ەلىمىزدىڭ ساربازدارىنان مامانداندىرىلعان تاۋلى جاساق قۇرىلادى
قۇرلىق اسكەرلەرى اسكەري ينستيتۋتىنىڭ كۋرسانتتارى ۇرىس تەحنيكاسىن مەڭگەرىپ، نىسانانى ءدال كوزدەۋدەن سايىستى. بولاشاق لەيتەنانتتار قىتايدا وتكەن حالىقارالىق اسكەري ويىنداردا ۇزدىك اتانعان بولاتىن.
قولباسشىنىڭ بۇيرىعىن ەستىگەن ساربازدار اسكەري تەحنيكانى تاقىمداپ، كەلەسى تاپسىرماعا دايىن ەكەنىن كورسەتتى. ول ءۇشىن كۋرسانتتارعا بار بولعانى بىرنەشە سەكۋند بەرىلەدى. تاپسىرما ءارى قاراي قيىنداي تۇسەدى. وق وتپەيتىن كولىكپەن ءجۇرىپ كەلە جاتىپ، ءبىر شاقىرىم قاشىقتىقتاعى نىسانانى ءدال كوزدەۋ كەرەك. وقۋ ورنىن بىتىرگەلى وتىرعان ساربازداردىڭ شەبەرلىگى - ءبىرىنشى كۋرس ستۋدەنتتەرى ءۇشىن ۇلكەن تاجىريبە.
نۇرلان باتىرعالي، قۇرلىق اسكەرلەرى اسكەري ينستيتۋتىنىڭ 4 - كۋرس كۋرسانتى:
- نىسانانى قازىرگى جاياۋ ۇرىس ماشيناسىندا ورنالاسقان 30 ميلليمەترلىك پۋشكامەن اتامىز. ونىڭ 30 م م سناريادتارى بار. 20 سناريادتان بەرىلەدى. سولارمەن ءوزىمىزدىڭ قازىرگى نىسانالاردى جويۋعا تىرىسامىز.
قازىر 12 ماماندىق بويىنشا ءبىلىم بەرەتىن ورتالىق ازياداعى ەڭ ۇلكەن اسكەري ينستيتۋت ەندى تاۋلى ايماقتارعا ماشىقتانعان سارباز دايىنداماق. ويتكەنى ەل اۋماعىندا تاۋلى قىراتتار كوپ. وعان قوسا، ينستيتۋتتا ت م د ەلدەرىنىڭ 70-تەن اسا كۋرسانتى ءبىلىم الادى.
تالعات باۋدينوۆ، قۇرلىق اسكەرلەرى اسكەري ينستيتۋتى باسشىسىنىڭ مىندەتىن اتقارۋشى:
- تاۋلى ايماقتارعا مامانداندىرىلعان وقۋ ورتالىعىن اشۋدى جوسپارلاپ وتىرمىز. ويتكەنى مەملەكەت اۋماعىنىڭ 30 پايىزى، ياعني شىعىس پەن وڭتۇستىك وڭىرلەرىندە تاۋلى ايماقتار كوپ. سوندىقتان شەكارانى، تاۋلى جەردەگى قاۋىپسىزدىكتى قاداعالايتىن ارنايى ساربازدار دايىنداۋىمىز كەرەك.
اسكەري ينستيتۋتتا ءبىر ورىن ءۇشىن كەم دەگەندە بەس ۇمىتكەر باق سىنايدى. ودان كەيىن كۋرسانتتار ءتورت جىل قاتاڭ ءتارتىپ پەن تاجىريبەنى يگەرۋ كەرەك. سوندا عانا ناعىز سارباز اتانادى. قولباسشىلاردىڭ ايتۋىنشا، تۇلەكتەر العان بىلىمدەرىن تاجىريبەدە دالەلدەپ ءجۇر.
www.24.kz
