سەۆيلدىك شاشتاراز ەلوردا تۇرعىندارىن تامساندىردى

None
None
 استانا. قازاقپارات - «استانا وپەرا» ساحناسىندا وراسان زور جەتىستىكپەن «سەۆيلدىك شاشتاراز» وپەراسىنىڭ پرەمەراسى ءوتتى.

زالدا ينە شانشار جەر قالمادى، تولاسسىز دۋ قول شاپالاق سوققان كورەرمەندەر ارتىستەرگە گۇل سىيلاپ، قوشەمەتىن كورسەتتى، ال «براۆو» دەپ ءۇن قاتقان داۋىستارى 15 مينۋت بويى ساحنادا قالىقتاپ تۇردى.

يتاليالىق كومپوزيتور دجواككينو ءروسسينيدىڭ وپەراسىن تانىمال قازاقستاندىق ارتىستەر، سونىمەن قاتار يتاليادان شاقىرىلعان تەنور فەدەريكو بۋتتاسسو ورىندادى. فيگارو پارتياسىن اتاقتى باريتون قازاقستاننىڭ ەڭبەك سىڭىرگەن قايراتكەرى سۇندەت بايعوجين ۇسىندى. ءانشى ءۇشىن وسى پارتيانى ورىنداۋدىڭ ەكىنشى كۇنى بولسا دا، ونىڭ داۋىسى قالىقتاپ، جارقىن ۆوكالدىق بوياۋلارى تىڭدارماننىڭ قۇلاق قۇرىشىن قاندىردى.

فيگارونىڭ ءرولى جەتەكشى سوليستىڭ رەپەرتۋارىنداعى ەڭ ماڭىزدى پارتيالاردىڭ ءبىرى ەكەنى ءسوزسىز.



گراف الماۆيۆا بەينەسىندە فەدەريكو بۋتتاسسو ونەر كورسەتتى. يتاليالىق تەنوردىڭ اتالمىش پارتيانى قىرىقتان استام رەت ورىنداعانى بەلگىلى، وسىنشاما مول تاجىريبەگە يە بولا، «استانا وپەرا» ساحناسىندا ف. بۋتتاسسو قويىلىم بارىسىنان ءلاززات الدى، بۇل ونىڭ ەركىندىگىنەن، تاماشا ۆوكالدىق دايىندىعىنان بايقالدى.

الەكساندر كراسيكوۆتىڭ سومداۋىنداعى بارتولو تىپتەن كەرەمەت بولدى، ءانشى بۇل رولدە جاڭا قىرىنان اشىلدى، ال ا. كراسيكوۆتىڭ شىعارماشىلىق جولىن باقىلاۋدا ۇستايتىن جاندار ءارتىستىڭ ورىنداۋشىلىق تۇرعىسىنان وسكەندىگىن اتاپ ءوتتى.



باشقۇرتستان رەسپۋبليكاسىنىڭ ەڭبەك سىڭىرگەن ءارتىسى الفيا كاريموۆانىڭ ورىنداۋىنداعى روزينا ەركە نازدى، قىلىقتى ءارى ازداپ ادۋىندى قىز بولىپ شىعا كەلدى، ونىڭ تەڭدەسسىز داۋىسىن تىڭدارمان قاۋىم العاشقى نوتاسىنان- اق تانىدى.

سۇيكىمدى الفيا كاريموۆا ويناپ قانا قويماي، سونىمەن قاتار ساحناداعى بار ارەكەتتى ءون بويىنان وتكىزىپ، سول ساحنادا عۇمىر كەشكەندەي. تايىر ءتاجىنىڭ ۇسىنعان بازيليو پارتياسى بەينەگە سايكەس دۇنيەقور ءارى ساراڭ بولدى.



ت. ءتاجىنىڭ داۋىسى ەرەكشە شىرقالدى. ءارتىس اباي اتىنداعى ماوبت ساحناسىندا ونەر كورسەتەتىنى بەلگىلى، الماتى تىڭداۋشىلارى ونى ۇلتتىق رەپەرتۋاردىڭ ۇزدىك ورىنداۋشىسى رەتىندە بىلەدى، الايدا «استانا وپەرا» ساحناسىنداعى ونەرىنەن بايقاعانىمىزداي، روسسينيدىڭ رەپەرتۋارى دا ءارتىستىڭ وڭ جامباسىنا كەلەدى. يتاليالىق تەگى بار بولاشاعى جارقىن ءانشى ماليكا مينيزيني ەلوردالىق كورەرمەن نازارىنا بەرتا پارتياسىن ۇسىندى - جاس بولسا دا، دوكتور بارتولونىڭ ءۇي شارۋاسىنداعى كارى قىزمەتشىسىنىڭ بەينەسىن ءدال سومداي الۋى ەرەكشە جاعداي.

ءسوزسىز، بۇل مەتستسو- سوپرانو ماليكا ءمينيزينيدىڭ كەرەمەت اكتەرلىك شەبەرلىگىن بىلدىرەدى، ال ونىڭ داۋىسى زور كۇش- قۋات پەن كوركەمدىككە يە. فيورەللو - ەرجان سايپوۆ پەن وفيتسەر - شىڭعىس راسىلحان ءوز رولدەرىن وتە جوعارى دەڭگەيدە ورىنداپ شىقتى.





ايگىلى ماەسترو الان بورىبايەۆتىڭ جەتەكشىلىگىمەن وركەستر ەرەكشە دىبىستالدى: اشىق، جارقىن ءارى ءبىرتۇتاس. مۋزىكانتتار مەن حور ارتىستەرى دە كورەرمەندەردىڭ ىستىق ىقىلاستارىنا بولەندى.

وركەستردىڭ اسقان شەبەرلىكپەن ورىنداعان ۋۆەرتيۋراسى جايلى بىرەر ءسوز ايتقىمىز كەلەدى. مۋزىكا تانۋشىلاردىڭ سوزىنشە، بۇگىنگى تاڭداعى وپەرانىڭ ورىندالۋى كەزىندە ءبىزدىڭ ەستيتىن ۋۆەرتيۋرا ءتۇپنۇسقا بولىپ تابىلمايدى، ياعني بۇل اۋەل باستا بولعان كىرىسپە شىعارما ەمەس. ول ۋۆەرتيۋرا تانىمال يسپان اۋەندەرىنەن قۇرالعان پوپۋرري بولعان. ونىڭ پارتيتۋراسى وپەرانىڭ العاشقى ورىندالۋىنان كەيىن عاجاپ جاعدايدا جوعالىپ كەتكەن.

ءوزىنىڭ جالقاۋلىعىمەن تانىمال بولعان روسسيني ساندىقتىڭ تۇبىنەن قازىرگى كۇندە ۇمىت بولعان «L'Equivoco stravagante» («عاجاپ وقيعا») وپەراسىنا جەتى جىل بۇرىن جازعان ەسكى ءبىر ۋۆەرتيۋراسىن الىپ شىققان.



وسى كىرىسپە شىعارما «اۆرەليان مەن پالميرا»جانە «ەليزاۆەتا، اعىلشىن حانشايىمى» وپەرالارى ءۇشىن ۋۆەرتيۋرالاردى قىسقارتۋ كەزىندە پايداعا اسقان.

دەسە دە، ونىڭ جاندى ءارى جەڭىل اۋەندەرى اعىلشىن حانشايىمى تۋرالى تراگەدياعا ساي بولماسا دا، «سيەۆيلدىك شاشتاراز» وپەراسىنا كەرەمەت ۇيلەسەدى، كەيبىر مۋزىكالىق سىنشىلار وسىناۋ ۋۆەرتيۋرانىڭ مۋزىكاسىنان روزينا مەن فيگارونىڭ مۋزىكالىق بەينەلەرىن كورگەندەي اسەردە قالعان.





پرەمەرا قارساڭىندا «استانا وپەرا» ديرەكتورى عالىم احمەدياروۆ اتاقتى يتاليالىق شەبەرلەر - ستسەنوگراف ەتسيو فريدجەريو مەن كوستيۋمدەر بويىنشا سۋرەتشى - «وسكار» سىيلىعىنىڭ لاۋرەاتى فرانكا سكۋارچاپينومەن بىرگە ەلەۋلى جۇمىس اتقارىلعاندىعىن اتاپ ءوتتى.

«العاش رەت كورەرمەن نازارىنا سوڭعى زاماناۋي تەحنولوگيالاردى قولدانا وتىرىپ، ستسەنوگرافيانى ۇسىندىق. مىسالى، بۇدان بىلاي بارلىق دەكوراتسيالار اۆتوماتتى تۇردە قوزعالاتىن بولادى. تەاترىمىزدىڭ افيشاسىندا الەمدىك رەپەرتۋاردىڭ ءىنجۋ- مارجانى - «سەۆيلدىك شاشتاراز» وپەراسىنىڭ پايدا بولعانىن ماقتان تۇتىپ، قۋانۋدامىز، - دەدى ول.



Kaz.tengrinews.kz

سوڭعى جاڭالىقتار