اقتوبەدەگى كەن ورنىنىڭ جۇمىسشىسىن ۆاگون سۇيرەپ كەتتى

اقتوبە. قازاقپارات - اقتوبەدەگى ءدوڭ كەن- بايىتۋ كومبيناتىنىڭ جۇمىسشىسى اسلان قوجاعۇلوۆتى كەن ورنىندا ۆاگون سۇيرەپ كەتتى. ول بىرنەشە دەنە جاراقاتىمەن اۋرۋحاناعا ءتۇستى، دەپ حابارلايدى قازاقپارات ءتىلشىسى.

اقتوبەدەگى ءدوڭ كەن- بايىتۋ كومبيناتىندا تاعى دا وقىس وقيعا تىركەلدى. كەن ورنىندا جارىلىس جاساۋشى بولىپ جۇمىس ىستەيتىن ا. قوجاعۇلوۆتىڭ قابىرعاسى سىنىپ، جابىق باس- مي جاراقاتىن الدى.

«شاحتادا جارىلىس جاساۋشى بولىپ جۇمىس ىستەيتىن ادام جارالانىپ، اۋداندىق اۋرۋحاناعا جەتكىزىلدى. ناۋقاستىڭ ايتۋىنشا، ونىڭ سومكەسى ۆاگونعا ءىلىنىپ قالىپ، سۇيرەپ كەتكەن. جابىق باس- مي جاراقاتىن الدى. بەت تەرىسى زاقىمداندى. قازىرگى كەزدە ول اقتوبە قالاسىنداعى جەدەل جاردەم اۋرۋحاناسىنىڭ حيرۋرگيا بولىمىندە ەم قابىلداپ جاتىر. جاعدايى تۇراقتى» ، - دەدى حرومتاۋ اۋداندىق اۋرۋحاناسىنىڭ باس دارىگەرى جولباسبەك قامباروۆ.

ەڭبەك ينسپەكتسياسىنىڭ ماماندارى ءدوڭ كەن- بايىتۋ كومبيناتىندا تەكسەرۋ جۇمىستارىن باستادى.

ەسكە سالساق، 12-قازان كۇنى ءدوڭ كەن- بايىتۋ كومبيناتىنىڭ جۇمىسشىسى كەن استىندا قالىپ، دەنە جاراقاتىمەن اۋرۋحاناعا ءتۇستى. اقتوبە وبلىستىق ەڭبەك ينسپەكتسياسى باسقارماسى بۇل دەرەكتى دە تەكسەرىپ جاتىر.