مۇرات ابەنوۆ: مەملەكەتتىك ورگاندار الەۋمەتتىك جەلىلەردى بەلسەندى پايدالانۋى ءتيىس
بۇل تۋرالى قىزمەتتىك ادەپ نورمالارىن ساقتاۋعا بايلانىستى قوستانايدا وتكەن رەسپۋبليكالىق فورۋمدا مۇرات ابەنوۆ ايتتى، دەپ حابارلايدى قازاقپارات.
قازاقستاننىڭ مەملەكەت جانە قوعام قايراتكەرى مۇرات ابەنوۆ «مەملەكەتتىك قىزمەتتەگى مىنەز- قۇلىق ادەپ ستاندارتتارى: تاجىريبە جانە جەتىستىكتەر» اتتى رەسپۋبليكالىق فورۋمدا ءسوز سويلەپ، ۇسىنىستارىن ورتاعا سالدى. ول كونفەرەنسيا بارىسىندا مەملەكەتتىك قىزمەتتىڭ جاڭا مودەلى حالىقپەن بارىنشا اشىقتىقتى ۇستاناتىنىن اتاپ ءوتتى.
سونداي-اق، جاڭا فورماتسيانىڭ مەملەكەتتىك قىزمەتشىلەرى مەملەكەت پەن قوعام اراسىنداعى الشاقتىقتى قىسقارتۋعا ءتيىس.
«ەلباسى مەملەكەتتىك ورگانداردىڭ اشىقتىعى تۋرالى ۇنەمى قوزعاپ كەلەدى. بيىلعى جولداۋىندا دا بۇل ماسەلەنى باسا ايتتى. راسىندا، مەملەكەتتىك قىزمەتشى قانداي بولۋى قاجەت؟ وسى سۇراق مەملەكەتتىك قىزمەتكە جاڭا قادام باسقان ءاربىر جاستى ويلاندىرۋى ءتيىس. ولار جۇمىسقا تۇرعان كۇننەن باستاپ، حالىق پەن بيلىكتىڭ اراسىن الشاقتاتپاۋدى نەگىزگە العاندارى ابزال. پرەزيدەنتىمىز جاڭا مەملەكەتتىك قىزمەتشىنىڭ مودەلىن قۇرۋ تۋرالى تاپسىرما بەردى. مۇنى مەن الەمدە بولىپ جاتقان وزگەرىستەرگە قاراپ، سونىڭ بالاماسىندا ىسكە اساتىن ءتيىمدى تاجىريبە دەپ ەسەپتەيمىن»، - دەدى مۇرات ابەنوۆ.
قوعام قايراتكەرى مەمقىزمەتتەگى وڭتايلاندىرۋ تۋرالى دا پىكىر ءبىلدىردى. ونىڭ سوزىنشە، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى وسى تۇرعىدا جەمىستى جوبالاردى قولعا الدى.
«مەملەكەتتىك قىزمەتتەگى وڭتايلاندىرۋدىڭ ارقاسىندا جۇمىس ساپاسى ارتتى. جاس قىزمەتكەرلەرگە قوسىمشا ستيمۋل پايدا بولدى. مەن مەملەكەتتىك قىزمەتشى بولماسام دا، اگەنتتىكتىڭ اتقارىپ كەلە جاتقان جۇمىستارىمەن تانىسپىن. اليك شپەكبايەۆ قوعام بەلسەندىلەرى ارقىلى حالىققا جاقىنداۋدىڭ جولدارىن تاپتى. ول مەملەكەتتىك ورگاندارعا الەۋمەتتىك جەلىلەردى پايدالانىپ، تۇرعىندارمەن كەرى بايلانىس جاساۋدى ۇسىندى. مەنىڭشە، بۇل قولدايتىن باستاما. ساراپتاما جۇرگىزىپ كوردىم، قازاقستاندىقتاردىڭ 91 پايىزى سمارتفون قولدانادى. ماسەلەن، وسىدان 2-3 -جىل بۇرىن ق ر ءى ءى م اۆتوورىندىق تۋرالى نورمانى قابىلدادى. الايدا، جۇرتتىڭ الەۋمەتتىك جەلىلەردەگى نارازىلىعى سالدارىنان بۇل ماسەلە كەيىنگە شەگەرىلدى. وسىنداي مىسالداردى سارالاي كەلە، مەملەكەتتىك ورگاندار حالىقپەن بارىنشا اشىق بولۋى ءتيىس دەگەن تۇجىرىم شىعارامىز»، - دەيدى ول.
ەسكە سالساق، ەلباسى بيىلعى جولداۋىندا مەملەكەتتىك ورگاندار قىزمەتىنىڭ تيىمدىلىگىن تۇبەگەيلى ارتتىرۋدى تاپسىردى.
