توقمادي بانكير تاتىشەۆتىڭ ولىمىنەن كەيىن اياق-استى بايىعان - تارازداعى سوت

تاراز. قازاقپارات - تارازدا مۇحتار ءابىليازوۆقا قاتىستى قىلمىستىق ءىس بويىنشا ءوتىپ جاتقان سوت وتىرىسىندا ەرجان تاتىشەۆتى ولتىرگەن ادامنىڭ تۇرمىس-تىرشىلىگى مەن ونىڭ پسيحولوگيالىق پورترەتى تۋرالى ايتىلدى، دەپ حابارلايدى قازاقپارات ءتىلشىسى.

ەسكە سالا كەتەيىك، قىلمىستىق ءىس بويىنشا باستى سوت تالقىلاۋى جامبىل وبلىستىق قىلمىستىق ىستەر جونىندەگى مامانداندىرىلعان ءوڭىرارالىق سوتىندا سۋديا كەنجەعالي كەنجەبەكوۆتىڭ توراعالىعىمەن ءوتىپ جاتىر.

مەملەكەتتىك ايىپتاۋشىلار: پروكۋرورلار - اسحان نۇرلىبايەۆ جانە ءىلياس يسقاليەۆ. كۋاگەرلەر رەتىندە بارلىعى 100 دەن استام ادام وتۋدە. ءىستىڭ كولەمى - 15 توم. مۇحتار ءابىليازوۆ قازاقستان رەسپۋبليكاسىنىڭ قىلمىستىق كودەكسىنىڭ (1997-جىلعى رەداكسياسىندا) 28-بابىنىڭ 3-بولىگىندە، 96-بابىنىڭ 2-بولىگىنىڭ «ج» «ز» تارماقشالارىندا (ادام ءولتىرۋدى ۇيىمداستىرۋ، ادامدى جالداۋمەن پارا-پار، پايداكۇنەمدىك ماقساتتا الدىن الا ءسوز بايلاسۋ ارقىلى ءبىر توپ اداممەن وزگە ادامدى قاساقانا ءولتىرۋ) كورسەتىلگەن قىلمىستىق قۇقىق بۇزۋشىلىقتى جاسادى دەگەن ايىپ تاعىلىپ وتىر.

سوتتا كۋاگەر رەتىندە سويلەگەن «تەنگري ينۆەست» كومپانيالار توبىنىڭ پرەزيدەنتى، جامبىل وبلىسىنىڭ تۋماسى ەرلان اتامقۇلوۆ ەرجان تاتىشەۆتى ولتىرگەنى ءۇشىن سوتتالعان مۇراتحان توقماديمەن تانىستىعى تۋرالى ايتتى.

«1993-جىلى «راحات» بىرلەسكەن كاسىپورنىنىڭ ديرەكتورى بولعان كەزىمدە «راحات-پالاس» قوناق ءۇي كەشەنىنىڭ قۇرىلىسىمەن اينالىستىم. شامامەن سول كەزدەرى م. توقمادي مەنىڭ ورىنباسارىم ەتىپ تاعايىندالدى. ونىڭ مىندەتى قۇرىلىستاعى ءتارتىپتى ساقتاۋ بولاتىن. ونىمەن تەك قىزمەت بابىمەن ارالاستىق. ونىمەن بىرگە بىرنەشە رەت اڭعا شىققانمىن، سوڭعى رەت 1999-جىلى. ءبىراق ودان باسقا ونىمەن بىرگە ۋاقىت وتكىزگەن ەمەسپىن»، - دەدى ول.

ەرلان اتامقۇلوۆتىڭ ايتۋىنشا، سول كەزدە توقماديدىڭ قارجىلىق جاعدايى ءماز ەمەس-ءتىن. «ماعان بەلگىلىسى، ونىڭ ءۇيى بار ەدى، ودان بولەك ءىرى اكتيۆتەرى بولعان جوق. ءبىراق 2004-جىلى اڭشىلىق كەزىندەگى وقيعادان كەيىن مۇراتحاننىڭ ماتەريالدىق جاعدايى بىردەن كوتەرىلگەنى تاڭعالدىردى»، - دەدى بيزنەسمەن.

بۇدان ءارى ە. اتامقۇلوۆ توقماديمەن بارلىق بايلانىسىن ۇزگەن وقيعا تۋرالى ايتىپ بەردى.

«1999-جىلى شۋدىڭ جاعاسىنا اڭعا شىقتىق. سول كەزدە بولعان وقيعادان كەيىن ونىمەن ارتىق بايلانىسۋ قاجەت ەمەستىگىن ءتۇسىندىم. قورىقشى ەكەۋىمىز قاردا جۇرەتىن ماشينامەن بىرگە مۇزعا باتىپ كەتتىك. سول ماڭداعى بالىقشىلار بىزگە كومەككە جۇگىرىپ كەلدى. ءبىراق ول جەردەن ءوزىمىز شىعا الدىق. مۇراتحان ءبىزدىڭ باتقانىمىزدى ءجۇز مەتر ارىدا تاماشالاپ تۇرعانىن كوردىم. بىزگە ءبىر ەلى جاقىندامادى، كەرىسىنشە، ارى قاراي ءجۇرىپ كەتتى. اۋىلعا جەتكەن سوڭ، توقماديگە بۇدان بىلاي ودان ىرگەمدى اۋلاق سالاتىنىمدى ايتتىم»، - دەدى ول.

ودان كەيىن دە توقمادي ەرلان اتامقۇلوۆتىڭ قابىلداۋىنا كىرمەك بولعان، ءتۇرلى شارالاردا اڭگىمە قۇرۋعا نيەتتەنگەن. ءبىراق اتامقۇلوۆ ودان بويىن اۋلاق ۇستاعان. «بۇل رەتتە، وعان دەگەن جەككورۋشىلىك سەزىمىم جوق. 2002-جىلدان بەرى توقماديدى بىرنەشە رەت قانا كوردىم. مۇراتحان مەنىمەن بايلانىس ورناتۋعا ۇمتىلدى»، - دەدى كۋاگەر.

ونىڭ سوزىنشە، ەرجان تاتىشەۆ ولتىرىلگەننەن ءبىر كۇن بۇرىن توقمادي اتامقۇلوۆقا بىرنەشە مارتە قوڭىراۋ شالىپ، ونى اڭعا شاقىرعان. اتامقۇلوۆ ۇسىنىستان باس تارتقان.

ەرجان تاتىشەۆپەن بايلانىسى تۋرالى ايتقان كۋاگەر، ارالارىندا تەك ىسكەرلىك قارىم-قاتىناس بولعانىن جەتكىزدى.

سونداي-اق ول توقمادي ەرجان تاتىشەۆپەن بايلانىستا بولعانىنا تاڭداناتىنىن ايتتى. «ولاردىڭ اراسىندا ورتاق ەشتەڭە بولمايتىن. تانىستارىمنان ولار بىرگە اڭعا شىعاتىنىن ەستىگەنمىن. ءبىراق تاتىشەۆ پەن توقماديدىڭ قارىم-قاتىناسىنىڭ انىق-قانىعىن بىلمەيمىن»، - دەدى.

ەسكە سالا كەتەيىك، ۇستىمىزدەگى جىلدىڭ اقپان ايىندا جامبىل وبلىسى قىلمىستىق ىستەر جونىندەگى مامانداندىرىلعان ءوڭىرارالىق سوتى بيزنەسمەن، بۇرىن ۇيىمداسقان قىلمىستىق توپ باسشىسى بولعان، 2004-جىلى بانكير ەرجان تاتىشەۆتى ءولتىردى دەپ ايىپتالعان مۇراتحان توقماديدى 10 جىل 6 ايعا باس بوستاندىعىنان ايىرعان بولاتىن. سوتتا مۇراتحان توقمادي جاقىندارى ءۇشىن الاڭداعانىن، وعان قوقان-لوققى كورسەتىلىپ، وتباسى بۇل قىسىمنان قورىققاندىعىن، سونداي-اق مۇحتار ابىليازوۆتەن ەرجان تاتىشەۆتى ءولتىرۋ ءۇشىن ەكى ترانشپەن 4 ميلليون دوللار كولەمىندە سىياقى العانىن مويىنداعان.