قازاقستان مەكتەپتەرىندە اسكەري-پاتريوتتىق سىنىپتار اشىلادى

استانا. قازاقپارات - قازاقستان مەكتەپتەرىندە «جاس سارباز» اسكەري مامانداندىرىلعان سىنىپتارى اشىلادى، دەپ حابارلايدى قازاقپارات ءتىلشىسى.

بۇل تۋرالى ق ر قارۋلى كۇشتەرىنىڭ باس شتابى باستىعىنىڭ ورىنباسارى، «جاس سارباز» رەسپۋبليكالىق بالالار مەن جاس وسپىرىمدەر قوزعالىسىنىڭ ءتوراعاسى، گەنەرال-مايور مۇحامەدجان تالاسوۆ ورتالىق كوممۋنيكاتسيالار قىزمەتىندە مالىمدەدى.

م. تالاسوۆ مەملەكەت باسشىسىنىڭ بيىلعى جولداۋىندا حالىقتىڭ ءال-اۋقاتىن جاقسارتۋمەن قاتار، مەكتەپتەردەگى اسكەري-پاتريوتتىق تاربيەنىڭ ءرولىن كۇشەيتۋدى تاپسىرعانىن اتاپ ءوتتى.

«جاستارعا اسكەري-پاتريوتتىق تاربيە بەرۋدە ءبىرقاتار قيىندىقتار كەزدەسەدى. ەڭ الدىمەن، تۇراقتى قارجىلاندىرۋ كوزى مەن جەتكىلىكتى قۇقىقتىق جانە وقۋ-ماتەريالدىق بازانىڭ بولماۋى وزەكتى. (...) مەكتەپتەر جانىنان قۇرىلعان اسكەري-پاتريوتتىق ۇيىمدار، سىنىپتار، سەكسيالار مەن ۇيىرمەلەر سىندى جاستار ۇيىمدارى ءبىر جۇيەگە توعىسپاعان»، - دەپ ءتۇسىندىردى ول.

م. تالاسوۆ 2016-جىلى «جاس سارباز» اسكەري پاتريوتتىق قوزعالىسى قۇرىلعانىن ەسكە سالدى. ونىڭ قۇرامىنا مەملەكەتتىك ورگان وكىلدەرى، «نۇر وتان» پارتياسىنىڭ «جاس وتان» جاستار قاناتى، قوعامدىق جانە جاستار ۇيىمدارىنىڭ وكىلدەرى بار.

«مەملەكەت باسشىسىنىڭ بيىلعى جولداۋى اياسىندا جاستارعا اسكەري-پاتريوتتىق تاربيە بەرۋ جۇمىستارىن جەتىلدىرۋ ءۇشىن «جاس سارباز» قوزعالىسىنىڭ وڭىرلىك شتابتارىن قۇرۋدى، ءوڭىر اكىمدەرىنىڭ جەتەكشىلىگىمەن قوزعالىستى دامىتۋ بويىشا ۇيلەستىرۋ كەڭەستەرىن قۇرۋدى جوسپارلاپ وتىرمىز. ق ر ءبىلىم جانە عىلىم مينيسترلىگىمەن جانە جەرگىلىكتى اتقارۋ ورگاندارىمەن بىرلەسىپ، ەلىمىزدىڭ ءار مەكتەبىندە اسكەري-پاتريوتتىق كلۋبتار مەن 5-11- سىنىپ وقۋشىلارى ءۇشىن اسكەري مامانداندىرىلعان سىنىپتار اشۋ دا كوزدەلگەن»، - دەپ اتاپ ءوتتى م. تالاسوۆ.

ونىڭ ايتۋىنشا، مۇنداي سىنىپتاردىڭ قۇرىلۋى ءتارتىپ پەن وقۋ ۇلگەرىمىن ارتتىرۋعا، وقۋشىلاردىڭ بەلسەندى ازاماتتىق پوزيتسياسىن قالىپتاستىرۋعا، مۇمكىندىك بەرەدى. الداعى ۋاقىتتا مامانداندىرىلعان سىنىپتار مەن كلۋب تاربيەلەنۋشىلەرى ءبىرىڭعاي فورمامەن قامتاماسىز ەتىلەدى.