قازاقستاندىقتار كورنەكتى جازۋشى شەرحان مۇرتازامەن قوشتاسۋدا

الماتى. قازاقپارات - قازاقستان حالقى الماتىدا م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا بەلگىلى قالامگەر، جازۋشى، جۋرناليست شەرحان مۇرتازانى اقتىق ساپارعا شىعارىپ سالۋعا جينالدى، دەپ حابارلايدى قازاقپارات ءتىلشىسى.

جازۋشىمەن باقۇلداسۋعا زيالى قاۋىم وكىلدەرى، جازۋشىلار، قالامگەرلەر، الماتى اكىمى باۋىرجان بايبەك، ق ر مادەنيەت جانە سپورت ءمينيسترى ارىستانبەك مۇحامەدي ۇلى كەلدى.

«ءبىر كەم دۇنيە دەپ شىرىلداپ وتكەن الاشتىڭ ارىسى شەراعاڭدى اقتىق ساپارعا شىعارىپ سالۋعا جينالىپ وتىرمىز. بۇل - بارشامىزعا ورتاق ورنى تولماس قازا. شەرحان مۇرتازانىڭ ەڭبەكتەرى ەل تاعدىرىمەن تامىرلاس. سونىمەن قاتار ول كىسى ورتامىزدا وتىرعان كوپتەگەن ازاماتتاردىڭ رۋحاني ۇستازى بولعان»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.

مادەنيەت ءمينيسترى ءوز ءسوزىن پرەزيدەنت نۇرسۇلتان نازاربايەۆتىڭ كوڭىل ايتۋ جەدەلحاتىمەن جالعادى.

«شەرحان مۇرتازا بۇكىل عۇمىرىن ءتول ادەبيەتىمىز بەن مادەنيەتىمىزدىڭ دامۋىنا ارناعان ءبىرتۋار ازامات، قازاقتىڭ مۇڭىن مۇڭداپ، جوعىن جوقتاعان نار تۇلعالى قالامگەر، قارىمدى قوعام قايراتكەرى بولدى. ۇلت رۋحانياتىندا وزىندىك قولتاڭباسى بار زاڭعار جازۋشى سوڭىنا مول مۇرا، ءورىستى ونەگە قالدىردى. شەرحان مۇرتازا قازاق جۋرناليستەرىنىڭ بىرنەشە بۋىنىن تاربيەلەگەن ۇلتتىق باسپا ءسوزدىڭ بيىك بايتەرەگى ەدى. قاشاندا ادىلدىك پەن اقيقاتتىڭ الداسپانى بولعانى ءۇشىن قارا ءسوزدىڭ زەرگەرى، شىندىقتىڭ شىراقشىسى اتانعان شەرحان مۇرتازانى حالقى «شەراعاڭ» دەپ قادىر تۇتتى. سوناۋ تەمىرتاۋداعى ەڭبەك جولىمنىڭ تىكەلەي كۋاسى بولعان ول تاۋەلسىز مەملەكەتتىڭ ىرگەسىن قالاعان جىلداردا دا جانىمدا ءجۇرىپ، ەلدى ىلگەرىلەتۋ ىسىنە زور ۇلەس قوستى. شەرحان مۇرتازانىڭ قازاق رۋحانياتىنداعى ورنى مەن جارقىن بەينەسى ەشقاشان ۇمىتىلمايدى دەپ سەنەمىن»، - دەدى ا. مۇحامەدي ۇلى كوڭىل حاتتى وقي كەلە.

ايتا كەتۋ كەرەك، قازاقستاننىڭ بەلگىلى جازۋشىسى، قوعام قايراتكەرى شەرحان مۇرتازا 86 جاسىندا 9 -قازان كۇنى شامامەن 18:30-دا الماتى قالاسىنداعى ۇيىندە اۋىر ناۋقاستان قايتىس بولعان ەدى.

شەرحان مۇرتازا 1932 -جىلى جامبىل وبلىسىنىڭ جۋالى اۋدانىندا دۇنيەگە كەلگەن. ول 1955 -جىلى م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. جاستىق شاعىندا «لەنينشىل جاس» پەن «سوتسياليستىك قازاقستان» گازەتىنىڭ ءتىلشىسى بولىپ قىزمەت ەتكەن.

1963-1970 -جىلدار ارالىعىندا «لەنينشىل جاس» گازەتىنىڭ رەداكتورى قىزمەتىندە بولعان. ودان كەيىنگى كەزدەرى «جازۋشى» باسپاسى مەن «جالىن» الماناحىنىڭ، «جۇلدىز» جۋرنالىنىڭ باس رەداكتورى، قازاقستان جازۋشىلار وداعى باسقارماسىنىڭ ەكىنشى حاتشىسى، «قازاق ادەبيەتى» گازەتىنىڭ باس رەداكتورى ءارى قازاقستان جازۋشىلار وداعى باسقارماسىنىڭ حاتشىسى قىزمەتتەرىن اتقارعان. 1989-1992 -جىلدارى «ەگەمەن قازاقستان» گازەتىنىڭ باس رەداكتورى، 1992-1994 -جىلدارى - قازاقستان رەسپۋبليكاسى مەملەكەتتىك تەلەراديو كومپانياسىنىڭ ءتوراعاسى قىزمەتتەرىن اتقاردى. ق ر پارلامەنتىنىڭ ءماجىلىس دەپۋتاتى بولدى. جازۋشىنىڭ ءار جىلدارى جازىلعان «تابىلعان تەڭىز»، «بەلگىسىز سولداتتىڭ بالاسى»، «احمەتجاننىڭ انتى»، «مىلتىقسىز مايدان» پوۆەستەرى، «41-جىلعى كەلىنشەك»، «ينتەرنات نانى» اڭگىمەلەرى، «قارا مارجان»، «جۇرەككە ءاجىم تۇسپەيدى»، «نە جەتپەيدى؟»، بەس كىتاپتان تۇراتىن «قىزىل جەبە»، «اي مەن ايشا» روماندارى قازاق پروزاسىنا قوسقان وشپەس تۋىندى بولىپ قالارى ءسوزسىز.