قازاقستان ەكونوميكاسىنىڭ مۇنايعا تاۋەلدىلىك دەڭگەيى تومەندەدى - تيمۋر سۇلەيمەنوۆ
«ەكونوميكانى ءارتاراپتاندىرۋعا بايلانىستى سوڭعى 5 جىلدا اۋقىمدى جۇمىستار ىسكە اسىرىلدى. بۇل تۇرعىدا ستاتيستيكاعا سۇيەنسەك تىكەلەي ناتيجەنى بايقاۋعا بولادى. ياعني ول جالپى ىشكى ءونىم قۇرىلىمىندا ءوندىرۋ ونەركاسىبى سالاسى ۇلەسىنىڭ تومەندەۋىنە قاتىستى. بەس جىلدا ونىڭ دەڭگەيى 19,5-20 پايىزعا جەتتى. ەگەر دە مۇناي ءوندىرۋ مەن قاتتى پايدالى قازبالاردى وندىرۋگە توقتالساق، بۇگىندە ونىڭ ۇلەسى 11,5-12 پايىزدى قۇرادى. اتاپ ايتقاندا، ونىڭ دەڭگەيى مەن وسى سالالارداعى وزگەرىستەرگە قاتىستى ءبىزدىڭ ەكونوميكانىڭ تاۋەلدىلىگى تومەندەدى. اسىرەسە مۇناي مەن مەتال باعاسىنا تاۋەلدىلىك ازايدى»، - دەدى تيمۋر سۇلەيمەنوۆ پارلامەنت ءماجىلىسىنىڭ جالپى وتىرىسىندا.
ءمينيستردىڭ اتاپ وتۋىنشە، وڭدەۋشى ونەركاسىپتىڭ ۇلەسى دە 11,5-12 پايىز ارالىعىندا اۋىتقىپ تۇرۋىنا قاتىستى ءتيىستى ماسەلەلەر بار.
«دەگەنمەن دە ءبىز كوپتەگەن وزگە دە ەكونوميكالار سەكىلدى سەرۆيستىك ەكونوميكانىڭ وسىمىنە سەنىپ وتىرمىز. وسى كەزەڭدە بىزدە سەرۆيستىك ەكونوميكا 5 پايىزعا ارتتى. بۇل تۇرعىدا كولىك جانە لوگيستيكا سالاسىندا ەلەۋلى ءوسىمدى بايقادىق. ەگەر دە بۇعان دەيىن ەكونوميكانىڭ قۇرىلىمىندا ونىڭ دەڭگەيى 6 پايىز بولسا، قازىرگى كەزدە 9 پايىزعا جەتىپ قالدى»، - دەدى تيمۋر سۇيلەيمەنوۆ.
ق ر قارجى ءمينيسترى ءاليحان سمايىلوۆتىڭ اتاپ وتۋىنشە، ۇلتتىق قوردان بەرىلەتىن كەپىلدەندىرىلگەن ترانسفەرت پەن مۇنايعا ەكسپورتتىق كەدەن باجى (ە ك ب) تۇرىندەگى بيۋجەتكە تۇسەتىن مۇناي تۇسىمدەرىنىڭ كولەمى 2019-جىلى 3,5 تريلليون تەڭگەگە نەمەسە 2021-جىلعا قاراي 4,1 پايىزعا تومەندەپ، جالپى ىشكى ءونىمنىڭ 5,4 پايىزىن قۇرايدى. بيۋجەتكە تۇسەتىن مۇناي تۇسىمدەرىنىڭ ۇلەسى 2019-جىلى 35,5 پايىزدان 2021-جىلى 28,9 پايىزعا دەيىن تومەندەيدى.
بۇدان بۇرىن حابارلانعانداي، پارلامەنت ءماجىلىسىنىڭ جالپى وتىرىسىندا ق ر ۇلتتىق ەكونوميكا ءمينيسترى تيمۋر سۇلەيمەنوۆ ەلىمىزدىڭ 2019-2023-جىلدارعا ارنالعان الەۋمەتتىك-ەكونوميكالىق دامۋ بولجامىن تانىستىردى.