شەرحان مۇرتازانىڭ قازاق رۋحانياتىنداعى جارقىن بەينەسى ۇمىتىلمايدى - ەلباسى

None
None
استانا. قازاقپارات - نۇرسۇلتان نازاربايەۆ شەرحان مۇرتازانىڭ قايتىس بولۋىنا بايلانىستى تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى شەرحان مۇرتازانىڭ قايتىس بولعانى تۋرالى حاباردى زور كۇيزەلىسپەن قابىلدادى.

«شەرحان مۇرتازا بۇكىل عۇمىرىن ءتول ادەبيەتىمىز بەن مادەنيەتىمىزدىڭ دامۋىنا ارناعان ءبىرتۋار ازامات، قازاقتىڭ مۇڭىن مۇڭداپ، جوعىن جوقتاعان نار تۇلعالى قالامگەر، قارىمدى قوعام قايراتكەرى بولدى. ۇلت رۋحانياتىندا وزىندىك قولتاڭباسى بار زاڭعار جازۋشى سوڭىنا مول مۇرا، ءورىستى ونەگە قالدىردى.

شەرحان مۇرتازا قازاق جۋرناليستەرىنىڭ بىرنەشە بۋىنىن تاربيەلەگەن ۇلتتىق باسپا ءسوزدىڭ بيىك بايتەرەگى ەدى. قاشاندا ادىلدىك پەن اقيقاتتىڭ الداسپانى بولعانى ءۇشىن قارا ءسوزدىڭ زەرگەرى، شىندىقتىڭ شىراقشىسى اتانعان شەرحان مۇرتازانى حالقى «شەراعاڭ» دەپ قادىر تۇتتى. سوناۋ تەمىرتاۋداعى ەڭبەك جولىمنىڭ تىكەلەي كۋاسى بولعان ول تاۋەلسىز مەملەكەتتىڭ ىرگەسىن قالاعان جىلداردا دا جانىمدا ءجۇرىپ، ەلدى ىلگەرىلەتۋ ىسىنە زور ۇلەس قوستى.

شەرحان مۇرتازانىڭ قازاق رۋحانياتىنداعى ورنى مەن جارقىن بەينەسى ەشقاشان ۇمىتىلمايدى دەپ سەنەمىن»، - دەلىنگەن جەدەلحاتتا.

سوڭعى جاڭالىقتار