قازاقستاندىقتار الەۋمەتتىك جەلىدە ەۋروپالىق الاياقتارعا الدانۋدا

 قوستاناي. قازاقپارات - قوستاناي وبلىستىق ىشكى ىستەر دەپارتامەنتى ازاماتتاردى ەۋروپادا كەڭىنەن تاراعان ينتەرنەت- الاياقتىق تۋرالى ەسكەرتتى.

زارداپ شەككەندەردىڭ اراسىندا قازاقستاندىقتار دا بار. اتاپ وتىلگەندەي، الاياقتار LinkedIn كاسىبي الەۋمەتتىك جەلىسىن پايدالانادى، دەپ حابارلايدى «قازاقپارات» ح ا ا ءتىلشىسى.

الاياقتار كومپانيا باسشىلارى تۋرالى اقپارات جيناپ، ءتىپتى بايلانىس نومىرلەرىن انىقتاپ، ولاردىڭ اتىنان قاراماعىنداعى قىزمەتكەرلەرگە حات جولدايتىنى بەلگىلى بولدى.

قوستاناي وبلىستىق ءى ءى د كريمينالدىق پوليتسيا باسقارماسىنىڭ اعا جەدەل وكىلى ايدار مۋسيننىڭ ايتۋىنشا، وسىنداي حاتتار كوبىنە كومپانيانىڭ قارجى نەمەسە باس ديرەكتورىنىڭ جاساندى ەلەكتروندىق پوشتاسىنان ونىڭ قارجى بولىمىنە جولدانادى. حات ماتىنىندە باسشىنىڭ بەلگىلى ءبىر قاراجات سوماسىن اتالعان شوتقا اۋدارۋ تالابى جازىلادى. ءىس جۇزىندە الاياقتار ءتۇپنۇسقا ەلەكتروندىق پوشتاعا ۇقساس پوشتانى ءبىر ءارىپ نەمەسە بەلگىسىن وزگەرتىپ قۇرادى.

«الاياقتىقتىڭ بۇل ءتۇرى CEO fraud دەپ اتالادى. قىلمىسكەرلەر الەۋمەتتىك پسيحولوگياعا نەگىزدەلگەن تەحنيكانى پايدالانادى. ادامدار وعان الدانىپ، اتالعان شوتقا اقشا اۋدارىپ تۇرادى. حاتتىڭ ءماتىنى قانداي دا ءبىر فيرمانىڭ ستاندارتتارىنا بارىنشا ۇقساس بولۋى ءۇشىن الاياقتار كومپانيانىڭ باسپا ءسوز پاراقشالارىن بەلسەندى وقىپ، قىزمەت سالاسىن تانىپ الادى» ، - دەپ اتاپ ءوتتى پوليسيا كاپيتانى.

 قىلمىسكەرلەر LinkedIn كاسىبي جەلىسىن پايدالانادى. سەبەبى وندا تىركەلۋ وڭاي. ونىمەن قوسا، Facebook نەمەسە Twitter- گە قاراعاندا، ادامدار LinkedIn ارقىلى كاسىبي بايلانىستاردى قۇرادى، جۇمىس ىزدەيدى.

ءتارتىپ ساقشىلارى ازاماتتارعا قىراعىلىق تانىتىپ، جۇمىس بەرۋشى تۋرالى اقپاراتتى بارىنشا مۇقيات تەكسەرۋدى، بەيتانىس ادامداردىڭ شوتتارىنا اقشا جىبەرمەۋدى، كادرلار ءبولىمىنىڭ ماماندارىمەن جەكە سويلەسۋدى كەڭەس ەتەدى. ەگەر ءسىز نەمەسە جاقىندارىڭىز كيبەرقىلمىسكەرلەردىڭ ارەكەتىنەن زيان كورسەڭىز، پوليسيانىڭ 102 نومىرىنە شۇعىل حابارلاسقان ءجون.