ءۇشىنشى مەگاپوليس اتانعان شىمكەنتتىڭ ەڭ كەدەي اۋدانى جايلى نە بىلەمىز؟

استانا. قازاقپارات - ەلىمىزدىڭ ءۇشىنشى مەگاپوليسى اتانعان شىمكەنتتىڭ مارتەبەسى وسكەن سوڭ، قالالىقتار جاقسىلىقتان نيەتتى.

اسىرەسە، شىمقالانىڭ نازاردان تىس قالىپ قويعان، تاساداعى شاعىن اۋداندارىنىڭ تۇرعىندارى. وسى ورايدا NUR. KZ ءتىلشىسى قالانىڭ ەڭ كەدەي اۋدانى اتانىپ كەتكەن مەكەنگە باس سۇعىپ، حالىقتىڭ تىنىس-تىرشىلىگىمەن تانىسىپ قايتتى.

قالالىقتار اراسىندا «بالكا» نەمەسە «زەلەنايا بالكا» اتانىپ كەتكەن ەلدىمەكەنگە ات باسىن بۇرساڭىز مەگاپوليس ەمەس، ايدالادا ۇمىت قالعان وركەنيەتتەن كوش قالعان كورىنىستەرگە تاپ بولاسىز.

مۇندا كەيبىر ۇيلەرگە كىرسەڭىز، قورقىنىشتى فيلمدەردى ەشقانداي ارنايى ەففەكتىلەرسىز-اق تۇسىرە بەرۋگە بولاتىنداي...

ەكى قاباتتى ۇيلەردىڭ بىرىنە باس سۇعىپ قاراپ شىقتىق. مۇندا ادامدار ءومىر سۇرەدى دەگەنگە سەنۋ قيىن. قاراڭعى، اڭعال-ساڭعال، تەرەزەسى سىنىپ، قابىرعاسى سەتىنەپ، توبەسى قۇلاۋعا شاق قالعان ءدالىز، پودەزگە كىرگەننەن قولقاڭدى قاباتىن جايلاعان جاعىمسىز ءيىس...

كىرگەننەن دەنەڭ ءدىر ەتىپ، قورقىنىشقا بوي الدىراسىز. قوس قاباتتاعى بارلىق پاتەر تۇرعىنىنا ورتاق اجەتحانا، ونىڭ دا ەسىگى جوق، تەك «پەردە» تۇتىپ قويعان. ءبىر-ەكى بولمەنى پانالاعان وتباسىلار...

كوپشىلىگى بولمە ءۇشىن اقشا تولەپ جالعا العان. كەمىندە ءارقايسىسى 15-20 مىڭ تەڭگە تولەپ وتىر ەكەن. ەسىگىن اشىپ بىزبەن تىلدەسكەنىمەن ءجۇزىن كورسەتكىسى كەلمەگەن تۇرعىندار وسى باسپاناسىنان دا ايىرىلىپ قالامىز با دەپ قورقادى.

«ۋاقىتشا تۇرىپ جاتىرمىز» دەگەن تۇرعىندار 7-8 جىلدان بەرى ەكى بولمەنى جالداپ وتىرعانىن ايتادى.

جەرگىلىكتى تۇرعىنداردىڭ ايتۋىنشا، مۇنداعى ۇيلەردىڭ باسىم بولىگى جالعا بەرىلەدى. گازبەن جىلىتىلاتىن ءۇيدى 20 مىڭعا، كومىر جاعىپ، كادىمگى پەشپەن جىلىتىلاتىن ۇيلەردى 12-15 مىڭ تەڭگەگە جالعا الا الۋعا بولادى.

ال ۇيلەردىڭ سيقىن سۋرەتتەر «سويلەپ»، ايتىپ تۇر.

«ءوزىمنىڭ ءتورت بالام بار. كۇن كورۋ ءۇشىن بازارعا مايدا-شۇيدە ساتامىن. قالتام كوتەرمەگەندىكتەن، 12 مىڭ تەڭگەگە ءۇي جالداپ، وتىن جاعامىن»، - دەيدى جەرگىلىكتى تۇرعىننىڭ ءبىرى.

«زەلەنايا بالكا»، قازىرگى اتاۋى «كوكسايەك» ەلدى مەكەنىندە تۇراتىن ەر ادامداردىڭ دەنى - تابىلعان جۇمىسقا جەگىلەدى.

دالىرەگى، ءناپاقا ىزدەپ، قالادا جۇرتشىلىق «قۇل بازار» دەپ اتاپ كەتكەن «بەكەتكە» شىعادى. ال قىز-كەلىنشەكتەر تەمىر جول ۆوكزالىن جاعالاپ، سامسا، ءبالىش پىسىرىپ ساتاتىن كورىنەدى. كەيبىرى ءدامحانالاردا ىدىس جۋۋشى، ەدەن جۋۋشى بولىپ جۇمىس ىستەيدى.

«كافەدەگى ەدەن جۋۋشىنىڭ ايلىعى 35 مىڭ تەڭگە دەيدى. ءۇيدى 20 مىڭ تەڭگەگە جالداپ وتىرمىن. جۇمىسقا بارىپ كەلەم دەگەنشە، 15 مىڭ تەڭگەم كەتەدى. ءسويتىپ وعان دا كەلىسپەي، جۇمىسسىز وتىرمىن. قىرعى بازاردان بانان، الما اكەپ وسىندا ۇستەمە باعامەن ساتىپ كۇن كورۋگە ءماجبۇرمىن»، - دەيدى الماتى قالاسىنان كوشىپ كەلگەن 45 جاستاعى دانەليا.

جالپى «كوكسايەك» شاعىن اۋدانىندا 6 مىڭعا جۋىق حالىق تۇرادى. قالالىق اكمدىكتىڭ مالىمەتىنە سۇيەنسەك، مۇنداعى ۇيلەر وتكەن عاسىردىڭ 40-50-جىلدارى سالىنعان. ءتىپتى 30-جىلدارىندا سالىنعاندارى دا بار ەكەن.

ال «كوكسايەكتەگى» ۇيلەردىڭ سۇرىلەدى دەگەن سىبىس شىققالى ءبىرشاما ۋاقىت وتسە دە، بۇل جاڭالىققا «زەلەنايا بالكالىقتار» سەلت ەتە قويماعانىن بايقادىق.

جاقىن كۇندەرى بولاتىن جارقىن ومىرگە سەنە بەرمەيتىندەي. دەسە دە جۇمىسسىزدىق پەن جوقشىلىق جانىن جەپ، قاجىتقان جۇزدەرىنەن نۇر بايقالماسا دا، سۇرەڭسىز كۇندەرىنەن ءۇمىتتى.