الەم ەلدەرى قارتتار مەن جەتىمدەر ءۇيىن بىرىكتىرە باستادى
پورتالدىڭ جازۋىنشا، قازىر الەمنىڭ ءبىرقاتار ەلىندە قارتتار مەن جەتىمدەر ءۇيىن بىرىكتىرۋ قارقىندى دامىپ كەلەدى. مىسالى، ۇلى بريتانيادا وسىنداي ورتالىقتىڭ اشىلعانىنا 1 جىلداي بولعان. بالالار مەن ەرەسەكتەر ءبىر ۇيدە قالاي تۇرىپ جاتىر، بۇل ءادىستىڭ ارتىقشىلىعى نەدە؟
Nightingale House ورتالىعى لوندون قالاسىندا ورنالاسقان. بۇل - ۇلى بريتانياداعى قاراۋسىز قالعان قارتتار مەن جەتىم بالالار تۇراتىن ەڭ العاشقى ورىن. مۇندا ولار كۇن سايىن بىرگە ۋاقىت وتكىزىپ، اڭگىمەلەسەدى.
ءتۇرلى بۋىن وكىلدەرىن ءبىر عيماراتتا باعىپ-قاعۋ يدەياسى 1976-جىلى توكيو قالاسىندا پايدا بولدى. ال العاش بولىپ بۇل تاجىريبەنى ا ق ش ەنگىزدى.
«مۇنداي ءادىستىڭ پايداسى كول-كوسىر»، - دەيدى سالا ماماندارى.
زەرتتەۋ ناتيجەسى كورسەتكەندەي، مۇنداي قارىم-قاتىناس ەگدە جاستاعىلاردىڭ دەنساۋلىعىنا وڭ اسەر ەتەدى. ايتۋلارىنشا، كۇن سايىن كىشكەنتاي بۇلدىرشىندەرمەن سويلەسكەن قاريانىڭ كوڭىل-كۇيى جاقسارىپ، جالعىزدىق سەزىمى ۇمتىلىپ، قان قىسىمى رەتتەلەدى. ولار بىرگە مۋزىكا، ءبي، سۋرەت سالۋمەن اينالىسىپ، اڭگىمە-دۇكەن قۇرىپ، تاماق دايىندايدى. وسىلايشا مەيىرىمگە ءزارۋ بالالار ماحابباتقا بولەنىپ، ال ۇلكەندەر ونەگەسىن ولارعا ميراس ەتەدى.
«بالالار كەلمەس بۇرىن بۇل جەر مازارعا ۇقسايتىن. ولار ءبىزدى ەنەرگياسىمەن قۋاتتاپ، ومىرگە دەگەن قۇلشىنىستى وياتادى. جاسارىپ قالامىز. ءوزىمنىڭ بالام جوق. ايتايىن دەگەنىم: بۇل تاجىريبە ماعان قاتتى ۇنادى»، - دەيدى قارتتار ءۇيىنىڭ تۇرعىنى فەي گارسيا.
مۇنداي ورتالىقتار بىرنەشە جىل بۇرىن العاش رەت ا ق ش- تا اشىلدى. قازىر قۇراما شتاتتاردا وسىنداي جۇزدەگەن مەكەمە بار. بۇل تاجىريبە كورشىلەس كانادا مەن اسپان استى ەلىندە بىرتىندەپ ەنگىزىلىپ جاتىر. ال سينگاپۋر ۇكىمەتى الداعى جىلدارى وسىنداي 10 مەكەمە اشۋدى جوسپارلاپ وتىر.
