مۇحتارحان دىلدابەكوۆ رەسپۋبليكالىق «كوكپار» فەدەراتسياسىن باسقاراتىن بولدى

استانا. قازاقپارات - «كوكپار» مەن «اۋدارىسپاق» فەدەراتسيالارىنىڭ جاڭا پرەزيدەنتتەرى تاعايىندالدى، دەپ حابارلايدى قازاقپارات ءتىلشىسى ق ر ۇلتتىق سپورت قاۋىمداستىعىنىڭ رەسمي سايتىنا سىلتەمە جاساپ.

ق ر ۇلتتىق سپورت قاۋىمداستىعى قۇرامىنداعى رەسپۋبليكالىق «كوكپار» جانە «اۋدارىسپاق» فەدەراتسيالارىنىڭ باسشىلىق قۇرامىنا وزگەرىستەر ەندى. قۇرىلتايشىلاردىڭ جالپى جينالىسىنىڭ حاتتاماسىنا سايكەس، رەسپۋبليكالىق «كوكپار» فەدەراتسياسىنىڭ پرەزيدەنتى بولىپ مۇحتارحان دىلدابەكوۆ، ال رەسپۋبليكالىق «اۋدارىسپاق» فەدەراتسياسىنىڭ پرەزيدەنتى بولىپ دانيار قوبىلاندين تاعايىندالدى.

داڭقتى بوكسشى مۇحتارحان دىلدابەكوۆ ەسىمى سپورت سۇيەر قاۋىمعا جاقسى تانىس. ءبىراق، ەكى وليمپيادا ويىندارىندا باق سىناعان، سيدنەي وليمپياداسىنىڭ كۇمىس جۇلدەگەرى، ازيا ويىندارىنىڭ جەڭىمپازى، ⅩⅣ ازيا ويىندارىنىڭ كۇمىس جۇلدەگەرى، الەم چەمپيوناتىنىڭ كۇمىس جۇلدەگەرى اتانعان اتاقتى بوكسشىنىڭ ۇلكەن سپورتقا دەيىن دودابۇزار كوكپارشى بولعانىن ەكىنىڭ ءبىرى بىلە بەرمەيدى»، - دەيدى ق ر ۇلتتىق سپورت قاۋىمداستىعىنان تولەگەن جاكىتاي.

مۇحتارحان دىلدابەكوۆ 1976-جىلى تۇركىستان وبلىسى ماقتارال اۋدانى، اباي اۋىلىندا دۇنيەگە كەلگەن. قازاقستان رەسپۋبليكاسىنىڭ ەڭبەك سىڭىرگەن سپورت شەبەرى. ءبىلىمى جوعارى. م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى، ق. ا. ياساۋي اتىنداعى حالىقارالىق قازاق - تۇرىك ۋنيۆەرسيتەتىن ءتامامداعان. «پاراسات» وردەنىنىڭ يەگەرى، وڭتۇستىك قازاقستان وبلىسىنىڭ قۇرمەتتى ازاماتى.

بوكس قولعابىن شەگەگە ىلگەن 2006-جىلدان مۇحتارحان دىلدابەكوۆ شىمكەنت قالاسىنىڭ 5№ بوكستان وليمپيادا رەزەرۆىنىڭ ماماندىرىلعان بالالار مەن جاس وسپىرىمدەر سپورت مەكتەبىنىڭ ديرەكتورى، 2008-جىلدان وسى ۋاقىتقا دەيىن «وڭتۇستىك قازاقستان وبلىسىنىڭ بوكستان وليمپيادا رەزەرۆىن دايىندايتىن بالالار مەن جاس وسپىرىمدەردىڭ ماماندىرىلعان سپورت مەكتەبىنىڭ» ديرەكتورى قىزمەتتەرىن اتقارىپ كەلگەن.

ال رەسپۋبليكالىق «اۋدارىسپاق» فەدەراتسياسىنىڭ پرەزيدەنتى بولىپ تاعايىندالعان دانيار قوبىلاندين 1984-جىلى الماتى قالاسىندا دۇنيەگە كەلگەن. ءبىلىمى جوعارى. ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ، ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ تۇلەگى. ەڭبەك جولىن اقتوبە وبلىسى پروكۋراتۋراسىنان باستاعان. ق ر كولىكتىك باقىلاۋ كوميتەتىندە، ق ر پرەزيدەنت اكىمشىلىگىندە، الماتى قالاسى اكىمدىگىندە قىزمەت ەتكەن. قازىرگى كەزدە جەكە كاسىپكەر.