دەپۋتاتتار شەكارا ماڭىنداعى اۋىل مەكتەپتەرىنىڭ جابىلۋ ماسەلەسىن كوتەردى

استانا. قازاقپارات - پارلامەنت سەناتىنىڭ جالپى وتىرىسىندا دەپۋتاتتار شەكارا شەبىندەگى ەلدى مەكەندەردەگى مەكتەپتەردىڭ ماسەلەسىن كوتەردى.

وسى ورايدا ق ر ۇكىمەت باسشىسى باقىتجان ساعىنتايەۆتىڭ اتىنا دەپۋتاتتىق ساۋال جولداندى، دەپ حابارلايدى قازاقپارات.

«اعىمداعى جىلدىڭ تامىز ايىندا وڭىرلەردە بولعان ءىس-ساپارامىز بارىسىندا مارقاكول مەن ۇلكەن نارىن اۋماقتارىنىڭ تۇرعىندارى مەملەكەت تاراپىنان شەشىلىپ جاتقان جۇمىستاردى ايتا وتىرىپ، قوردالاعان ماسەلەلەردى دە كوتەرگەن ەدى. ارينە، شەكارا شەبىندەگى ەلدى مەكەندەردەگى ميگراتسيانىڭ جاعىمسىز سالدوسىنا الەمدە ۇردىسكە اينالعان ۋربانيزاتسيا، موبيلدى بايلانىس پەن ينتەرنەت ساپاسىنىڭ تومەندىگى جانە زاماناۋي كوممۋنيكاتسيامەن قامتۋ فاكتورلارىنىڭ اسەرى بارشامىزعا تۇسىنىكتى. ءبىزدىڭ دەپۋتاتتىق ساۋالىمىزعا ش ق و- نىڭ شەكارا ماڭىندا ورنالاسقان كۇرشىم جانە كاتونقاراعاي اۋداندارىندا تۋىنداپ وتىرعان حالىق سانى از اۋىلدىق جەرلەردە مەكتەپتەردىڭ جابىلۋى سەبەپ بولدى. بۇل جاعداي ەلىمىزدىڭ كوپتەگەن شەكارالىق ايماقتارىنا دا ءتان ەكەنى داۋسىز»، - دەدى دەپۋتات دۇيسەنعازى مۋسين.

وسى ورايدا ول الاڭداتىپ وتىرعان ستاتيستيكالىق دەرەكتەرگە توقتالدى. ماسەلەن، كاتونقاراعاي اۋدانى حالقىنىڭ سانى سوڭعى 20 جىلدا 29 مىڭ ادام ازايعان، التى اۋىل ەلدى مەكەن مارتەبەسىنەن ايىرىلدى. سونىمەن قاتار اتالعان مەرزىم ىشىندە وقۋشى سانى ازايعاندىقتان، مەكتەپتەردىڭ جابىلۋى بايقالدى. بۇدان بولەك سەناتور سوڭعى 20 جىلدا تەك مارقاكول وڭىرىندەگى حالىق سانى 2 ەسەگە ازايعانىن اتاپ ءوتتى.

«كەلتىرىلگەن دەرەكتەر شەكارا ماڭىنىڭ يەسىز مەكەنگە اينالۋىنىڭ دالەلى. سوندىقتان بۇل ۇدەرىستى توقتاتۋ شارالارىن جەدەلدەتۋ، ەلدى مەكەندەردى نىعايتىپ، كوپتەپ قونىستاندىرۋ ستراتەگيالىق ماڭىزى بار ماسەلە بولىپ وتىر. مەكتەپ سانىن قىسقارتۋ تۋرالى ماسەلە جالپى شەكارا ايماعىنداعى پروبلەمالاردى كەشەندى تۇردە شەشۋ ارقىلى قاراستىرىلعان دۇرىس دەپ سانايمىز. بۇل باعىتتا ش ق و باسشىلىعى ارنايى جوسپار جاساپ، ۇكىمەتكە ءبىرقاتار ۇسىنىستارىن جولداعانى ءمالىم»، - دەدى دەپۋتات.

جوعارىدا ايتىلعانعا بايلانىستى، ءبىلىم جانە عىلىم مينيسترلىگى تاراپىنان ءبىلىم بەرۋ ۇيىمدارى جەلىسى نورماتيۆىنە نەگىزگى جانە ورتا مەكتەپتەردىڭ قىزمەت ەتۋى ءۇشىن نورمانى تومەندەتۋگە قاتىستى وزگەرىستەر ەنگىزۋ ۇسىنىلدى.

«سونىمەن قاتار، مەكتەپتەردى قولداۋ، ولاردىڭ جابىلۋىن توقتاتۋعا باعىتتالعان وزگەرىستەر، ناقتى ءىس- شارالار قاراستىرىلىپ، وڭتايلى شەشىمدەرى قابىلدانۋىن ۇسىنامىز. ەلباسىنىڭ كەزەكتى جولداۋىندا بەرگەن تاپسىرمالارىن ورىنداۋ ماقساتىندا، شەكارا ايماعىنداعى مەكتەپتەر ماسەلەسى ەلدى مەكەندەردى دامىتۋ جوسپارىمەن ۇشتاستىرىلىپ، ازىرلەنەتىن وڭىرلەردى دامىتۋدىڭ 2025 -جىلعا دەيىنگى باعدارلاماسىندا جانە ەلىمىزدىڭ 2030 -جىلعا دەيىنگى اۋماقتىق كەڭىستىك دامۋىنىڭ بولجامدى كەستەسىندە ارنايى شارالار كەشەنى رەتىندە ەرەكشە ورىن الۋى قاجەت دەپ سانايمىز»، - دەدى دۇيسەنعازى مۋسين.

اۆتورى: رۋسلان عابباسوۆ