قايرات نۇرتاس ۇشاقپەن ءجيى ۇشۋ دەنساۋلىعىنا اسەر ەتەتىنىن ايتتى

 استانا.قازاقپارات -  بۇگىن بەلگىلى ءانشى قايرات نۇرتاس دەنساۋلىق ساقتاۋ ءمينيسترى ەلجان ءبىرتانوۆتىڭ قولىنان قازاقستان رەسپۋبليكاسىنىڭ «دەنساۋلىق ەلشىسى» بولىپ تاعايىندالعانىن راستايتىن توسبەلگى مەن سەرتيفيكات الدى.

قايرات نۇرتاستان بولەك ءانشى، قازاقستاننىڭ ەڭبەك سىڭىرگەن قايراتكەرى قاراقات ءابىلدينا، اكتەر، قازاقستاننىڭ ەڭبەك سىڭىرگەن قايراتكەرى نۇرلان ءالىمجانوۆ، ءانشى، كاسىپقوي بوكسشى يبراگيم ەسكەندىر ەلىمىزدىڭ ەڭ العاشقى دەنساۋلىق ەلشىلەرى اتاندى.

«باسسەينگە تۇسەمىن. ول ادامنىڭ ءومىرىن ساقتايدى، ۇزاق ءومىر سۇرۋگە ىقپال ەتەدى. ءبىزدى ءبىر قينايتىنى ول - ۇشاقپەن كوپ ۇشامىز. سوندىقتان كىشكەنە دەنساۋلىققا زيانى بار. ءبىر ايدىڭ ىشىندە 34 رەت ۇشتىم، بارلىعى - 68 ساعات. سونىڭ ءبارىن كەتىرەتىن - سۋ، ءبىر جاعىنان حالىقتىڭ قوشەمەتى مەن ىقىلاسى كومەكتەسەدى. قولىڭ بوس بولعاندا، سپورتپەن اينالىسقان جاقسى. اينالىسقىم كەلەدى. وسىدان كەيىن باستايمىز» ، - دەدى ءانشى.

ەلجان ءبىرتانوۆ دەنساۋلىق ەلشىلەرىنە ءتوس بەلگىلەرىن، سەرتيفيكاتتارىن تاپسىردى. ساتتىلىك تىلەپ، قازاقستاندىقتاردى سالاۋاتتى ءومىر سالتىنا تارتۋعا اتسالىساتىندارىنا سەنىم ءبىلدىردى.

«ەلجان امانتاي ۇلىنا وسىنداي باستاماسىنا كوپتەن- كوپ راقمەت. ءبىزدى شاقىرىپ ونەر ادامدارىنا قولداۋ بىلدىرگەنى ءۇشىن دە العىس ايتامىن. بيلىك پەن حالىقتىڭ اراسىنداعى التىن كوپىر بولۋعا ءارقاشان دا دايىنبىز» ، - دەپ ءسوزىن تۇيىندەدى ول.

نازەركە ابيبۋللا

Baq.kz