حاڭجوۋدا قازاقستاننىڭ ەكونوميكالىق زەرتتەۋلەر ورتالىعى اشىلدى

حاڭجوۋ. قازاقپارات - جىجياڭ ەكونوميكا جانە قارجى ۋنيۆەرسيتەتىندە قازاقستان ەكونوميكالىق زەرتتەۋلەر ورتالىعىنىڭ سالتاناتتى اشىلۋ ءراسىمى بولدى، دەپ حابارلايدى قازاقپارات مەنشىكتى ءتىلشىسى.

ورتالىقتى اشۋعا قازاقستان رەسپۋبليكاسىنىڭ قىتايداعى ەلشىلىگى مەن شاڭحاي قالاسىنداعى باس كونسۋلدىعى قولعابىس ەتتى. جاڭا ورتالىقتا قىتاي ستۋدەنتتەرى مەن ساراپشىلارى قازاقستاننىڭ الەۋمەتتىك- ەكونوميكالىق دامۋى، تاريحى، مادەنيەتى جانە داستۇرلەرىمەن تانىسادى.

شارادا ءسوز سويلەگەن قازاقستاننىڭ قىتايداعى ەلشىسى شاحرات نۇرىشيەۆ جينالعاندارعا «قازاقستان-2050» ستراتەگياسىنىڭ نەگىزگى باعىتتارى، ق ر پرەزيدەنتىنىڭ «قازاقستاندىقتاردىڭ ءال- اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋى، «بولاشاققا باعدار: رۋحاني جاڭعىرۋ» باعدارلاماسى جانە قازاقستاننىڭ الەۋمەتتىك- ەكونوميكالىق جانە ساياسي دامۋىنىڭ باسقا دا مىندەتتەرى تۋرالى ايتىپ بەردى.

ەسكە سالا كەتەيىك، قازاقستاننىڭ قىتايداعى العاشقى ورتالىعى بەيجىڭ شەت تىلدەر ۋنيۆەرسيتەتىندە 2015 -جىلعى 13 - جەلتوقساندا اشىلعان بولاتىن. كەيىننەن شاڭحاي، داليان، شيان شەت تىلدەرى ۋنيۆەرسيتەتتەرىندە دە قازاقستاننىڭ ورتالىقتارى اشىلعان. بۇل جولعى ورتالىق - بەسىنشىسى، ال ەكونوميكالىق باعىتتاعى العاشقى ورتالىق بولىپ وتىر.

ورتالىقتىڭ باستى مىندەتتەرىنىڭ ءبىرى - «استانا» حالىقارالىق قارجى ورتالىعىمەن سەرىكتەستىك بايلانىستاردى نىعايتۋ. حاڭجوۋ قىتايدىڭ جاڭا تەحنولوگيالاردى دامىتۋ جونىندەگى ءىرى مەگاپوليستەرىنىڭ ءبىرى ەكەنىن ەسكەرسەك، سيفرلىق ەكونوميكا، بلوكچەين تەحنولوگيالار، يننوۆاتسيالىق ستارتاپتار جانە ەلەكتروندى ساۋدا سالالارىنداعى تاجىريبە الماسۋ وسى ورتالىقتىڭ ەنشىسىندە بولماق.

 ورتالىقتىڭ اشىلۋىنا وراي، حاڭجوۋدا قاراعاندى فيلارمونياسى سيمفونيالىق وركەسترىنىڭ سالتاناتتى كونسەرتى ءوتتى.