڭ تۋماسى سەۋلگە ەكى ەل اراسىنداعى قارىم- قاتىناستاردى نىعايتۋعا كەلدى.

 ابدىجالەل باكىر، ساياسي عىلىمدارىنىڭ دوكتورى:

 - ءبىز كورەيدىڭ فيلمدەرىن وتە جاقسى كورەمىز، ويتكەنى ونداعى كوپتەگەن ادەت- عۇرىپتار ءبىزدىڭ قازاعىمىزدا دا بار قازىر. سونى ويلاپ وتىرىپ كەيدە تۇبىمىزدە ءبىر جاقىندىق بار دەپ ويلايمىز. مەنىڭشە، سول جاقىندىق مولايا بەرسە، ەكى حالىق تا ۇتادى.

 قازاقستاننان سەۋلگە قىرىق كىتاپ اكەلىندى. ولار كورەيا ۇلتتىق كىتاپحانا قورىن تولىقتىرادى.

كيم حە رين، كورەيا ۇلتتىق كىتاپحاناسىنىڭ قىزمەتكەرى:

 - بۇل كىتاپتار قازاق ءبولىمىن اشۋعا مۇمكىندىك بەرەدى. قازىر بىزدە وسىنداي جەتى شەتەل سەكسيالارىمىز بار. شىعارمالار كورەي تىلىنە اۋدارىلسا، وندا قازاق مادەنيەتىمەن ودان دا تەز تانىسۋعا بولادى.

 جيىنعا قاتىسۋشى كورەيالىقتار قازاقستاندىق كىتاپتار جانە سۋرەتتەرمەن تانىسۋىمەن قاتار تۋىندى اۆتورلارىمەن دە جۇزدەسۋگە مۇمكىندىك الدى. كورەيانىڭ ەڭ ءىرى كىتاپحاناسىنا سىيعا تارتىلعان شىعارمالارىنىڭ ىشىندە الدان سمايىلدىڭ، نەسىپبەك ايت ۇلىنىڭ جانە زينايدا چۋماكوۆانىڭ تۋىندىلارى بار. فورۋمدا جازۋشىلار قازاق ادەبيەتىن كورەي تىلىنە اۋدارۋ ماسەلەسىن كوتەردى.

كيم حي چۋل، حانيان ۋنيۆەرسيتەتىنىڭ پروفەسسورى:

- كورەيالىقتاردىڭ قازاق كىتاپتارى مەن فيلمدەرىنە قىزىعۋشىلىعى زور. ءبىراق تاماشا قازاق شىعارمالارى كورەي تىلىنە ءالى اۋدارىلماعان. قازاقستان ۇكىمەتى وسى ماسەلەنى شەشۋگە كومەكتەسسە، العىسىمىز شەكسىز بولار ەدى. كورەيا كىتاپحانالارىندا كورەي جازۋلارى بار تارتىمدى قازاق فيلمدەر بولسا دەپ ارماندايمىز.

قازاقستان دەلەگاتسياسىنىڭ باسشىسى، بەلگىلى قوعام قايراتكەرى الدان سمايىل كورەياعا العاش رەت ات باسىن بۇرعان. ءبىراق جازۋشى تاڭعى سامال ەلىنە تاعى دا كەلۋگە نيەت ءبىلدىرىپ وتىر. ءتىپتى بەلگىلى كورەي تۋىندىنى قازاق تىلىنە اۋدارۋعا جانە كورەيا تۋرالى كىتاپتى جازۋعا دايىن.

الدان سمايىل، جازۋشى، ق ر مەملەكەتتىك سىيلىعىنىڭ لاۋرەاتى:

 - مەن قازاق جازۋشى رەتىندە قازاقستاندى جازۋمەن شەكتەلمەۋىم كەرەك. مەن ەگەر وسى ەلدى بىلسەم، كورەيا ەلىنە ءبىر شىعارمامدى ارنار ەدىم. ەگەر ءبىز وسىلاي ءبىر- ءبىرىمىزدى جازىپ، اقپارات الماساتىن بولساق، ءتىپتى جاقسى بولار ەدى. كورەيا جازۋشى مەنىڭ حالقىم تۋرالى جازىپ جاتسا، مەن كورەيا حالىق تۋرالى جازىپ جاتسام قانداي تاماشا.

كورەيانى جاقسى تانۋ ءۇشىن قازاقستاندىقتار سەۋلدىڭ كورىكتى جەرلەرىن ارالادى. ال كورەيالىق ارىپتەستەرىن ەلىمىزگە كەلۋگە شاقىرعان.

www.24.kz