ەلباسى فينليانديادا ساۋلي نيينيستەمەن شاعىن قۇرامدا كەزدەسۋ وتكىزۋدە
كەزدەسۋ فينليانديا باسشىسىنىڭ جۇمىس رەزيدەنتسياسىندا ءوتىپ جاتىر، دەپ حابارلايدى قازاقپاراتتىڭ ارناۋلى ءتىلشىسى حەلسينكيدەن.
رەسمي ساپارمەن كەلگەن قازاقستان پرەزيدەنتىن فينليانديا باسشىسىنىڭ رەزيدەنتسياسى الدىندا قارسى الۋ سالتاناتتى شاراسى تۋرا 10 مينۋتقا سوزىلدى. الدىمەن رەزيدەنتسيا قاقپاسىنىڭ سىرتىنا مارتەبەلى مەيمانداردى قارسى الاتىن قۇرمەتتى قاراۋىل ساپ تۇزەدى. سالدەن كەيىن ەلباسى مىنگەن كولىك رەزيدەنتسيا قاقپاسىنىڭ الدىنا كەلىپ توقتاپ، نۇرسۇلتان نازاربايەۆتى قارسى الۋعا ساۋلي نيينيستە شىقتى.
پرەزيدەنتتەر قىزىل كىلەم ۇستىمەن رەزيدەنتسيا قورشاۋىنا كىرگەن سوڭ عيمارات ەسىگىنىڭ الدىندا ەستەلىك سۋرەتكە ءتۇستى. وسىدان كەيىن ەكى ەلدىڭ مەملەكەتتىك ءانۇراندارى ورىندالدى. كەلەسى كەزەكتە فينليانديا باسشىسى قازاقستان پرەزيدەنتىنە ءوز ەلىنىڭ ۇكىمەت مۇشەلەرىن تانىستىردى. مۇنان كەيىن قوس مەملەكەت باسشىلارى قۇرمەتتى قاراۋىلعا ىزەت كورسەتتى. بۇدان ءارى قازاقستان دەلەگاتسياسى مۇشەلەرىمەن تانىسۋ شاراسى ءوتتى.
نۇرسۇلتان نازاربايەۆ فين پرەزيدەنتىنىڭ جۇمىس رەزيدەنتسياسىنا كىرگەننەن كەيىن الدىمەن، قۇرمەتتى قوناقتار كىتابىنا ەستەلىك جازبا قالدىرىپ، سارى بولمەدە سالتاناتتى قابىلداۋ شاراسىنا قاتىستى، ساۋلي نيينيستەمەن بىرگە رەسمي تۇردە سۋرەتكە ءتۇستى.
قازىرگى ۋاقىتتا قازاقستان مەن فينليانديا پرەزيدەنتتەرى شاعىن قۇرامدا كەزدەسۋ وتكىزىپ جاتىر. ودان كەيىن بولاتىن كەڭەيتىلگەن قۇرامداعى كەزدەسۋ بارىسىندا ءبىرقاتار قۇجاتقا قول قويۋ جوسپارلانعان.
ەستەرىڭىزگە سالا كەتسەك، 16- قازان كۇنى قازاقستان پرەزيدەنتى نۇرسۇلتان نازاربايەۆ رەسمي ساپارمەن فينلياندياعا كەلىپ، ساپار اياسىندا ەلباسى فين بيزنەس كاپيتاندارىمەن كەزدەستى.
كەزدەسۋ بارىسىندا مەملەكەت باسشىسى فينليانديادان قازاقستان ارقىلى قىتايعا جاڭا تەمىرجول باعدارى اشىلاتىندىعىن ايتتى جانە فين كومپانيالارىن ەلىمىزدىڭ اگروونەركاسىپتىك كەشەندەگى جوبالاردى جۇزەگە اسىرۋعا شاقىردى.
فين كومپانيالارى ءۇشىن قازاقستاننىڭ تۋريزم سالاسى دا تارتىمدى ەكەنى، ІТ- كومپانيالارعا دا قولايلى جاعداي جاسالاتىندىعى اتاپ ءوتىلدى.
