قازاقستان پرەزيدەنتى رەسەي فەدەراتسياسى ۇكىمەتىنىڭ ءتوراعاسىمەن كەزدەستى
كەزدەسۋ بارىسىندا تاراپتار ەكى مەملەكەت اراسىنداعى ىنتىماقتاستىقتىڭ نەگىزگى اسپەكتىلەرىن تالقىلادى.
مەملەكەت باسشىسى قازاقستان مەن رەسەي اراسىندا ءوزارا سەنىمگە نەگىزدەلگەن جانە قارقىندى دامىپ كەلە جاتقان ىقپالداستىقتىڭ ستراتەگيالىق سيپاتىن اتاپ ءوتتى.
«جاقىندا پرەزيدەنت ۆلاديمير پۋتينمەن كەزدەستىم. قازاقستان مەن رەسەي اراسىنداعى بايلانىستار ۇلگى ەتۋگە تۇرارلىق. بىزگە وسى قارىم- قاتىناستى ساقتاۋ قاجەت»، - دەدى نۇرسۇلتان نازاربايەۆ.
سونىمەن قاتار، قازاقستان پرەزيدەنتى ەۋرازيا ەكونوميكالىق وداعى، ۇجىمدىق قاۋىپسىزدىك شارتى ۇيىمى جانە تمد سياقتى حالىقارالىق ۇيىمداردىڭ اياسىندا ەكى ەلدىڭ ءوزارا ىنتىماقتاستىعىن نىعايتۋ ماسەلەلەرىنە توقتالدى.
مەملەكەت باسشىسى قازاقستان مەن رەسەي ۇكىمەتتەرىنىڭ ساۋدا- ەكونوميكالىق قارىم- قاتىناستاردى جانە ءوڭىرارالىق بايلانىستاردى نىعايتۋ ىسىندە ماڭىزدى ءرول اتقاراتىنىن اتاپ ءوتىپ، ەكى جاقتى ىنتىماقتاستىقتى دامىتۋعا قوسقان ۇلەسى ءۇشىن د. مەدۆەدەۆكە ريزاشىلىق ءبىلدىردى.
رەسەي فەدەراتسياسى ۇكىمەتىنىڭ ءتوراعاسى ەكى مەملەكەت اراسىنداعى ءوزارا ءتيىمدى قارىم- قاتىناستاردىڭ ناتيجەسىندە قازاقستان مەن رەسەي اراسىنداعى ساۋدا كولەمى ارتقانىن ايتتى.
«قازاقستان - رەسەيدىڭ ستراتەگيالىق سەرىكتەسى ءارى وداقتاسى. ءبىزدىڭ قارىم- قاتىناسىمىز اۋقىمدىلىعىمەن جانە تەرەڭدىگىمەن ەرەكشەلەنەدى. جوعارى دەڭگەيدە وتكىزىلەتىن كوپتەگەن كەزدەسۋلەر، سونداي-اق ۇكىمەتتەرىمىز بەن بيزنەس قوعامداستىقتارىمىز اراسىنداعى جاقسى قارىم- قاتىناستار - سونىڭ دالەلى. ءبىز جىل بويى ءتۇرلى باسقوسۋلاردا ءجيى جۇزدەسەمىز. بۇل - قۋانتارلىق ءجايت. مۇنداي قاتىناستارسىز تولىققاندى ءوزارا ىقپالداستىق ورناتۋ مۇمكىن ەمەس»، - دەدى د. مەدۆەدەۆ.
