ايىنا ميلليونعا جۋىق جالاقى الاتىن مينيسترلەر كىم؟

None
None
استانا. قازاقپارات - قاراعاندى وبلىسىنىڭ اكىمىنەن سوڭ، مينيسترلەر دە قانشا جالاقى الاتىنىن اشىق ايتا باستادى.

ءبىر شەنەۋنىكتىڭ جىلدىق تابىسىنا ءبىر ءۇي ساتىپ الۋعا بولادى دەپ حابارلايدى «ەۋرازيا» ءبىرىنشى ارناسى.

جۋىردا عانا قارجى ءمينيسترى قىزمەتىنە تاعايىندالعان اليحان سمايىلوۆتىڭ بانك كارتاسىنا اي سايىن ءبىر ميلليونعا جۋىق جالاقى تۇسەتىن بولادى. بۇل تۇراقتى تۇردە بەرىلىپ وتىراتىن سىياقىلاردى قوسپاعانداعى سوما. ونىڭ جالاقىسى ەلىمىزدەگى ەڭ تومەنگى جالاقى مولشەرىنەن 34 ەسە كوپ.

«ءالى ءبىر اي بولمادى. مەن 18- قىركۇيەك كۇنى قىزمەتكە تاعايىندالدىم. ءبىراق، بىلۋىمشە، قولىما تازا 950-960 مىڭ تەڭگە الاتىن بولامىن»، - دەدى قارجى ءمينيسترى.

بارلىق ءمينيستردىڭ جالاقىسى بىردەي دەرلىك. ايلىق تابىستىڭ كولەمى قانداي قىزمەتتە وتىرعانىنا ەمەس، جۇمىس وتىلىنە بايلانىستى تاعايىندالادى. قوعامدىق دامۋ ءمينيسترى دارحان قالەتايەۆتىڭ ايتۋىنشا، قازىرگى تاڭدا ونىڭ جالاقىسى بۇرىنعىدان كەمىپ قالعان.

«شامامەن، قوشانوۆ ايتقانداي، 900 مىڭ تەڭگەنىڭ ۇستىندە. وبلىستىق اكىمنىڭ جالاقىسىمەن بىردەي. مەن «سامۇرىق-قازىنادا» جۇمىس ىستەگەندە ودان ەكى ەسە كوپ الاتىنمىن»، - دەپ ەسىنە الدى قالەتايەۆ.

ورتاشا ەسەپپەن العاندا، ءبىر ءمينيستردىڭ ءتورت ورىنباسارى بار. ولاردىڭ ايلىق جالاقىسى مينيستردىكىنەن 200 مىڭعا كەم. بارلىق سالىق تۇرلەرىن الىپ قوسپاعاندا، جۇمىس ءوتىلى 20 جىلعا تەڭ قارجى ۆيتسە-ءمينيسترى بەرىك شولپانقۇلوۆ 700 مىڭ تەڭگە جالاقى الادى.

«بۇل سۇراققا جاۋاپ بەرۋ قيىن. اقشا ەشقاشان كوپتىك ەتپەيدى. سوندىقتان، كوڭىلىمنەن شىعادى نە شىقپايدى دەپ ايتۋ قيىن. ەگەر، بارلىق وتباسى مۇشەلەرى جۇمىس ىستەگەندە، جەتەر ەدى»، - دەيدى شولپانقۇلوۆ.

مەملەكەتتىك قىزمەتكەرلەردىڭ جالاقىسىنا مەملەكەتتىك قازىنادان 1 تريلليون تەڭگە كەتەدى. بۇل شىعىن ءالى دە وسە بەرمەك، سەبەبى جاڭا جىلدان باستاپ شەنەۋنىكتەردىڭ جالاقىسى وسەتىن بولادى.

ايتا كەتەيىك، بۇعان دەيىن كوكشەتاۋ اكىمىنىڭ قانشا ايلىق الاتىنى تۋرالى حابارلاعان بولاتىنبىز. سونىمەن قاتار، پاۆلودار قالاسىنىڭ باسشىسى مەن تالدىقورعان اكىمى دە ءوز جالاقى مولشەرىن جاريالادى.

 

سوڭعى جاڭالىقتار