شەتەلدىك تۋريستەر «قورقىتتى» كورۋگە كەلەدى

استانا. قازاقپارات - قىزىلوردا وبلىسى قارماقشى اۋدانىندا ورنالاسقان قورقىت اتا كەسەنەسىنە جىل سايىن كەلەتىن تۋريستەردىڭ سانى ارتۋدا. ارحيتەكتۋرالىق كەسكىنى ەرەكشە كەسەنە كەلۋشىلەرگە ۇمىتىلماس اسەر سىيلايتىنى ءسوزسىز.

مۇندا قاسيەتتى مەكەننىڭ قۇدىرەتتىلىگىن سەزىنۋگە اسىعاتىندارعا دا قاجەتتى جاعدايلار جاسالعان. سونىڭ ناتيجەسىندە وڭىردە ىشكى تۋريزمنىڭ دامۋىنا جول اشىلىپ كەلەدى.

جالپى قىزىلوردا دەگەندە، كەز- كەلگەن ادامنىڭ ويىنا قورقىت اتا كەلەدى. YIII عاسىردا ءومىر سۇرگەن اتاقتى كۇيشى ءارى قوبىزشى وزىنەن كەيىن مول مۇرا قالدىرعان. سىر بويىنداعى جانكەنت قالاسىندا دۇنيەگە كەلگەن ويشىل تۇلعا جەلماياسىنا ءمىنىپ، ماڭگىلىك باقىت مەكەنىن ىزدەگەنى تاريحتان دا بەلگىلى. وسىنداي اڭىز ادامنىڭ قۇرمەتىنە سالىنعان كەسەنەنىڭ بۇگىندە كەلبەتى دە ەرەكشە.

جالپى، اتالمىش كەسەنەنىڭ قۇرىلىسى 1980 -جىلى باستالعان. تاريحي نىساننىڭ بوي كوتەرۋىنە وسى كەزدە اۋدان اكىمى بولعان ەلەۋ كوشەربايەۆ مۇرىندىق ەتكەن. باستاپقىدا كەشەن بىرنەشە ەسكەرتكىشتەردەن قۇرالعان. 1997 -جىلى قايتا جوندەۋ جۇمىستارى جۇرگىزىلىپ، جاڭادان امفيتەاتر مەن قوناق ءۇي عيماراتتارى سالىندى. سونداي - اق، 2014 -جىلى مەموريالدى كەشەنگە وبلىستىق بيۋدجەت قاراجات ءبولىنىپ، رەكونسترۋكتسيا جۇمىستارى جۇرگىزىلدى. ناتيجەسىندە ستەلا، امفيتەاتر، قىلۋەت، مۋزەي جانە قوشقار مۇسىنىنەن تۇراتىن تۇتاس ارحيتەكتۋرالىق انسامبل قايتا جاڭعىردى.

قورقىت اتا كەسەنەسى «باتىس ەۋروپا - باتىس قىتاي» تاس جولىنىڭ بويىندا ورنالاسقان. مۇندا الىس ساپارعا شىققان جولاۋشىلاردى ءجيى كەزدەستىرۋگە بولادى. «مەموريالدى كەشەنگە كەلگەن ادام ەرەكشە كۇيگە بولەنەدى. قورقىت اتانىڭ قاسيەتتىلىگى سەزىلەدى. جەلدى كۇنى كەشەندەگى قوبىزدان شىققان اسەم كۇي جۇرەگىڭدى باۋراپ الادى. اينالادا ورناعان تىنىشتىق ءبىر ءسات قاربالاس تىرشىلىكتى ۇمىتۋعا مۇمكىندىك بەرەدى. سول سەبەپتەن بولار، جىل سايىن وتباسىمىزبەن وسىندا كەلىپ تۇرامىز. كەشەن جانىنداعى زيارات ەتۋ ورتالىعىندا تۇنەپ، دۇعا - تىلەكتەرىمىزدى ايتامىز. قۇران باعىشتاۋعا ءارى ناماز وقۋعا بارلىق جاعدايلار جاسالعان»، - دەيدى كەشەنگە كەلۋشى ارمان سانبايەۆ.

2000 -جىلى كەشەن جانىنان قورقىت اتا ءداۋىرىنىڭ مادەنيەتى مەن تاريحى جايلى سىر شەرتەتىن مۋزەي اشىلدى. مۇندا اتاقتى قوبىزشىنىڭ كۇيلەرى ساقتالعان. سونداي - اق، عۇلامانىڭ دۇنيەگە كەلگەن جەرى - جانكەنت قالاسىنان تابىلعان ەكسپوناتتاردى تاماشالاۋعا بولادى.

«وكىنىشكە وراي، قورقىت اتانىڭ ءوزى تۇتىنعان زاتتارى ساقتالماعان. ءبىزدىڭ مۋزەيىمىزدە ول كىسىنىڭ كۇيلەرى بار. سونداي - اق، جانكەنت قالاسىندا جۇرگىزىلگەن قازبا- جۇمىستارى كەزىندە تابىلعان جادىگەرلەر جەتەرلىك. ەكى باستى قوشقار ءمۇسىنى، بارىس بەينەسىندە سۇيەكتەن جاسالعان بۇيىمداردى كورۋگە بولادى. كەراميكالىق ىدىستار دا وتكەن كۇندەردەن سىر شەرتەدى. جالپى، جىلىنا مەموريالدى كەشەندى تاماشالاۋعا 16 مىڭنان استام تۋريست كەلەدى. ولاردىڭ بارلىعى مۋزەي ءىشىن ارالاپ شىعادى. كەلگەن قوناقتارعا ساپالى قىزمەت كورسەتۋگە تىرىسامىز»، - دەيدى مۋزەي ەكسكۋرسوۆودى ايگۇل بەرماحانوۆا.

قورقىت اتا كەشەنى وتكەن جىلى ەلىمىزدە ءوز دەڭگەيىندە اتالىپ وتكەن «ەكسپو - 2017» حالىقارالىق كورمەسىنىڭ ساياحاتتىق باعىتى رەتىندە بەلگىلەنگەن بولاتىن. وسىعان وراي، كەشەن جانىنان ەتنواۋىل اشىلىپ، ماۋسىم - قازان ايلارى ارالىعىندا تابىستى جۇمىس جاساعان بولاتىن.

«حالىقارالىق كورمە كەزىندە كەشەنگە 13 مىڭنان استام قوناق كەلدى. ولاردىڭ ءۇش مىڭنان استاما شەتەلدىك تۋريستەر بولدى. بۇل وتە قۋانتارلىق جاعداي. ەلىمىزدىڭ ابىرويىن اسقاقتاتقان شارا كەزىندە، ءبىز دە ءوز ءوڭىرىمىزدى الەمگە تانىستىرۋعا مۇمكىندىك الدىق. ەندىگى كەزەكتە، كەشەندى ءارى قاراي ناسيحاتتاۋ جۇمىستارى كوبىرەك كوڭىل ءبولۋدى جوسپارلاپ وتىرمىز. ءىرى جوبالار قولعا الىناتىن بولادى»، - دەدى قىزىلوردا وبلىستىق كاسىپكەرلىك جانە تۋريزم باسقارماسىنىڭ ءبولىم باسشىسى باعدات اليەۆ.

zhasalash.kz