كىسى ءولتىردى دەپ ايىپتالعان الەكساندر كۋزنەسوۆ تۇركياعا كەتىپ قالعان

None
None
الماتى. قازاقپارات - «چۋكوتكا» بارىنداعى توبەلەس ءۇشىن سوتتالعان الەكساندر كۋزنەسوۆ تۇركياعا ۇشىپ كەتكەن.

بۇل تۋرالى بۇگىن سوت وتىرىسىندا بەلگىلى بولدى، دەپ حابارلايدى قازاقپارات ءتىلشىسى.

سوتتا پوليتسيا وكىلى حابارلاعانداي، 22 -تامىزدا بوستاندىق اۋداندىق ءى ءى ب- نە الماتى وبلىسى سوتىنىڭ قاۋلىسى ءتۇستى. وندا كۋزنەسوۆتىڭ جازاسىن ايىپپۇلمەن اۋىستىرۋ تۋرالى شەشىمدى بۇزۋ قاجەتتىگى تۋرالى ايتىلعان.

ءتارتىپ ساقشىلارى كۋزنەتسوۆتى تاۋىپ، كولونياعا قايتارۋى ءتيىس بولاتىن. ءبىراق ولار سوتتالۋشىنى ۇيىنەن تابا المادى.

كۋزنەسوۆتىڭ كورشىلەرىنىڭ ايتۋىنشا، ول ۇيىندە بولماعان. كەيىن بەلگىلى بولعانداي، كۋزنەسوۆ 13-تامىزدا قازاقستان شەكاراسىنان شىعىپ كەتكەن. Turkish airlines رەيسىمەن الماتى- ستامبۋل باعىتىندا شىعىپ، قايتىپ ورالماعان.

سوتتالۋشىنىڭ قورعاۋشىسى الما مۋسينانىڭ ايتۋىنشا، ءىس ماتەريالدارىندا كۋزنەسوۆتىڭ اناسىنىڭ جازباشا سۇراق جاۋابى ەنگىزىلمەگەن. سونىمەن قاتار، ۇيىنە بارعان پوليتسيانىڭ راپورتى بار. قۇجاتتا 7-تامىز دەپ كورسەتىلگەن. الايدا، اپەللياتسيالىق سوت شەشىمى 14-تامىزدا شىققان.

سوت ءىستى قاراۋدى كەيىنگە قالدىرىپ، كەلەر وتىرىستا ونىڭ اناسىنان جاۋاپ الۋ قاجەت دەپ شەشكەن.

ەستەرىڭىزگە سالا كەتەيىك، 2015 -جىلى «چۋكوتكا» بارىنىڭ الدىنداعى توبەلەس كەزىندە سىرىم مۇراتقاليەۆ كوز جۇمعان بولاتىن. سول جىلدىڭ ماۋسىمىندا ءبىرىنشى سوت ينستانسياسى كۋزنەسوۆتى ابايسىزدا ادام ءولتىرىپ العانى ءۇشىن 1,5 جىلعا باس بوستاندىعىنان ايىرعان بولاتىن. كەيىنىرەك، الماتى قالالىق سوتىنىڭ اپەللياتسيالىق القاسى «سوڭى ادام ولىمىنە الىپ كەلگەن ادام دەنساۋلىعىنا قاساقانا نۇقسان كەلتىرۋ» بابىمەن 8 جىلعا باس بوستاندىعىنان ايىردى. كۋزنەسوۆ جازاسىن الماتى تۇبىندەگى زارەچنىي اۋىلىنداعى تۇرمەدە وتەپ جاتقان ەدى.

2018 -جىلدىڭ 2-شىلدەسىندە الەكساندر كۋزنەسوۆ تۇرمەدەن بوساپ شىقتى. سوت ونىڭ وتەلمەگەن 5 جىلىن ايىپپۇلمەن جابۋ تۋرالى شەشىم قابىلدادى.

كەيىن الماتى وبلىستىق سوتىنىڭ اپەللياتسيالىق القاسى ادام ولتىرگەنى ءۇشىن ءىستى بولعان كۋزنەسوۆتى كولونياعا قايتارۋ جونىندە شەشىم شىعاردى.

سوت ۇكىمى شىعاتىن كۇنى الەكساندر كۋزنەسوۆتىڭ قازاقستاننان كەتىپ قالعانى بەلگىلى بولدى.

سوڭعى جاڭالىقتار