الماتىداعى ساۋدا ءۇيى باسشىلىعى: مىڭداعان ادام جۇمىسىنان ايىرىلۋى مۇمكىن
«كەشە قالالىق سوت ءبىزدىڭ ساۋدا ءۇيىن جابۋ تۋرالى شەشىم شىعاردى. 2018 -جىلدىڭ كوكتەمىندە الماتىدا بارلىق ساۋدا ۇيلەرى تەكسەرىلدى. تەكسەرۋ بارىسىندا 22 ەسكەرتۋ جاسالدى. ولاردىڭ 21 ى سول ايدا جوندەلدى. ءبىر شەشىم بويىنشا ءبىز ءبىرجاقتى جاعدايدا ونى شەشە المايمىز»، - دەدى ساۋدا ءۇيىنىڭ ديرەكتورى نۇرلان يبرايەۆ.
ديرەكتوردىڭ مەڭزەگەن ەسكەرتۋى ساۋدا ۇيىنە جاقىن ورنالاسقان «ساريتا» كافەسىنىڭ قىزمەتىنە بايلانىستى بولىپ وتىر.
ءورت ءسوندىرۋ قاۋىپسىزدىگىنە بايلانىستى عيماراتتار ءبىر-بىرىنە قاتتى جاقىن ورنالاسپاۋى كەرەك.
اتالعان ءدامحانا جەكە كاسىپكەرگە تيەسىلى.
«ەكى عيمارات اراسىنداعى ءورت قاۋىپسىزدىگى ساقتالۋى ءۇشىن قاشىقتىق 2 مەتردەن كەم بولماۋى كەرەك. سونىمەن قاتار جاپسارلاس ورنالاسقان عيماراتتاردىڭ ءبىرىنىڭ قابىرعاسى (ءدامحانانىڭ) تەز تۇتانعىش ماتەريالداردان جاسالعان»، - دەدى ساۋدا ءۇيىنىڭ قۇقىقتىق ماسەلەلەرى بويىنشا ديرەكتورى سەرىك سەمبايەۆ.
ونىڭ ايتۋىنشا، ساۋدا ءۇيىنىڭ اكىمشىلىگى ءدامحانانىڭ باسشىلىعىمەن ماسەلەنى شەشۋگە تىرىسقان.
جەكە كاسىپكەر عيماراتتىڭ قاسبەتىن وزگەرتۋ ءۇشىن شىعىندى ساۋدا ءۇيى كوتەرىپ العانىن قالاپ وتىر.
«كافە باسشىسى ءبىز ءۇشىن وسى ماسەلەنىڭ اۋاداي قاجەتتىگىن ءبىلىپ وتىر. ولار وزدەرى تەكسەرۋگە جاتپايتىن سۋبەكت بولعان سوڭ بىزگە ءدامحاناسى مەن جەر ۋچاسكەسىن اسا قىمبات باعادا ساتۋعا نيەتتى»، - دەدى سەرىك سەمبايەۆ.
ال ساۋدا ءۇيىنىڭ باسشىلىعى قازىر جەكە كاسىپكەردى سوتقا بەرىپ، عيماراتتىڭ قاسبەتىن اۋىستىرۋعا ماجبۇرلەۋدى قولعا الدى.
نۇرلان يبرايەۆ «MOSKVA metropolitan» ساۋدا ءۇيىن اشۋعا 12 ميلليارد تەڭگە ينۆەستيسيا سالىنعانىن ايتتى.
ءار اي سايىن ارەنداتورلاردان 1,5 ميلليارد تەڭگە كولەمىندە جالعا الۋ اقىسى تولەنەدى. مىڭداعان ادام وسى ساۋدا ۇيىندە ەڭبەك ەتىپ، جالاقى الىپ وتىر.
«ەندى وسى ادامدار جۇمىسىنان ايرىلىپ قالۋ قاۋپى بار. اي سايىن ءبىز 240 ميلليون تەڭگە سالىق تولەيمىز. ال ت ج د تاراپىنان عيماراتتىڭ ىشىنە قاتىستى ەسكەرتۋ جوق. قازىر دامحانامەن جاپسارلاس قابىرعانى 2,5 ساعاتتىق وتقا توتەپ بەرەتىن ماتەريالمەن قاپتاپ قويدىق»، - دەدى ن. يبرايەۆ.
مۇنىڭ الدىندا الماتى قالالىق سوتىنىڭ اپەللياتسيالىق كوللەگياسى قالالىق ت ج د «MOSKVA metropolitan» ساۋدا ءۇيىنىڭ جۇمىسىن ءورت قاۋىپسىزدىگى ەسكەرتۋلەرى قالپىنا كەلتىرىلگەنشە توقتاتۋ تۋرالى الدىڭعى سوت شەشىمىن وزگەرىسسىز قالدىرعان بولاتىن.