ءوزىمىزدى كەشىرۋدى قالاي ۇيرەنەمىز؟

 استانا. قازاقپارات -ءبىز جاعىمسىز سەزىمدەرىمىزدى جويىپ، سانامىزدان قۋىپ، ءبىر سوزبەن ايتقاندا جانىمىزدىڭ تۇبىنە تىعىپ قويعىمىز كەلەدى. وسى كۇرەس ىشكى قاقتىعىستى تۋدىرادى.

 سونىڭ سەبەبىنەن، وزىڭىزگە كوڭىل تولماۋشىلىق، دەپرەسسيا جانە اشۋلانشاقتىق پايدا بولادى. ءوزىڭىزدى كىنالى سەزىنسەڭىز، قالاي كەشىرۋگە بولادى؟ ءسىزدى رەنجىتكەن ادامداردى وڭاي كەشىرۋىڭىز مۇمكىن، ءبىراق ءوزىڭىزدى كەشىرۋ قيىنعا سوعادى. وزىڭىزدەن باسقا كىنالايتىن ەشكىم جوق ەكەنىن بىلگەن ساتتە بۇل سەزىم تۇلا بويىڭىزدى جاۋلاپ الادى. كەلەسى قاعيدالارعا سۇيەنە وتىرىپ، ءوزىڭىزدى كەشىرۋدى ۇيرەنۋگە بولادى:

 1. ءوزىڭىزدىڭ ارەكەتىڭىزدى قابىلداپ ۇيرەنىڭىز. ارەكەتىڭىزدى، ءىسىڭىزدى جانە دارالىعىڭىزدى قابىلداعان كەزدە ادامداردىڭ جاقتاۋىن ىزدەمەۋگە بولاتىندىعىن تۇسىنە باستايسىز. ءسىز ءوزىڭىز ءۇشىن بەدەلدىسىز. بىرەۋدىڭ الدىندا ءوز سەزىمدەرىڭىز ءۇشىن كەشىرىم سۇراماۋىڭىزعا بولادى. ءسىز ءمىنسىز بولۋعا مىندەتتى ەمەسسىز.

 2. وزىڭىزگە ءوزىڭىز جاۋ بولماڭىز. ءسىز كەشىرۋگە لايىقتى ەكەندىگىڭىزگە سەنىڭىز. ادام بولعاندىقتان ءبارى قاتەلىك جىبەرەدى. اركەز ارەكەتىڭىز ءۇشىن ءوزىڭىزدى جازالاۋدىڭ قاجەتى جوق. ءسىز باقىتتى بولۋعا لايىقسىز، وتكەن ءۇشىن ءوزىڭىزدى ءومىر بويى قيناماڭىز.

 3. ەگەر بىرەۋ كىنانى ءاردايىم سىزگە اۋدارا بەرسە، ونىڭ ايتقان سوزدەرىنە قۇلاق اسپاڭىز. وزىڭىزگە جانە باسقالارعا ەشتەڭەگە قاراماستان كەشىرىمگە لايىق ەكەنىڭىزدى دالەلدەڭىز. ءوزىڭىزدى جاقسى بولۋ ءۇشىن عانا وزگەرتۋ كەرەك. ءسىز ورىنسىز شابۋىلدارعا قارسى تۇرا الاسىز، ءسىز - دارا تۇلعاسىز.

 4. ءمىنسىز بولۋعا تىرىسپاڭىز. ءسىزدىڭ ءوز مىقتى جاقتارىڭىز بار جانە ول ءسىزدى باسقالاردان ەرەكشەلەيدى. جاي ءوز دارالىعىڭىزدان ءلاززات الىڭىز. ءوزىڭىزدى ەشكىممەن سالىستىرماڭىز.

 5. ءوز سەزىمدەرىڭىز بەن ويلارىڭىزدى اشىق ءبىلدىرىڭىز. ادامدار ءسىزدىڭ شىنىمەن نەنى قالايتىنىڭىزدى جانە نە سەزىنەتىنىڭىزدى ءبىلۋى كەرەك. سول كەزدە باسقالارعا ۇناۋ ءۇشىن وتىرىك جىميۋدىڭ نەمەسە باسقا دا نارسەلەر جاساپ، كوپ ەنەرگيا كەتىرۋدىڭ قاجەتى بولمايدى. ءسىز بارىنە ۇناۋعا مىندەتتى ەمەسسىز. وزىڭىزگە ۇنامايتىن جانە اينالاڭىزداعىلار قولدامايتىن سەزىمدەرىڭىزدى ءتۇسىنىپ كورىڭىز.

 6. ەگەر ءوزىڭىزدى كەشىرمەسەڭىز نە بولۋى مۇمكىن؟ ومىرىڭىزگە ەشكىمدى كىرگىزبەۋىڭىز مۇمكىن. ءاردايىم جالعىز جۇرەسىز. ءتىپتى، ۇلكەن ەموتسيالىق جۇكتى ارقالاپ جۇرگەندىكتەن، اۋرۋعا شالدىعۋىڭىز مۇمكىن. وسىلاي بولعانىن قالاماساڭىز، قايتادان ويلانىڭىز.

 7. كەشىرۋدىڭ ماڭىزدىلىعىن ءتۇسىنىڭىز. كەشىرىم (ءوزىڭىزدى بولسىن، باسقانى بولسىن) تولىقتاي ەمدەلۋگە كومەكتەسەدى. كەشىرىمگە دەگەن جول قازىرگى شاقتا ءومىر ءسۇرىپ، بولاشاققا ۇمىتپەن قاراۋعا مۇمكىندىك بەرەدى.

 8. جوعارىدا ايتىلعانداي ءوزىڭىزدى بىردەن كەشىرۋ قيىنعا سوعادى. سوندىقتان كۇندە ەڭبەكتەنۋ كەرەك. مىسالى، وزگەرەمىن دەپ شەشكەن كۇننەن باستاپ، كۇندەلىك جازىپ ءجۇرىڭىز. ونى وقىپ، ءومىرىڭىز جاقسى جاعىنا وزگەرىپ جاتىرعانىن بايقاۋىڭىز مۇمكىن. باستىسى، وزىڭىزگە جاقسى بولۋ ءۇشىن كەشىرىپ ۇيرەنۋدىڭ ماڭىزدى ەكەنىن ءبىلىڭىز.

 9. ءار كۇنى كىشكەنتاي جەڭىستەرگە جەتىڭىز، قول جەتكىزگەن ناتيجەلەردى بەكىتىڭىز. وزىڭىزگە سەنسەڭىز، كۇن وتە ءبارى جاقسى بولا تۇسەدى، ءوزىڭىزدى ىڭعايلى سەزىنە باستايسىز. جەكە تۇلعا رەتىندە ءوزىڭىز تۋرالى كوبىرەك بىلۋدەن راقات الىپ ۇيرەنىڭىز. ول تۋرالى ەشقاشان وكىنبەيسىز. ءسويتىپ، ىشكى جان دۇنيەڭىزبەن جۇمىس ىستەپ ۇيرەنەسىز. دوستارىڭىزدان كومەك سۇراڭىز. ءسىز جالعىز ەمەسسىز جانە بۇل جولدا سىزگە قولداۋ قاجەت. باسقالاردى كەشىرسەڭىز، ءوزىڭىزدى دە كەشىرە الاسىز. ارەكەتىڭىز ءالسىن- ءالسىن ەسىڭىزگە ءتۇسۋى مۇمكىن. ءبىراق، ءوزىڭىزدى تولىقتاي كەشىرگەن كەزدە ول ەستەلىكتەرگە ءوزىڭىزدى تانۋ جولىنداعى ءومىردىڭ بەرگەن ساباعى رەتىندە عانا قاراي الاسىز.

Massaget.kz