قازاقتىڭ بايلىعى مەن فين تەحنولوگياسىن تۇيىندەستىرسە، ەكى تاراپقا دا پايدالى - ساۋلي نيينيستيە

None
None
حەلسينكي. قازاقپارات - قازاقتىڭ بايلىعى مەن فين تەحنولوگياسىن تۇيىندەستىرەسە، ەكى تاراپقا دا پايدالى. بۇل تۋرالى كەشە قازاقستان پرەزيدەنتىمەن شاعىن جانە كەڭەيتىلگەن قۇرامدا كەزدەسۋ وتكىزگەننەن كەيىنگى بىرلەسكەن مالىمدەمە بارىسىندا فينليانديا پرەزيدەنتى ساۋلي نيينيست ايتتى،

 دەپ حابارلايدى قازاقپاراتتىڭ ارناۋلى ءتىلشىسى حەلسينكيدەن.

«قازاقستان ورتالىق ازياداعى ماڭىزدى ەلدىڭ ءبىرى جانە اتالعان وڭىردەگى فينليانديانىڭ ساياسي جانە ساۋدا- ەكونوميكالىق سالالارداعى باستى سەرىكتەسى سانالادى. قازاقستان ءتۇرلى تابيعي رەسۋرستار مەن بايلىققا يە بولىپ وتىر. ال فينليانديادا تەحنولوگيا بار. وسىناۋ اسپەكتىلەردى تۇيىندەستىرەر بولساق، ەكى تاراپقا دا بارىنشا ءتيىمدى بولار ەدى»، - دەدى فينليانديا پرەزيدەنتى.

سونىمەن قاتار ول فينليانديا مەن قازاقستان وزگە دە سالالاردا ءتيىمدى ىنتىماقتاستىقتى جولعا قويعانىن اتاپ ءوتتى.

«بىزگە قازاقستاننان ءبىلىم جانە مەديتسينا سالالارىندا تاجىريبە جيناۋ ءۇشىن كوپتەگەن جاستار كەلەدى. فينليانديا الەمدە ەڭ تۇراقتى مەملەكەتتەردىڭ بىرىنە قالاي اينالعاندىعى تۋرالى مالىمەتتەرىمىزدى دە زور ريزاشىلىقپەن بولىسە الامىز»، - دەدى ساۋلي نيينيستيە.

 ەستەرىڭىزگە سالا كەتسەك، بۇگىن ەلباسى فينليانديا پرەزيدەنتى ساۋلي نيينيستيەمەن شاعىن جانە كەڭەيتىلگەن قۇرامدا كەزدەسۋ وتكىزدى.

كەزدەسۋدەن كەيىنگى بىرلەسكەن مالىمدەمە بارىسىندا نۇرسۇلتان نازاربايەۆ قازاقستان- فينليانديا بيزنەسمەندەرى 600 ميلليون دوللاردىڭ كەلىسىمشارتىن جاساسقانىن، قازاق پەن فيننىڭ تاريحى دا، تاعدىرى دا ۇقساس ەكەندىگىن، ەلىمىزدىڭ كولىك الەۋەتى زور ەكەندىگىن باسا ايتتى.

 ساپار اياسىندا مەملەكەت باسشىسى كەشە فين بيزنەس كاپيتاندارىمەن جۇزدەستى.

كەزدەسۋ بارىسىندا مەملەكەت باسشىسى فينليانديادان قازاقستان ارقىلى قىتايعا جاڭا تەمىر جول باعدارى اشىلاتىندىعىن ايتتى جانە فين كومپانيالارىن ەلىمىزدەگى اگروونەركاسىپتىك كەشەندەگى جوبالاردى جۇزەگە اسىرۋعا شاقىردى.

فين كومپانيالارى ءۇشىن قازاقستاننىڭ تۋريزم سالاسى دا تارتىمدى ەكەنىن، ءىت- كومپانيالارىنا دا قولايلى جاعداي جاسالاتىندىعىن اتاپ ءوتتى.

اۆتور: مارلان جيەمباي

سوڭعى جاڭالىقتار