ەندى «رۋحاني جاڭعىرۋ» جاڭا مازمۇن، جاڭا باعىتپەن تولىعا تۇسەدى
ق ر پرەزيدەنتى اكىمشىلىگىنىڭ باسشىسى اسەت يسەكەشەۆتىڭ توراعالىعىمەن وتكەن جيىن نەگىزىنەن «رۋحاني جاڭعىرۋ» باعدارلاماسىن ىسكە اسىرۋدىڭ جانە باعدارلامانى باسقارۋ كەڭسەسىنىڭ قىزمەتىن ۇيىمداستىرۋدىڭ ناتيجەلەرىن تالقىلاۋعا ارنالعان بولاتىن.
جيىندى اشقان اسەت يسەكەشەۆ «رۋحاني جاڭعىرۋ» باعدارلاماسىنىڭ جاقىندا جاريالانعان مەملەكەت باسشىسىنىڭ «قازاقستاندىقتاردىڭ ءال- اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنىڭ نەگىزگى باعىتتارىن ىسكە اسىرۋ اياسىندا ەرەكشە ماڭىزدى ەكەنىنە توقتالدى. سوندىقتان دا، پرەزيدەنتى اكىمشىلىگىنىڭ باسشىسى «رۋحاني جاڭعىرۋ» باعدارلاماسىنىڭ ورىندالۋىن جاڭا مازمۇنمەن جانە باعىتتارمەن تولتىرۋدىڭ ماڭىزدىلىعىن اتاپ ءوتتى.
«مەملەكەت باسشىسىنىڭ تاپسىرماسىنا سايكەس، تاياۋ ۋاقىتتا جاڭا «اۋىل - ەل بەسىگى» جانە ء«وز جەرىڭدى تانىپ ءبىل» جوبالارى ىسكە قوسىلاتىن بولادى، ولار اۋىلدىق اۋماقتاردىڭ دامۋىنا قوسىمشا سەرپىن بەرمەك»، - دەدى اسەت يسەكەشەۆ.
100 وقۋلىق: وكسفورد بەلگىسىمەن ءبىرقاتار سوزدىكتەر شىعارىلماق
سونىمەن قاتار، ۇلتتىق كوميسسيا وتىرىسىندا رۋحاني جاڭعىرۋ باعدارلاماسى بويىنشا ءارتۇرلى باعىتتاردىڭ جۇزەگە اسىرىلۋ بارىسى تۋرالى ءسوز بولدى.
اتاپ ايتقاندا، «ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحان ۇلى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى بويىنشا اتقارىلىپ جاتقان جۇمىستارمەن تانىستىردى.
ايتا كەتەرلىگى، بۇعان دەيىن ۇلتتىق اۋدارما بيۋروسى العاشقى 18 كىتاپتى اۋدارىپ، مەملەكەت باسشىسىنىڭ الدىندا تۇساۋىن كەسىپ، كوپشىلىككە تانىستىرعان بولاتىن. اتالعان 18 وقۋلىقتىڭ ءارقايسىسى 10 مىڭ دانامەن شىعارىلىپ، ەلىمىزدەگى 110 جوعارعى وقۋ ورنىنا تەگىن تاراتىلدى. ال وقۋلىقتاردىڭ ەلەكتروندى نۇسقاسى ەلىمىزدەگى ۋنيۆەرسيتەتتەردىڭ پورتالىنا ورنالاستىرىلعان. توقتالا كەتەتىن جايت، بۇل جوبا جوبا اياسىنداعى جۇمىستارعا جالپى سانى 300-گە جۋىق مامان تارتىلىپتى.
ولاردىڭ باسىم بولىگى عىلىمي دارەجەسى بار، مويىندالعان، تانىلعان ۇستازدار مەن عالىمدار، اۋدارماشىلار، تىلشىلەر جانە باسپاگەرلەر. ياعني، بۇل جوبا ارقىلى اۋدارىلاتىن كىتاپتار ءبىلىم مەن عىلىم ساپاسىن كوتەرۋگە سەپتىگىن تيگىزۋى كەرەك. ەڭ باستىسى - ءسوزى انىق، مازمۇنى ۇعىنىقتى اۋدارمانىڭ مەيلىنشە جوعارى ساپاسى قامتاماسىز ەتىلۋى كەرەك.
راۋان كەنجەحان ۇلىنىڭ سوزىنە قاراعاندا، جاڭا وقۋلىقتارعا دەگەن سۇرانىس پەن قوعامداعى قىزىعۋشىلىق جوعارى بولعان. سوندىقتان دا، اۋدارىلعان كىتاپتاردى ەلىمىزدەگى كىتاپ دۇكەندەرى ارقىلى تاراتۋ ءۇشىن قوسىمشا باسىپ شىعارۋ قولعا الىنىپتى. ايتا كەتەرلىگى، بۇعان جەكەمەنشىك باسپالار تارتىلىپ، مەملەكەت قارجىسى شىعىندالمايدى. ايتسە دە، ۇلتتىق اۋدارما بيۋروسىنىڭ اتقارۋشى ديرەكتورى كوللەدجدەردى وسى وقۋلىقتارمەن قامتاماسىز ەتۋ ءۇشىن ءتيىستى مەملەكەتتىك مەكەمەلەر اتسالىسسا دەگەن تىلەگىن ايتىپ قالدى.
ەندىگى تاعى ءبىر ماسەلە - ەلباسى وقۋلىقتاردى اۋدارۋ اياسىندا جيناقتالعان تاجىريبەلەردى قورىتىپ، عىلىمي اۋدارماعا قاجەتتى سوزدىكتەردى دايارلاۋدى تاپسىرعان.
«بۇل باعىتتا سوزدىكتەردى شىعارۋ تاجىريبەسى جوعارى وكسفورد ۋنيۆەرسيتەتىنىڭ باسپاسىمەن بىرلەسىپ جۇمىس ىستەۋگە كەلىستىك.
اتاپ ايتساق، وكسفورد بەلگىسىمەن ۇلكەن قازاق- اعىلشىن، اعىلشىن- قازاق سوزدىگى، سونداي- اق قوعامدىق جانە الەۋمەتتىك عىلىمداردىڭ تۇسىندىرمە سوزدىگى، ەكونوميكا تۇسىندىرمە سوزدىگى جانە قازاق ءتىلىنىڭ كىرمە ۇعىمدارىنىڭ سوزدىگىن دايىنداۋ قولعا الىندى»، - دەيدى راۋان كەنجەحان ۇلى.
سوزدىكتەرمەن قاتار، جاڭا وقۋلىقتاردىڭ كەلەسى لەگىن، الەمگە ايگىلى اۆتورلاردىڭ ميلليونداعان تيراجبەن جاريالانعان كىتاپتارىن اۋدارىلادى. «بۇلاردىڭ ىشىندە ەنتوني كەنيدىڭ «باتىس فيلوسوفياسىنىڭ جاڭا تاريحى»، «زاماناۋي ماركەتينگتىڭ بيبلياسى» اتانعان فيليپ كوتلەردىڭ اتاقتى وقۋلىعىنىڭ 17- باسىلىمى، ونەر تاريحىنان سىر شەرتەتىن ەرنست گومبريحتىڭ 16- باسىلىمى، حالىقارالىق قۇقىق بويىنشا قازىرگى ۋاقىتتا الەم مويىنداپ وتىرعان مايلكولم شوۋدىڭ وقۋلىعى، ستيۆەن پينكەردىڭ «يازىك كاك ينستينكت» كىتابىن اتاپ وتۋگە بولادى. بۇل رەتتە اۋدارىلعالى وتىرعان كىتاپتاردىڭ ىشىندە ەكونوميكا جانە كاسىپكەرلىك سيكلىنا ەرەكشە توقتالعىم كەلىپ وتىر. ول تۋىندىلار - ەكونوميكا، ماكرو جانە ميكروەكونوميكا، مەنەدجمەنت، بيزنەسكوممۋنيكاتسيا، ماركەتينگ، جەكە قارجى جانە يننوۆاتسيا سالاسىنداعى كىتاپتار»، - دەيدى راۋان كەنجەحان ۇلى.
ال مادەنيەت جانە سپورت مينيسترلىگى جۇزەگە اسىرىپ جاتقان «قازاقستاننىڭ كيەلى جەرلەرىنىڭ گەوگرافياسى» جوباسى بيىل دا تولىعا تۇسەدى.
BBC World News-پەن بىرلەسكەن «Travel shows of Kazakhstan» اتتى جوباسى ىسكە قوسىلادى
مينيستر ارىستانبەك مۇحامەدي ۇلىنىڭ سوزىنە قاراعاندا، بۇعان دەيىن ايماقتاردىڭ نەگىزگى نىساندارى بويىنشا «كيەلى قازاقستان» ەنتسيكلوپەدياسىنىڭ العاشقى تومى جارىققا شىققالى جاتىر. الداعى ۋاقىتتا ءدال وسىنداي بەس كىتاپ شىعارىلادى. سونىمەن بىرگە، ماتەريالدار ۆيرتۋالدى كارتادا دا قولجەتىمدى بولماق.
ايتا كەتەرلىگى، بىلتىردان بەرى ەلىمىزدە بارلىق قاسيەتتى جانە تاريحي ورىنداردى، قازاقستاننىڭ تۇكپىر- تۇكپىرىندەگى ەسكەرتكىشتەردى جۇيەلەندىرۋ ءۇشىن اكىمدىكتەرمەن بىرلەسە جۇمىس جۇرگىزىلۋدە.
سونىڭ ىشىندە، التى باعىت بويىنشا، اتاپ ايتقاندا سولتۇستىك، شىعىس، باتىس، وڭتۇستىك، ورتالىق جانە وڭتۇستىك- باتىس باعىتتا عىلىمي- زەرتتەۋ ەكسپەديتسياسى ىسكە اسىرىلعان. وسى جۇمىستاردىڭ قورىتىندىسى بويىنشا ۇلتتىق ماڭىزى بار 185 جانە ايماقتىق ماڭىزى بار 456 ورىن تاڭداپ الىندى. الداعى جۇمىستار دا از ەمەس.
«جاھاندىق ينتەرنەتتە قازاقستان قاسيەتتى ورىندارىنىڭ برەندىن قالىپتاستىرۋ ءۇشىن ءۇش تىلدە 30-عا تارتا ۆيدەوروليك دايىندالدى. BBC world news, Viasat history, National geographic تەلەارنالارى امەريكالىق Castle Film كومپانياسىمەن بىرلەسە وتىرىپ، «كوشپەندىلەر جەرى»، «التىن ادام» «قازاقستاننىڭ قاسيەتتى جەرلەرىنىڭ گەوگرافياسى»، «قوجا احمەت ياساۋي»، «ايشا ءبيبى» فيلمدەرى كورسەتىلۋدە. وسى جىلدىڭ قاراشاسىندا BBC World News-پەن بىرلەسە وتىرىپ، «Travel shows of Kazakhstan» اتتى جوبانى باستاۋ جوسپارلانىپ وتىر. وعان قازاقستاننىڭ تۋريستىك الەۋەتى تۋرالى بەس باعدارلاما ەنەدى. سونىمەن بىرگە، الەمنىڭ جەتەكشى مۋزەيلەرىندە التىن ادامنىڭ كورمەسى وتكىزىلدى. كورمەلەر وڭتۇستىك كورەيا، رەسەي، بەلارۋس، ازەربايجان، قىتاي، پولشا ەلدەرىندە ۇيىمداستىرىلدى. جاقىن ارادا ءدال وسى جوبا ۇلىبريتانيا، گرۋزيا، ا ق ش، اۆستراليا، يتاليا مەن فرانتسيادا وتكىزىلمەك»، - دەدى مينيستر.
جاس سۋرەتشىلەردىڭ ۇزدىك تۋىندىلارى ۇلى بريتانيانىڭ زاماناۋي گالەرەيالارىندا كورسەتىلمەك
باعدارلامانىڭ «جاھاندىق الەمدەگى زاماناۋي قازاقستاندىق مادەنيەت» باعىتى بويىنشا دا جۇمىستار جۇيەلى اتقارىلۋدا. ءتىپتى بۇل باعىتقا ەلىمىزدىڭ بارشا شىعارماشىلىق ۇجىمدارى اتسالىسىپ وتىر دەۋگە كەلەدى.
ق ر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالايەۆانىڭ ايتۋىنشا، تەاتر مەن كينو ءاردايىم قازاقستاندىق مادەنيەتتىڭ ماڭىزدى اسپەكتىلەرى سانالادى. سوندىقتان ءتۇرلى فورماتتاعى شارالار كەشەنىن ۇيىمداستىرىلدى.
ماسەلەن، «Astana opera»، اباي اتىنداعى وپەرا جانە بالەت تەاترى، «استانا بالەت» جانە باسقا دا ۇجىمدار ەۋروپا مەن ازيا ەلدەرىنىڭ كورەرمەندەرىن ۇلتتىق وپەرا قويىلىمدارىمەن تانىستىرىپ جاتىر. سونىمەن قاتار، بيىل قازاقستان كينوتۋىندىلارى دا حالىقارالىق ارەناداعى ءتۇرلى كينوفەستيۆالدەرگە بەلسەنە قاتىسقان.
مىسالى، بيىل مادەنيەت جانە سپورت مينيسترلىگىنىڭ قولداۋىمەن 71- كانن كينوفەستيۆالىندە قازاقستان پاۆيلونى اشىلدى. وندا «ەۋرازيا» حالىقارالىق كينوفەستيۆالىنىڭ تانىستىرىلىمى وتكەن. سونداي- اق جىل باسىنان بەرى «قازاقفيلم» اق 18 ءفيلمى 14 حالىقارالىق كينوفەستيۆالگە قاتىسىپ، 11 جۇلدە جەڭىپ الدى.
بۇل رەتتە ايدا بالايەۆا «اناعا اپارار جول» فيلمىنىڭ نيۋ- يوركتەگى WeLink حالىقارالىق كينوفەستيۆالىندە «ۇزدىك كوركەم فيلم» جۇلدەسىن يەلەنگەنىن دە ەسكە سالادى. ال مادەنيەت مينيسترلىگىنىڭ تاپسىرىسىمەن جانە مەتسەناتتاردىڭ قولداۋىمەن تۇسىرىلگەن «امىرە» فيلمى Silver screen film (سيلۆەر سكرين فيلم) ماراپاتىن العان.
سونىمەن قاتار، بۇل تۋىندى گولليۆۋدتاعى كينوفەستيۆالدىڭ اقتىق سىنىنا شىققان. قازاقستاندىق كينو كۇندەرى دە جاقسى ناتيجە بەرۋدە. بيىل قازاقستاندىق كينو كۇندەرى يتاليادا، ەستونيادا جانە وزگە دە ەلدەردە ۇيىمداستىرىلدى.
ايدا بالايەۆانىڭ ايتۋىنشا، وتاندىق بەينەلەۋ ونەرىن ناسيحاتتاۋ باعىتىندا شەتەلدەردە ءبىرقاتار شارالار وتكىزىلىپ جاتىر. «ق ر ۇلتتىق مۋزەيدىڭ، ءا. قاستەيەۆ اتىنداعى ونەر مۋزەيىنىڭ شەتەلدىك ەكسپوزيتسيالىق جوبالارىن ىسكە اسىرۋ جۇمىستارى جالعاسىن تاپتى. ا ق ش، بريتانيا، قىتاي، بەلارۋس، ازەربايجان ەلدەرىندە «التىن ادامنىڭ الەم مۋزەيلەرىنە شەرۋى»، «ەۋرازيا كوشپەندىلەرى»، «ازيا مەن ەۋروپا قيىلىسىندا» كورمەلەرى ۇيىمداستىرىلدى»، - دەدى ول.
بۇدان بولەك، ۇلتتىق مۋزەيدە ىسكە قوسىلعان «Focus Kazakhstan» جوباسى اياسىندا قازاقستاننىڭ جاس، دارىندى سۋرەتشىلەرى ۇلىبريتانيانىڭ زاماناۋي گالەرەيالارىندا ءوز ونەر تۋىندىلارىن كورسەتۋ مۇمكىندىگىنە يە. سونىمەن قاتار، قازاقستانعا شەتەلدىك اۋديتوريانىڭ نازارىن اۋدارۋ بويىنشا اۋقىمدى جۇمىستار اتقارىلدى.
اتاپ ايتقاندا، ەلوردادا وتكەن «Astana art show» اتتى العاشقى حالىقارالىق بيەننالە جىل سايىن وتاندىق سۋرەتشىلەر ءۇشىن ۇيىمداستىرىلاتىن زاماناۋي ونەر الاڭى بولماق.
«قازاقستان بەينەلەۋ ونەرى انتولوگياسىن قۇراستىرۋ ءۇشىن مادەنيەت جانە سپورت مينيسترلىگىنىڭ قولداۋىمەن جالپىحالىقتىق داۋىس بەرۋ ارقىلى تاۋەلسىزدىك جىلدارىندا ومىرگە كەلگەن ۇزدىك تۋىندىلار ىرىكتەلدى. انتولوگيا قازاق، ورىس جانە اعىلشىن تىلدەرىندە جارىق كورەدى» ، - دەدى ايدا بالايەۆا.
«100 جاڭا ەسىم»: جاستاردىڭ قىزىعۋشىلىعى ارتىپ وتىر
ۇلتتىق كوميسسيا وتىرىسىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ ەلباسىنىڭ «رۋحاني جاڭعىرۋ» باعدارلاماسى اياسىندا «100 جاڭا ەسىم» جوباسى نەلىكتەن بيىل قايتادان وتكىزىلەتىنىنە توقتالدى. ءمينيستردىڭ سوزىنە قاراعاندا، بۇگىنگە دەيىن مونوقالالار مەن اۋدان ورتالىقتارىنىڭ ءبارىن قوسقاندا ەلىمىزدىڭ بارلىق وڭىرلەرىندە جوبا جەڭىمپازدارىنىڭ قاتىسۋىمەن 300-گە جۋىق شارا وتكىزىلگەن. ولاردىڭ كەيبىرى جۇيەلى سيپاتقا يە بولىپ، كوممۋنيكاتسيا ءۇشىن ءتيىمدى الاڭ رەتىندە ءوزىن تانىتا ءبىلدى.
«بيىل «100 جاڭا ەسىم» باعىتى بويىنشا اقپاراتتىق كەڭىستىككە مونيتورينگ جانە حالىقتىڭ مىڭداعان ۇسىنىستارىنا تالداۋ جۇرگىزىلگەن بولاتىن. سونىڭ ناتيجەسىندە جوبانى ارى قاراي جالعاستىرۋ تۋرالى الەۋمەتتىك سۇرانىستىڭ بارى انىقتالدى. بۇل رەتتە ەلىمىزدىڭ ازاماتتىق سەكتورى ەرەكشە ۇستانىمىن تانىتقانىن اتاپ ءوتۋ كەرەك. وسىعان بايلانىستى مينيسترلىك قازاقستان حالقى اسسامبلەياسىمەن بىرلەسە وتىرىپ، «100 جاڭا ەسىم» جوباسىنىڭ ەكىنشى كەزەڭىن جۇزەگە اسىرىپ جاتىر»، - دەدى داۋرەن ابايەۆ.
ءمينيستردىڭ ايتۋىنشا، بۇل جولعى جوبانىڭ باستى ەرەكشەلىگى - ىزدەۋدە جانە ىرىكتەۋدە ۇكىمەتتىك ەمەس سەكتوردان ۇمىتكەرلەردى تابۋ سەكىلدى ينستيتۋتسيونالدىق ءادىس قولدانىپ وتىر. سونىمەن قاتار، البەتتە، ءوزىن- ءوزى ۇسىنۋ مۇمكىندىگى دە بار.
«بيىل 3 -قىركۇيەك پەن 25 -قازان ارالىعىندا 2388 ءوتىنىم كەلىپ ءتۇستى. ايماقتىق ۇلەس بويىنشا ەلىمىزدىڭ بارلىق وڭىرلەرى اتسالىسىپ جاتىر. اسىرەسە، ەرەكشە بەلسەندىلىكتى قاراعاندى، شىعىس قازاقستان، ماڭعىستاۋ وبلىستارى مەن استانا، الماتى قالالارىنان بايقاۋعا بولادى»، - دەيدى داۋرەن ابايەۆ.
مينيستر اتاپ وتكەندەي، جوباعا جاستاردىڭ دا قىزىعىپ وتىرعانى قۋانتادى. سونىمەن قاتار، قازىردىڭ وزىندە بۇل ساناتتا قوعامنىڭ نازارىنا ىلىككەن جاندار بار ەكەن. مينيستر داۋرەن ابايەۆ سولاردىڭ ءبىرقاتارىنا توقتالدى.
«ماسەلەن، ينديرا ادىلبايەۆا دەگەن بويجەتكەن باسكەتبول بويىنشا ەرەكشە قاجەتتىلىگى بار بالالارعا جاتتىقتىرۋشى بولىپ ءجۇر. سونداي-اق، لاريون يان كلينينگتى كومپانيانى جاساقتاپ، ءقازىر قول استىنداعى 5 مىڭ ادامدى جۇمىسپەن قامتىپ وتىر. ەردوس تولەگەنوۆ دەگەن تاعى ءبىر جىگىت «ويلا» اتتى بالالاردىڭ عىلىمي جۋرنالىن شىعاردى.
ول جۋرنال قازىرگى تاڭدا گەرمانيا مەن ليحتەنشتەين مەن ليۋكسەمبۋرگتە، نيدەرلاندى مەن شۆەيتساريادا، اۋستراليا مەن جاڭا زەلانديادا، سونداي-اق وڭتۇستىك كورەيادا شىعارىلىپ جاتىر. ول ءقازىرى تاڭدا فرانشيزانى ساتىپ جىبەرگەن. 20 مىڭ دانامەن شىعاتىن بۇل جۋرنال وتە قىزىقتى. سول سەكىلدى ايدوس ەسماعامبەتوۆ - سيليكوننان ءمۇسىن جاسايتىن ەرەكشە ءمۇسىنشى. ونى ءتىپتى مادام تيۋسسو مۇراجايى شاقىرىپتى. دويبىدان الەمنىڭ ون ءبىر دۇركىن چەمپيونى مارات جيكەيەۆ دەگەن مىقتى ادام بار. مىنە، جوبانى جالعاستىرۋعا تۇرارلىق اينالامىزدا قانشاما كىسىلەردىڭ بارىن ءبىلىپ وتىرمىز»، - دەيدى مينيستر.
ايتا كەتەرلىگى، «100 جاڭا» ەسىم بويىنشا ۇمىتكەرلەرگە باعا بەرۋ ءۇشىن ارنايى ساراپشىلىق كەڭەسى قۇرىلعان. جوباعا قاتىسۋشىلار ەڭ سوڭىندا ونلاين داۋىس بەرۋ ارقىلى ىرىكتەلەدى. داۋىس بەرۋ 1-15 -قاراشا ارالىعىندا وتەدى. ال 1-5 -جەلتوقسان ارالىعىندا «100 جاڭا ەسىمگە» ەنگەن ادامداردى كوپشىلىككە تانىستىرىلادى.
«تۋعان جەر» جوباسى تولىعىپ كەلەدى
ق ر پرەزيدەنت اكىمشىلىگى باسشىسىنىڭ ورىنباسارى، «تۋعان جەر» جوباسى بويىنشا جۇمىس توبىنىڭ جەتەكشىسى وڭداسىن ورازاليننىڭ ايتۋىنشا، بيزنەس تاراپىنان وسى باعىت ۇلكەن قولداۋ تاۋىپ وتىر. وڭىرلەردە دە كوپتەگەن ءىس- شارالار مەن جوسپارلار بەكىتىلگەن. بيىلدىڭ وزىندە جوبا شەڭبەرىندە رەسپۋبليكادا جىلدىڭ باسىنان بەرى ءۇش مىڭنان اسا ءىس-شارا جۇزەگە اسىرىلعان ەكەن.
«الداعى ۋاقىتتا قوعامدىق سانانى جاڭعىرتۋدا تيىمدىلىگىن كورسەتكەن ماڭىزدى باعىتتارعا قاراي جۇمىستى ۇيلەستىرىپ، پرەزيدەنتتىڭ 5 قازانداعى «قازاقستاندىقتاردىڭ ءال- اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىن ەسەپكە الۋ كوزدەلۋدە. ءبىراق، بۇل رەتتە ءبىرقاتار نازارعا الارلىق تۇستار بار.
بىرىنشىدەن، بىزدە بۇل باعىتتا ورتالىق ورگاندار مەن جەرگىلىكتى اتقارۋشى ورگانداردىڭ جۇمىسىن ءالى دە كۇشەيتۋ كەرەك. سەبەبى، كوممۋنيكاتسيا جوبالىق كەڭسەنىڭ ماماندارىنىڭ دەڭگەيىندە عانا جۇزەگە اسىرىلادى. بۇنىڭ ارتى ءبىرشاما سۇراقتار تۋىنداتىپ وتىر. ويتكەنى، ايماقتىق كەڭسەلەردىڭ جۇمىسىنا جەتكىلىكتى دەڭگەيدە ماڭىز بەرىلمەيدى. جوبانىڭ جۇزەگە اسىرىلۋىنا تولىققاندى مونيتورينگ جۇرگىزۋ قاجەت دەپ ەسەپتەيمىز»، - دەيدى وڭداسىن ورازالين. «تۋعان جەر» جوباسى بويىنشا وڭداسىن ورازالين تاعى ءبىر ماڭىزدى ماسەلەگە نازار اۋدارۋدى ەسكە سالدى.
«جوبانى اقپاراتتىق تۇرعىدا قولداۋ بويىنشا ايتارىم بار. ايماقتارعا سۇراقتار كوپ. جاعداي مىنادا. قازىرگى تاڭدا كەيبىر ءىس- شارالاردىڭ پيار- سيپاتى بايقالىپ قالىپ جاتىر. ال ءبىز حالىق پەن بيزنەس ءۇشىن جوبا مەن اتقارىلعان جۇمىستىڭ باسىمدىقتارىن كورسەتكىمىز كەلەدى»، - دەيدى ول.
ال اۋىل شارۋاشىلىعى ءبىرىنشى ۆيتسە-ءمينيسترى ارمان ەۆنيەۆ «رۋحاني جاڭعىرۋ» باعدارلاماسىنىڭ اياسىندا «اۋىل - ەل بەسىگى» اتتى جاڭا ارنايى جوبانى ەنگىزۋدى ۇسىندى. ەستە بولسا، «اۋىل - ەل بەسىگى» اتتى جاڭا جوبا مەملەكەت باسشىسىنىڭ «قازاقستاندىقتاردىڭ ءال- اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا كوتەرىلگەن ەدى.
«ەلباسى قولداۋىنىڭ ارقاسىندا اعىمداعى جىلدىڭ شىلدە ايىندا 2017-2021 -جىلدارى اگروونەركاسىپ كەشەندى دامىتۋدىڭ مەملەكەتتىك باعدارلاماسى جانداندىرىلعان. ءوزىمىز كورىپ وتىرعانىمىزداي، ا و ك-تى دامىتۋدىڭ مەملەكەتتىك باعدارلاماسى بيزنەس پروتسەستەر تۇرعىسىنان اۋىل ەڭبەككەرلەرىنىڭ باسىم بولىگىن قامتىپ وتىر. ءبىراق اۋىلشارۋاشىلىق ءوندىرىسىنىڭ باسقا سالالاردان ايىرماشىلىعى مەن ونىڭ ەرەكشەلىگى اۋىل شارۋاشىلىعىنىڭ تەك ءوندىرىس سالاسى عانا ەمەس، ەل تۇرعىندارىنىڭ ۇلكەن ماسساسىنىڭ ءومىر سالاسى بولعانىندا»، - دەدى ا. ەۆنيەۆ.
تالقىلاۋلار قورىتىندىسى بويىنشا ۇلتتىق كوميسسيانىڭ ءتوراعاسى ۇكىمەتكە 2018-2019 -جىلدارعا ارنالعان «رۋحاني جاڭعىرۋ» باعدارلاماسىن ىسكە اسىرۋ جونىندەگى ءبىرىڭعاي جوسپار ازىرلەۋدى، اۋىل شارۋاشىلىعى مينيسترلىگىنە جاڭا «اۋىل - ەل بەسىگى» الەۋمەتتىك جوباسىن ىسكە قوسۋدى تاپسىردى.