قازاق پەن فيننىڭ تاريحى دا، تاعدىرى دا ۇقساس - ەلباسى
بۇل تۋرالى بۇگىن فينليانديا پرەزيدەنتى ساۋلي نيينيستيەمەن شاعىن جانە كەڭەيتىلگەن قۇرامداعى كەزدەسۋلەردەن كەيىنگى بىرلەسكەن مالىمدەمە بارىسىندا ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپاراتتىڭ ارناۋلى ءتىلشىسى حەلسينكيدەن.
«ءبىزدىڭ ەلدەرىمىزدىڭ تاريحى دا، تاعدىرلارى دا ۇقساس. قازاقستان مەن فينليانديا ءبىرتۇتاس يمپەريانىڭ قۇرامىندا بولدى، ءبىز كوبىرەك، سىزدەر ازىراق جانە ءبىزدىڭ بابالارىمىز كوپتەگەن جانتۇرشىگەرلىك ۋاقىتتى باستان كەشىردى. مۇمكىن ءدال سودان تولەرانتتىلىق العان شىعارمىز. الەمدە ءبىزدى قۇرمەتتەيدى. بىردە-ءبىر كورشىمىزبەن جانجالىمىز جوق. بىزدە جانجالداسۋشى تاراپتاردىڭ كەزدەسۋلەرى وتەدى، فينليانديادا دا. ەڭ جارقىن مىسال، ءدال وسى جەردە تاياۋدا عانا پۋتين مەن ترامپ كەزدەستى. بىزدە سيريا تاقىرىبىنداعى كەلىسسوزدەردىڭ 9 كەزەڭى ءوتتى»، - دەپ اتاپ ءوتتى مەملەكەت باسشىسى.
نۇرسۇلتان نازاربايەۆ قازاقستان ەۋروپالىق وداقپەن ىنتىماقتاستىقتى تەرەڭدەتۋ تۋرالى شارتقا قول قويعانىن جانە وسى رەتتە فينليانديا تاراپىنىڭ ەڭ ءبىرىنشى بولىپ قولداعاندىعىن اتاپ ءوتتى.
«اتالعان قۇجاتتى بارلىق مەملەكەتتەر راتيفيكاتسيالاۋى ءۇشىن بىزگە قولداۋ كورسەتەسىزدەر دەپ ۇمىتتەنەمىز. ءبىز گۋمانيتارلىق ءبىلىم سالاسىنداعى بايلانىستارىمىزعا دا نازار اۋدارامىز. قازاقستاندىق ستۋدەنتتەر فينليانديا ۋنيۆەرسيتەتتەرىندە ءبىلىم الۋدا. كەشە ستۋدەنتتەردىڭ ءبىر توبىمەن كەزدەستىم. بۇل دا ءبىزدىڭ ەۋروپاداعى ماڭىزدى ساياسي جانە ەكونوميكالىق سەرىكتەسىمىزبەن ىنتىماقتاستىعىمىزدىڭ بولىگى»، - دەدى ق ر پرەزيدەنتى.
ەستەرىڭىزگە سالا كەتسەك، بۇگىن ەلباسى فينليانديا پرەزيدەنتى ساۋلي نيينيستيەمەن شاعىن جانە كەڭەيتىلگەن قۇرامدا كەزدەسۋ وتكىزدى.
كەزدەسۋدەن كەيىنگى بىرلەسكەن مالىمدەمە بارىسىندا نۇرسۇلتان نازاربايەۆ قازاقستان- فينليانديا بيزنەسمەندەرى 600 ميلليون دوللاردىڭ كەلىسىمشارتىن جاساسقان اتاپ ءوتتى.
ساپار اياسىندا مەملەكەت باسشىسى كەشە فين بيزنەس كاپيتاندارىمەن جۇزدەستى.
كەزدەسۋ بارىسىندا مەملەكەت باسشىسى فينليانديادان قازاقستان ارقىلى قىتايعا جاڭا تەمىر جول باعدارى اشىلاتىندىعىن ايتتى جانە
فين كومپانيالارىن ەلىمىزدىڭ اگروونەركاسىپتىك كەشەندەگى جوبالاردى جۇزەگە اسىرۋعا شاقىردى.
