دانيار اقىشەۆ نەسيە نارىعىنداعى جاعدايعا تۇسىنىك بەردى
بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا ۇلتتىق بانك ءتوراعاسى دانيار اقىشەۆ ءمالىم ەتتى، دەپ حابارلايدى قازاقپارات.
«نەسيەلىك نارىق قالپىنا كەلىپ جاتىر. جىل باسىنان بەرى بانكتەردىڭ نەسيەلەر كولەمى 2,5 پايىزعا نەمەسە 313 ميلليارد تەڭگەگە ءوسىپ، 13 تريلليون تەڭگەنى قۇرادى. قايتا قۇرىلىمدالىپ جاتقان جانە ليتسەنزياسىنان ايىرىلعان بانكتەردى قوسپاعاندا، ەكونوميكانى نەسيەلەۋدىڭ جىلدىق ءوسۋى 11,6 پايىز، ياعني 1,3 تريلليون تەڭگە بولدى»، - دەدى دانيار اقىشەۆ.
وسى ورايدا، ول اعىمداعى جىلدىڭ 8 ايىندا جاڭا نەسيە بەرۋ 28,1 پايىزعا نەمەسە 1,9 تريلليون تەڭگەگە وسكەنىن اتاپ ءوتتى.
«كاسىپورىندارعا تەڭگەدەگى نەسيەلەر بويىنشا ستاۆكا جىل باسىنداعى 13,2 پايىزدان 2018-جىلعى تامىزدا 12,2 پايىزعا دەيىن تومەندەدى. ۇلتتىق بانكتىڭ اعىمداعى باسىمدىعى - مەملەكەت باسشىسىنىڭ قازاقستان حالقىنا جولداۋىندا بەرىلگەن تاپسىرمالارىن ورىنداۋ. ءبىز ۇكىمەت جانە بانكتەرمەن بىرگە وتىمدىلىكتى بەرۋ تەتىكتەرىن جەدەل ازىرلەۋگە دايىنبىز»، - دەپ ءتۇيدى ۇلتتىق بانك ءتوراعاسى.
ايتا كەتەيىك، جالپى وتىرىستا «2018-2020-جىلدارعا ارنالعان رەسپۋبليكالىق بيۋجەت تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانىپ جاتىر.
بيىلعى جىلى ينفلياتسيا 5-7 پايىزدىق ماقساتتى دالىزدە قالادى.
سونىمەن قاتار، جىل باسىنان بەرى ۆاليۋتا نارىعىندا تەڭگە باعامى 10,4 پايىزعا السىرەگەنى بەلگىلى بولدى.