الەمگە ايگىلى اۆتورلاردىڭ ميلليونداعان تيراجبەن جاريالانعان كىتاپتارى قازاقشاعا اۋدارىلىپ جاتىر

استانا. قازاقپارات - اقوردادا ق ر پرەزيدەنت اكىمشىلىگىنىڭ باسشىسى اسەت يسەكەشيەۆتىڭ توراعالىعىمەن قوعامدىق سانانى جاڭعىرتۋ باعدارلاماسىن جۇزەگە اسىرۋ بويىنشا ۇلتتىق كوميسسيانىڭ كەزەكتى وتىرىسى ءوتىپ جاتىر، دەپ حابارلايدى قازاقپارات ءتىلشىسى.

وتىرىس بارىسىندا «ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحان ۇلى ەلباسىنىڭ «رۋحاني جاڭعىرۋ» باعدارلاماسى اياسىندا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى بويىنشا اتقارىلىپ جاتقان جۇمىستارمەن تانىستىردى.

«بۇگىنگى تاڭدا جوبا اياسىنداعى جۇمىستارعا جالپى سانى 300-گە تارتا مامان قاتىسۋدا. ولاردىڭ دەنى عىلىمي دارەجەسى بار، مويىندالعان، تانىلعان ۇستازدار مەن عالىمدار، اۋدارماشىلار، تىلشىلەر جانە باسپاگەرلەر. جوباعا اتسالىسىپ جاتقان مامانداردىڭ قاي- قايسىسى دا بۇل كىتاپتاردىڭ ءبىلىم مەن عىلىم ساپاسىن كوتەرۋدەگى تيىمدىلىگىن، ۇرپاق جانە ەل بولاشاعىن قالىپتاستىرۋداعى زور ماڭىزىن ەسكەرە وتىرىپ، جۇمىسقا ەرەكشە دەن قويۋدا. باستى ماقسات - ءسوزى انىق، مازمۇنى ۇعىنىقتى اۋدارمانىڭ مەيلىنشە جوعارى ساپاسىن قامتاماسىز ەتۋ»، - دەيدى راۋان كەنجەحان ۇلى.

ۇلتتىق اۋدارما بيۋروسى جوبا اياسىندا العاشقى 18 كىتاپتى اۋدارىپ، مەملەكەت باسشىسىنىڭ قاتىسۋىمەن وتكەن تۇساۋكەسەردە كوپشىلىككە تانىستىرعان. اتالعان 18 وقۋلىقتىڭ ءارقايسىسى 10 مىڭ دانامەن شىعارىلىپ، بۇل كۇندە ەلىمىزدەگى 110 جوعارعى وقۋ ورنىنا تەگىن تاراتىلعان. وقۋلىقتاردىڭ ەلەكتروندى نۇسقاسى ەلىمىزدەگى ۋنيۆەرسيتەتتەردىڭ پورتالىنا ورنالاستىرىلعان.

«جاڭا وقۋلىقتارعا دەگەن جوعارى سۇرانىس پەن قوعامداعى قىزىعۋشىلىقتى ەسكەرە وتىرىپ، ەلىمىزدەگى كىتاپ دۇكەندەرى ارقىلى تاراتۋ ءۇشىن قوسىمشا باسىپ شىعارۋ قولعا الىندى. ول جۇمىسقا جەكەمەنشىك باسپالار تارتىلىپ، مەملەكەت قارجىسى شىعىندالمايدى. الايدا ەلىمىزدەگى ورتا ارناۋلى وقۋ ورىندارى، ياعني كوللەدجدەردى وسى وقۋلىقتارمەن قامتاماسىز ەتۋ ماسەلەسىن ءتيىستى مەملەكەتتىك مەكەمەلەر قاراستىرۋى قاجەت دەپ سانايمىز»، - دەيدى ول.

راۋان كەنجەحان ۇلىنىڭ ايتۋىنشا، ساۋىردە وتكەن تۇساۋكەسەر بويىنشا ەلباسى وقۋلىقتاردى اۋدارۋ اياسىندا جيناقتالعان تاجىريبەلەردى قورىتىپ، عىلىمي اۋدارماعا قاجەتتى سوزدىكتەردى دايارلاۋدى تاپسىرعان.

«بۇل باعىتتا سوزدىكتەردى شىعارۋ تاجىريبەسى اسا مول وكسفورد ۋنيۆەرسيتەتىنىڭ باسپاسىمەن بىرلەسىپ جۇمىس ىستەۋگە كەلىستىك. اتاپ ايتساق، وكسفورد بەلگىسىمەن ۇلكەن قازاق- اعىلشىن، اعىلشىن- قازاق سوزدىگى، سونداي- اق قوعامدىق جانە الەۋمەتتىك عىلىمداردىڭ تۇسىندىرمە سوزدىگى، ەكونوميكا تۇسىندىرمە سوزدىگى جانە قازاق ءتىلىنىڭ كىرمە ۇعىمدارىنىڭ سوزدىگىن دايىنداۋ قولعا الىندى»، - دەيدى ۇلتتىق اۋدارما بيۋروسىنىڭ ديرەكتورى.

ول اتاپ وتكەندەي، قازىرگى ۋاقىتتا جاڭا وقۋلىقتاردىڭ كەلەسى لەگىن، الەمگە ايگىلى اۆتورلاردىڭ ميلليونداعان تيراجبەن جاريالانعان كىتاپتارىن اۋدارۋ جۇمىستارى ءجۇرىپ جاتىر.

«بۇلاردىڭ ىشىندە ەنتوني كەنيدىڭ «باتىس فيلوسوفياسىنىڭ جاڭا تاريحى»، «زاماناۋي ماركەتينگتىڭ بيبلياسى» اتانعان فيليپ كوتلەردىڭ اتاقتى وقۋلىعىنىڭ 17- باسىلىمى، ونەر تاريحىنان سىر شەرتەتىن ەرنست گومبريحتىڭ 16- باسىلىمى، حالىقارالىق قۇقىق بويىنشا قازىرگى ۋاقىتتا الەم مويىنداپ وتىرعان مايلكولم شوۋدىڭ وقۋلىعى، ستيۆەن پينكەردىڭ «يازىك كاك ينستينكت» كىتابىن اتاپ وتۋگە بولادى. بۇل رەتتە اۋدارىلعالى وتىرعان كىتاپتاردىڭ ىشىندە ەكونوميكا جانە كاسىپكەرلىك سيكلىنا ەرەكشە توقتالعىم كەلىپ وتىر. ول تۋىندىلار - ەكونوميكا، ماكرو جانە ميكروەكونوميكا، مەنەدجمەنت، بيزنەسكوممۋنيكاتسيا، ماركەتينگ، جەكە قارجى جانە يننوۆاتسيا سالاسىنداعى كىتاپتار»، - دەيدى راۋان كەنجەحان ۇلى.

ەسكە سالا كەتسەك، وسى جىلدىڭ ءساۋىر ايىندا استاناداعى نازاربايەۆ ورتالىعىندا «قازاق تىلىندەگى 100 جاڭا وقۋلىق» جوباسى اياسىندا اۋدارىلعان العاشقى كىتاپتار تانىستىرىلعان بولاتىن.

اۆتور: ايان بەكەن ۇلى