ەلىمىزدە جاڭا مۇناي ءوندىرۋ جوبالارى ىسكە قوسىلادى
«بۇگىندە مۇناي- گاز سالاسى نارىعىندا قاربالاس. وعان بىرنەشە سەبەپ بار، بىرىنشىدەن، مۇناي باعاسىنىڭ ءوسۋى وسى سالاعا جاڭا ءبىر سەرپىلىس بەردى. ەكىنشىدەن، مۇناي ءوندىرۋ وپەراتورلارى جاڭا جوبالاردى قولعا الدى. ناقتىراق توقتالا كەتەتىن بولساق، بيۋدجەتى 5 ميلليارد ا ق ش دوللارىن قۇرايتىن قاراشىعاناق ءوندىرىسىن كەڭەيتۋ جۇمىستارى قولعا الىندى. سول سياقتى كاسپي تەڭىزىندە حازار جانە قالامقاس مۇناي وڭدەۋ جوبالارىنىڭ كونسەپتسياسى دايىن، جۋىردا ىسكە قوسىلادى. بۇدان بولەك تەڭىز كەن قويناۋىندا بيۋدجەتى 5 ميلليارد ا ق ش دوللارىن قۇرايتىن جاڭا جوبا ىسكە اسپاق» ، - دەدى قازاقستان مۇناي سەرۆيس كومپانيالار وداعىنىڭ ءتورالقا ءتوراعاسى راشيد جاقسىلىقوۆ.
سونىمەن قاتار وداق ءتوراعاسى ەلباسى جولداۋىنداعى اتالعان سالا بويىنشا اتقارىلۋى ءتيىس تاپسىرمالارعا دا توقتالدى.
«مۇنايگاز سالاسىندا نەسيە سەكتورىن جاڭعىرتۋ ءۇشىن ەلباسى اتاپ وتكەندەي تىكەلەي ينۆەستيتسيالار قورىن قۇرۋدى قولعا الدىق. بۇگىندە وتاندىق كومپانيالار ءۇشىن بانكتىك نەسيەلەردىڭ كولەمىن ارتتىرۋ تالابى قويىلدى. ويتكەنى كەيبىر تەندەرلەردىڭ باعاسى قىرۋار قارجىنى قاجەت ەتەدى، ال ەركىن اينالىمدا قاراجاتى بار وتاندىق كومپانيالار از. وسى تۇرعىدا ەلباسى تاپسىرماسى ەكونوميكانىڭ اتالعان سەكتورىن جاڭعىرتۋعا ىقپالىن تيگىزەدى» ، - دەدى ول.
ايتا كەتسەك، ەلباسى قازاقستان حالقىنا جولداۋىندا سوڭعى 20 جىلدا ەلىمىزدىڭ 300 ميلليارد ا ق ش دوللارى كولەمىندەگى تىكەلەي شەتەلدىك ينۆەستيتسيا تارتىلعاندىعىن ايتقان بولاتىن.
ستاتيستيكاعا سۇيەنسەك، ەلىمىزدەگى بارلىق مۇناي سەرۆيس سالاسى قىزمەتتەرىنىڭ تەك %50 قازاقستاندىق كومپانيالارعا تيەسىلى، ال جەر قويناۋىن پايدالانۋ سالاسىنداعى مۇناي سەرۆيس قىزمەتىنىڭ جىلدىق اينالىمى 8 ميلليارد ا ق ش دوللارىن قۇراپ وتىر.
ەسكە سالا كەتسەك، قازاقستاننىڭ مۇناي سەرۆيستىك كومپانيالار وداعى 2011 -جىلدىڭ قازان ايىندا قۇرىلعان. وداقتىڭ قۇرامىندا بارلىعى 160 مۇناي كومپانياسى بار. وداقتىڭ ماقساتى - قازاقستاننىڭ ءىرى مۇناي گاز جوبالارىندا جەرگىلىكتى ۇلەستى ارتتىرۋ، قازاقستاندىق كومپانيالاردىڭ مۇنداي جوبالارعا كوبىرەك قاتىسۋىن قامتاماسىز ەتۋ.
