ۇكىمەت باسشىسى حالىقتى جۇمىسپەن قامتۋ جۇمىستارىنا مونيتورينگ جۇرگىزۋدى تاپسىردى

استانا. قازاقپارات - ق ر ۇكىمەت باسشىسى باقىتجان ساعىنتايەۆ جاۋاپتى ۆەدومستۆولارعا حالىقتى جۇمىسپەن قامتۋ جۇمىستارىنا مونيتورينگ جۇرگىزۋدى جۇكتەدى، دەپ حابارلايدى قازاقپارات ءتىلشىسى.

«جالپى، باعدارلامانىڭ (ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021-جىلدارعا ارنالعان مەملەكەتتىك باعدارلاماسى) جوسپارلى كورسەتكىشتەرى جامان ەمەس. جىلدىڭ سوڭىنا دەيىن ءالى ەكى اي بار. قۇرمەتتى اكىمدەر، وزدەرىڭىزدىڭ باياندامالارىڭىزدا ايتىپ وتىرعانداي، وڭىرلەردە جۇمىستى ارى قاراي جىلدامداتىپ، جىلدىڭ سوڭىندا جوسپارلانعان كورسەتكىشتىڭ بارىنە قول جەتكىزۋىمىز قاجەت»، - دەدى باقىتجان ساعىنتايەۆ بۇگىنگى ۇكىمەت وتىرىسىندا.

ۇكىمەت باسشىسى بۇدان باسقا ەڭبەك جانە حالىقتى الەۋمەتتىك قورعاۋ مينيسترلىگى، ۇ ە م، ا ش م- مەن بىرلەسىپ، نىسانالى توپتاردى، اتاپ ايتقاندا جۇمىسسىزدار مەن ءوزىن-ءوزى جۇمىسپەن قامتىپ وتىرعان ادامداردىڭ تابىسىن ارتتىرۋ ءۇشىن ناتيجەلى جۇمىسپەن قامتۋعا تارتۋ بويىنشا قابىلداپ جاتقان شارالاردىڭ اسەرىنە مونيتورينگ جۇرگىزۋ جۇيەسىن جولعا قويۋ كەرەكتىگىن ەسكەرتتى.

«سول سەبەپتەن ءمادينا ەراسىل قىزى، «اتامەكەن» پالاتاسىمەن جانە وڭىرلەرمەن بىرگە «باستاۋ-بيزنەس» جوباسى بويىنشا وقۋىن اياقتاعان ادامدارعا ميكرونەسيە بەرۋ بويىنشا ماسەلەنى تولىق شەشۋىمىز قاجەت. ءبىر جىل بويى ول جاعىن ايتىپ كەلە جاتىرمىز. كەلەسى جىلى ءبىر باعىتقا كوشۋىمىز قاجەت»، - دەدى ۇكىمەت باسشىسى.

پرەمەر-مينيستر سونداي-اق وقىعانداردىڭ 33 پايىزىن جۇمىسپەن قامتىلۋ كورسەتكىشى تومەن ەكەنىن ايتىپ ءوتتى.

«بۇل باسا نازار اۋداراتىن ماسەلە. وڭىرلەردىڭ وزىندىك جوباسى بار. بۇل ءبىزدىڭ جوبا مەن ەكى ارادا ءبىراز اربيتراج بولىپ تۇر. سول سەبەپتەن الداعى ۋاقىتتا وسىنداي جاعدايلار بولماۋ ءۇشىن قاراۋ كەرەك. ەگەر وڭىرلىك باعدارلاما كەيبىر جاعدايلارى بويىنشا، مىسالى نەسيەنى پروتسەنتپەن بەرۋى جەڭىلدەتىلىپ، سۇرانىستىڭ ءبارى وسى باعدارلاماعا كەلەتىن بولسا، وندا سول وڭىرلەرگە قارجىنىڭ ءبولىنۋى باسقاشا شەشىلۋى كەرەك. ونى قوسىمشا تاعى تالقىعا سالۋعا ءتيىسپىز. كەلەسى جىلى مۇنداي اربيتراج بولۋى دۇرىس ەمەس»، - دەدى پرەمەر-مينيستر.

ۇكىمەت باسشىسى وزەكتەندىرىلگەن باعدارلامانىڭ تيىمدىلىگى تۇرعىنداردىڭ تابىسىنىڭ وسۋىنە قاراي دا باعالانۋى ءتيىس ەكەنىن ءمالىم ەتتى.

«ەڭبەك جانە ناتيجەلى جۇمىسپەن قامتۋدىڭ جانە جاپپاي كاسىپكەرلىكتەردى دامىتۋدىڭ مەملەكەتتىك باعدارلاماسىنىڭ جوباسىن، وعان ەنگىزىلگەن وزگەرىستەردى ەسكەرە وتىرىپ، ماقۇلداۋعا بولادى. ەلباسىمەن كەزىككەننەن مەملەكەتتىك باعدارلامانىڭ جوباسى ۇكىمەت مۇشەلەرىنىڭ داۋىس بەرۋىنە ەنگىزىلەتىن بولسىن. ەربولات اسقاربەك ۇلى (دوسايەۆ)، بۇل شارۋا ءسىزدىڭ باقىلاۋىڭىزدا»، - دەدى ۇكىمەت باسشىسى.

ەسكە سالا كەتسەك، بۇعان دەيىن ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021-جىلدارعا ارنالعان مەملەكەتتىك باعدارلاماسى قالاي جۇزەگە اسىرىلىپ جاتقانىن بايانداعان ەدى.