وڭتۇستىكتەن سولتۇستىككە قونىس اۋدارۋشىلاردى ۇيمەن قامتۋ مەحانيزمى قالاي ىسكە اسىرىلادى

استانا. قازاقپارات - ەلىمىزدىڭ وڭتۇستىك وڭىرلەرىنەن سولتۇستىك ايماقتارىنا قونىس اۋدارۋشىلارعا تۇرعىن ءۇي سالۋ جانە ساتىپ الۋ مەحانيزمى قالاي ىسكە اسىرىلادى؟

بۇل سۇراققا ەڭبەك جانە حالىقتى الەۋمەتتىك قورعاۋ مينيسترلىگى حالىقتى جۇمىسپەن قامتۋ جانە ەڭبەك نارىعىن دامىتۋ دەپارتامەنتىنىڭ ديرەكتورى جەڭىسبەك دۋلاتوۆ جاۋاپ بەردى، دەپ حابارلايدى قازاقپارات ءتىلشىسى.

ايتا كەتسەك، بۇگىنگى ۇكىمەت وتىرىسىندا ق ر ەڭبەك جانە حالىقتىق الەۋمەتتىك قورعاۋ ءمينيسترى ءمادينا ءابىلقاسىموۆا جۋىق ارادا ەلدىڭ وڭتۇستىك وڭىرلەرىنەن سولتۇستىك ايماقتارىنا قونىس اۋدارۋشىلارعا تۇرعىن ءۇي سالۋ جانە ساتىپ الۋ مەحانيزمى ىسكە قوسىلاتىنىن جاريا ەتكەن ەدى. ءمينيستردىڭ ايتۋىنشا، بۇل جوسپاردى ورىنداۋ ءۇشىن 2019-2021-جىلدارى بيۋجەتتەن 15 ميلليارد تەڭگە بولىنبەك. وسىلايشا، الداعى ەكى جىلدا وڭتۇستىكتەن سولتۇستىككە قونىس اۋدارعان 3 مىڭ ادام باسپانامەن قامتىلماق.

ۇكىمەت وتىرىسىنان كەيىن باسپا ءسوز ورتالىعىندا تىلشىلەردىڭ سۇراعىنا جاۋاپ بەرگەن ەڭبەك جانە حالىقتى الەۋمەتتىك قورعاۋ مينيسترلىگى حالىقتى جۇمىسپەن قامتۋ جانە ەڭبەك نارىعىن دامىتۋ دەپارتامەنتىنىڭ ديرەكتورى جەڭىسبەك دۋلاتوۆ اتالمىش مەحانيزم قالاي ىسكە اسىرىلاتىنىن ايتىپ بەردى.

«باعدارلاما بويىنشا بيىل مىڭ جارىم وتباسى سولتۇستىككە كوشكەن. ءبىز وسى باعدارلامادا جاڭا ادىستەردى قاراستىرىپ جاتىرمىز. بىرىنشىدەن، سولتۇستىككە قونىس اۋدارعان ادامداردىڭ ەڭ الدىمەن ءۇي ماسەلەسىن شەشۋدى كوزدەدىك. باسپانا ماسەلەسى شەشىلمەسە، البەتتە، قونىس اۋدارۋشىلاردىڭ قىزىعۋشىلىعىن تۋدىرۋ قيىنعا تۇسەرى انىق. مىنە، سول ءۇشىن كەلەسى جىلدان باستاپ ءار وتباسىعا جەكە ءۇي سالىنادى. سول ۇيدە قونىس اۋدارۋشىلار بەس جىل تۇرسا، بەس جىلدان كەيىن ولار سول ءۇيدى ءوز اتىنا اۋدارىپ الا الادى. ياعني، كەيىن اي سايىن ءبىزدىڭ ەسەپ بويىنشا 20-25 مىڭ تەڭگە تولەپ تۇرسا، قارىزدارىن تولەپ بولعاننان كەيىن ءۇي تولىعىمەن سول كىسىلەردىڭ اتىنا اۋدارىلادى»، - دەدى جەڭىسبەك دۋلاتوۆ.