ديماشتىڭ امەريكالىق تىڭدارمانى انشىگە ەرەكشە سىيلىق جاسادى

استانا. قازاقپارات - قازاق ءانشىسى ديماش قۇدايبەرگەنگە امەريكالىق سيلۆيا ساندوۆال ەسىمدى تىڭدارمانى ەرەكشە تارتۋ جاسادى، دەپ حابارلايدى قازاقپارات ءتىلشىسى.

بۇل تۋرالى ديماش ينستاگرامداعى پاراقشاسىندا جازدى.

«بۇگىن مەن ءۇشىن كەرەمەت كۇن بولدى! امەريكالىق سيلۆيا ساندوۆال اتتى تىڭدارمانىم ماعان توسىن سىي جاسادى! ول كىسى 1994-جىلى، 24- مامىردا، ءدال مەن دۇنيەگە كەلگەن كۇنى الەمدىك پوپ-مۋزىكا كورولى مايكل دجەكسوننىڭ وزىنەن قولتاڭبا العان ەكەن.

24 جىلدان كەيىن كوزىنىڭ قاراشىعىنداي ساقتاپ كەلگەن ۇلى ءارتيستىڭ قولتاڭباسى قويىلعان سۋرەتتى ۇلكەن تەبىرەنىسپەن ماعان سىيعا تارتتى! مايكل قاعازدى تەگىستەپ، ىڭعايلاپ جاتىپ، بايقاماي جىرتىپ العان ەكەن - «oops, sorry me» دەپ جازىپ، قول قويىپ بەرىپتى. سىيلىعىڭىز ءۇشىن كوپ راحمەت، سيلۆيا اپاي»، - دەپ جازدى ديماش ينستاگرام پاراقشاسىندا.

ايتا كەتسەك، قىتايدا بىلتىر وتكەن «I am Singer» بايقاۋىنىڭ فينالىندا ديماش قۇدايبەرگەن مايكل دجەكسوننىڭ ءانىن ورىنداعان بولاتىن. الەمگە ايگىلى ءانشىنىڭ بىرنەشە ءانىن بىرىكتىرىپ ورىنداعان ديماشتىڭ ونەرىنە جانكۇيەرلەرى ءتانتى بولعان ەدى.